Genesis 1 - সান্তালী বাইবেল

Sirjạukʼ reakʼ katha

¹ Etohopʼre Isor do ot ar sermae sirjạukeda.

² Unre dhạrti do nonkan muṭhạn bae ńamakatʼ tahẽkana, onare jiwiyanakʼ mente jãhãnakʼ cetʼge baṅ tahẽkana; ar ńut do athantar dakʼ cetanre tahẽkana. Ar Isorren Jiu do ona dakʼ cetanreye manḍrao baṛaekan tahẽkana.

^3-5 Isore menkeda, “Marsal hoyokʼma.” Ado marsal hoyena. Uni do onae ńelkeda ar ạḍi mońjge hoyakana. Uni do ńut khon marsale begarketʼte ona reakʼ ńutum do siń ar ńut reakʼ ńutum do ńindại dohokeda. Nonkate setakʼena ar ạyupʼena ar ona do pạhil din hoyena.

⁶ Ona tayom Isore menkeda, “Dakʼ talare mitʼṭecʼ phaelao jaega sirjạukʼma, ar dakʼ do bar hạṭińokʼma.”

⁷ Nonkate Isor do dakʼ talare mitʼṭecʼ phaelao jaegae sirjạukeda ar cetan ar latar reakʼ dakʼe begarkeda. Onate cetan ar latar reakʼ dakʼ do begarena.

⁸ Isor okaṭakʼ phaelao jaegae sirjạuketʼ ona reakʼ ńutum do sermae dohokeda. Nonkate ạyupʼena ar setakʼena ar ona do dosar din hoyena.

⁹ Noa tayom Isore menkeda, “Serma latar reakʼ sanam dakʼko mitʼ jaegare jarwakʼma ar rohoṛ jaega ńelokʼma.” Ar onkage hoyena.

¹⁰ Isor do ona rohoṛ jaega reakʼ ńutum do ote dohokeda, ar jarwa akan dakʼ do jalapuriye metatʼa. Isore ńelkeda ona do ạḍi mońjge hoyakana.

¹¹ Ona tayom Isore menkeda, “Ot cetanre ghãsko janamokʼma; ar nonkan aṛakʼ sakam ar dareko hoyokʼma ar onako reakʼ itạko tahenma. Ot cetanre eṭakʼ eṭakʼ jo dareko janamokʼma ar onako hõ jo bahakʼma; ar onako reakʼ itạko tahenma.” Ar onkage hoyena.

¹² Ot reakʼ ghãsko, ar itạ menakʼ nonkan sanam lekan anaj ar aṛakʼ sakamko, baha dareko ar sanam lekan jo dareko janamokʼma; ar onako reakʼ itạko hõ tahenma. Isore ńelkeda ona do ạḍi mońjge hoyakana.

¹³ Nonkage ạyupʼena ar setakʼena, ar ona do tesarakʼ din hoyena.

¹⁴ Ona tayom Isore menkeda, “Sermare marsalakʼko hoyokʼma, ar onako do ńindạ khon sińe begarma. Onako do eṭakʼ eṭakʼ dinko, candoko ar bochorko reakʼ cinhạko tahenma.

¹⁵ Ar onako do serma khon dhạrtite marsalokʼma.” Ar onkage hoyena.

¹⁶ Isor do barea maraṅ marsale benaokeda. Onakin modre maraṅakʼ do siń cetanre ar huḍińakʼ do ńindạ cetanre rajokʼ lạgitʼe benaokeda. Ona chaḍa uni do ipilko hõe benaoketʼkoa.

¹⁷ Uni do sermare onkoe dohoketʼkoa jemon dhạrti cetanre marsalko emokʼte,

¹⁸ siń ar ńindạ cetanreko rajokʼ ar ńut khon marsalko begar. Isore ńelkeda ona hõ ạḍi mońjge hoyakana.

¹⁹ Ado ạyupʼena ar setakʼena, ar ona do ponakʼ din hoyena.

²⁰ Ona tayom Isore menkeda, “Dakʼko do sanam lekan jiwiyankote perejokʼma, ar ot cetanre ar serma latarre cẽṛẽkoko uḍạu baṛaema.”

²¹ Nonkate Isor do jalapuriren maraṅ maraṅ jiwiyanko ar dakʼre jhake jhak aema lekan jiwiyankoe sirjạuketʼkoa. Ona chaḍa aema lekan cẽṛẽko hõe sirjạuketʼkoa. Ar apan ạpin jạtrenko lekate bạḍokʼ reakʼ daṛe hõe danatʼkoa. Isore ńelkeda ona do ạḍi mońjge hoyakana.

²² Isor do onko sanamko bhoratʼkoteye menkeda, “Saṅgekʼ reakʼ daṛete perejokʼpe ar apeakʼ lekhako ḍhertape, ar jalapuri reakʼ dakʼko perejpe. Ar coṭren cẽṛẽko hõ apan ạpin jạtrenko leka lekha ḍherokʼ takoma”

²³ Ado ạyupʼena ar setakʼena, ar ona do mõṛẽakʼ din hoyena.

²⁴ Ona tayom Isore menkeda, “Ot khon nonkan jiwiyankoko janamokʼma ar jemon onko do apan ạpin jạtrenko leka saṅgekʼ reakʼ daṛe tahentakoma. Onko modre ạsul janwarko, bir janwarko ar sanam lekan leńokʼ ṭundạṅkan jiwiyanko hõko tahenma.” Ar onkage hoyena.

²⁵ Isor do dhạrtiren sanam lekan bir janwarko, ạsul janwarko ar sanam lekan leńokʼ ṭunḍạṅkan jiwiyankoe benaoketʼkoa. Noko sanamkoge apan ạpin jạtrenko lekate saṅgekʼ reakʼ daṛeye ematʼkoa. Isore ńelkeda ona do ạḍi mońjge hoyakana.

Sirjạuren pạhil manwa

²⁶ Ona tayom Isore menkeda, “Ńitokʼ do abo leka ar abo sãote jurikʼ leka manwa bon benaokoma. Onko do jalapuriren hakoko, coṭren cẽṛẽko, otren janwarko, leńokʼ ṭunḍạṅkan sanam lekan lạṭu ar kạṭicʼ ạsul ar bir janwarko ar dhạrti reakʼ sanamakʼko cetanre mạlik lekate ektiạriko calaoma.”

²⁷ Tayomte Isor do acʼleka mitʼṭen manwae benaokedea. Hẽ acʼakʼ muṭhạn lekageye benaokedea, uni do herel ar maejiukategeye sirjạuketʼkinạ.

²⁸ Isor do unkin bhoratʼkinteye metatʼkinạ, “Saṅgekʼ reakʼ daṛete perejokʼpe, ar apnarakʼ lekha ḍhertape ar dhạrti perejpe ar dhạrti do apeakʼ ḍanṭaore dohoype. Ona chaḍa ape do jalapuriren hakoko, coṭren cẽṛẽko ar otren sanam lekan jiwiyanko cetanre mạlik lekate ektiạripe calaoa.”

²⁹ Ona tayom Isore menkeda, “Ńelben, Ot cetan reakʼ sanam aṛakʼ sakamko ar sanam lekan dareko ar jo bahako reakʼ itạko hõń emena. Noakoge abenakʼ jomakʼ do hoyokʼa.

³⁰ Ot cetanren sanam janwarko, coṭren cẽṛẽko ar sanam lekan leńokʼ ṭunḍạṅokʼ jiwiyanko, metakʼme sanam lekan jiwiyankoakʼ jomakʼ lạgitʼ aṛakʼ sakamko hõń emena.” Ar onkage hoyena.

³¹ Isor do acʼakʼ sirjạuakʼ reakʼ sanamakʼe ńelkeda. Ar sạrige onako do ạḍi mońjge hoyakana. Ado ạyupʼena ar setakʼena, ar ona do turuiyakʼ din hoyena.