Exodus 1 - সান্তালী বাইবেল

Israelko cetanre santao

^1-2 Israelren, metakʼme Jakob sãote uniren hoponko okoe do apan ạpin gharońj salakʼ Misor disạmteko senlen onkoakʼ ńutum do hoyokʼkana Ruben, Simeon, Lewi, Jihudạ,

^3-5 Isakar, Sebulon, Benjamin, Dan, Napthali, Gad ar Aser. Ona chaḍa Joseph do laharege Misorteye calao akan tahẽkana. Jakobakʼ bõsren noko do lekhare jotote eae gel hoṛko tahẽkana.

⁶ Tayomte Joseph, ar ren boehako ar onko okteren sanamkogeko gocʼena.

⁷ Menkhan Israelkoakʼ bõsko saṅge idikʼ reakʼ daṛe do tahẽkangea; onko do lekhareko ḍher idiyente beṛhaeteko pasnaoena arko daṛe idiyena, ar onkote Misor disạm do perecʼena.

⁸ Tayomte Misor disạm reakʼ sanam ektiạri do nonkan mitʼṭen nãwã rajakʼ tire paṛaoena okoe do Joseph reaṅ cetʼge bae baḍaekan tahẽkana.

⁹ Uni do acʼren porjakoe metatʼkoa, “Ńelpe, Israelko do lekhate ar daṛete abo khonko ḍher idikʼkana.

¹⁰ Onate lekhare jemon ar aloko ḍher idikʼ onate dela, onko sãote bud salakʼ bon calakʼma; ar baṅ khan lạṛhạire onko do aboren bạiriko sãoteko midokʼte abo upạrteko lạṛhạiya ar tayomte noa disạm bạgikateko oḍok calakʼa.”

¹¹ Onate Misorrenko do gokʼ bhạriạ hotete santaoko lạgitʼ onko cetanre sordarko bahalketʼkoa. Ar Pharaoakʼ phosol jarwae lạgitʼ Israelko hotete Pitạm ar Ramesh noa barea murại nagrahako benaokeda.

¹² Menkhan Misorrenko do Israelko tinạkʼko santaoketʼko unạkʼge onko do lekhareko ḍher idiyena ar beṛhaeteko pasnao idiyena. Onate Misriko do Israelko iạte monre botor rakapʼatʼkoa.

¹³ Onko do arhõ jorjulum salakʼ golamko khaṭaoketʼkoa.

¹⁴ Khet reakʼ eṭakʼakʼ kạmi sãote onko cetanre cun suṛki ar iṭạ reakʼ hamal kạmiko ladeatʼkoa ar onkoakʼ jiwiko haṛhãtʼ cabaketʼtakoa. Onko do jor julumkate joto lekanakʼ kạmiko kạmi ocoketʼkoa.

¹⁵ Ona chaḍa Misorren raj do Sipra ar Poa ńutuman barea Ibri, metakʼme Israelkoren dhạ̃i buḍhikine metatʼkinạ,

¹⁶ “Gidrạ janamko oktere Ibri maejiuko goṛowako jokhecʼ ben ńelkoa onko do koṛa hopon se kuṛi hoponko janametʼkoa; ar koṛa hoponko hoylen khan onko doben gocʼkoa ar kuṛi hopon do jiwetʼ ben dohokoa.”

¹⁷ Menkhan unkin dhạ̃i buḍhi do Isor kin botoraekan tahẽkana. Onate unkin do Misor rajakʼ hukum leka kạmi baṅkate koṛa hoponko jiwetʼkin dohoketʼkoa.

¹⁸ Unre raj do unkin dhạ̃i buḍhi hoho ạgu ocoketʼkinteye metatʼkinạ, “Cedakʼ nonka do ben kạmikana? Koṛa hopon do cedakʼ jiwetʼ ben dohoyetʼkoa?”

¹⁹ Unkin do Pharaokin roṛ ruạṛadea, “Ibri maejiu do Misorren maejiu leka doko baṅkana. Onkoakʼ daṛe do nunạkʼge ḍhera je, dhạ̃i buḍhi onko ṭhen ạuri seṭerokʼrege onko do gidrạko janametʼkoa.”

²⁰ Isor do unkin dhạ̃i buḍhikine bhạlạiyketʼkinạ. Ar Israelkoakʼ lekha do ḍher idikʼtege tahẽyena ar onko doko daṛe idiyena.”

²¹ Unkin dhạ̃i buḍhi do Isor kin botoraekan tahẽkante uni do onkoren hoponko hotete bõskoe saṅgeketʼkoa.

²² Tayomte Pharao do acʼren porjako cetanre noae hukumkeda, “Ibriko talare koṛa hoponko janamlen khan ape do Nil gaḍarepe khadlekoa, menkhan kuṛi hopon do jiwetʼpe dohokoa.”