Ester 1 - সান্তালী বাইবেল

Bạsti do rạni hudạ khone bad ocokʼkan

^1-2 Ahasberos raj do tinre Susan gaṛre acʼakʼ siṅghạsonre duṛupʼkate rajosṭiye calaoetʼ tahẽkana unre niạko ghoṭna do hoylena. Nui Ahasberos do bharot disạm khon Kus hạbicʼ mitʼsae bargel eae disạm cetanreye rajokʼkan tahẽkana.

³ Uniyakʼ rajokʼ tesar bochorre uni do acʼren sanam cetan hudạren hoṛko ar kạmiyạko lạgitʼ mitʼṭecʼe bhojkeda. Onko modre Paras ar Madae disạmren Senaputiko manotan hoṛko ar disạmkoren cetan hudạren hoṛko tahẽkana.

⁴ Uni do turui cando hạbicʼ acʼakʼ rajosṭire acel pacel dhon durib ar raj lekate acʼakʼ ṭhosoke udukʼatʼkoa.

⁵ Niạko tayom uni do Susan gaṛre jarwa akan cetan ar latar hudạren sanamko lạgitʼ eae din hạbicʼ raj doṅgol reakʼ bagwanreye bhojkeda.

⁶ Ona bagwan sajao lạgitʼ do ponḍ ar lil kicricʼ reakʼ orwalkoe beoharkeda. Onako do ponḍ ar beguni roṅakʼ mĩhĩ musnạ sutạm reakʼ baberte rupạ mạ̃kṛiko ar marbel dhiriko khunṭire tol ṭarhao akan tahẽkana. Marbel dhiriko, jhinuk ar aema lekan roṅ reakʼ eṭakʼ eṭakʼ damanakʼ dhiriko reakʼ aṭetʼ bạisạuatʼre sona ar rupạ reakʼ duṛupʼakʼko tahẽkana.

⁷ Ar ńuńuakʼko do nana parkan sona reakʼ bạṭikoreye emokʼkan tahẽkana. Rajakʼ murji lekage raj doṅgolre darkha rasa do asambheṛge tahẽkana.

⁸ Rajakʼ hukumte neota akanko do akoakʼ mon bhor ńu reakʼ hukumko emocolena, ente tinạkʼko khoj unạkʼge emako lạgitʼ raj do acʼren gutikoe hukumatʼko tahẽkana.

⁹ Ahasberosakʼ raj doṅgolre Bạsti rạni hõ maejiuko lạgitʼ mitʼṭecʼe bhojkeda.

^10-11 Eaeakʼ dinre Ahasberos raj do darkha rasae ńuketʼ khan ạḍiye kusiyena ar Mohumon, Bistha, Harbona, Bigtha, Abagtha Sethar ar Karkas ńutuman acʼren noko eae goṭen mạ̃yạ̃ṛikoe hukumatʼkoa Bạsti rạni do rạni mukuṭko horokʼaete acʼ samaṅre jemonko oḍok ạguiye. Rạni do ńelokʼte ạḍi napaeye tahẽkante raj do hoṛko ar cetan hudạren kạmiyạko samaṅre uniyakʼ rup ńel ocoetae lạgitʼe menleda.

¹² Rajren sapʼdapʼko do rajakʼ hukum rạniko baḍae ocokede khan Bạsti rạni do onko sãote hijukʼ bae rebenlena. Onate raj do edreteye seṅgelena.

¹³ Raj do ạn ar bicạrren gạkhuṛ hoṛko tulucʼ niạ babotreye sopolhawana.

¹⁴ Onko sopolhako modre Karsena, Sethar, Admatha, Tarsis, Meres, Marsena, ar Memukan teko cetanre raj do ạḍiye bhorsakʼ kan tahẽkana. Raj samaṅre Paras ar Madae disạmren noko eae hoṛ do rajosṭiko modre joto khon maraṅ hudạren hoṛko tahẽkana ar noko cetanrege maraṅ hudạren hoṛko jarwako reakʼ dạyik do tahẽkana.

¹⁵ Raj doe kuliyana, “Ạn lekate Bạsti rạni do cetʼ cekaye hoyokʼa? Ente uniren sapʼ sosorko hotete Ahasberos raj okaṭakʼ hukumletʼ rạni do ona bae manaoleda.”

¹⁶ Raj ar cetan hudạren kạmiyạko samaṅre Memukan doe roṛ ruạṛkeda, “Bạsti rạni do eken raj upạrteye behok akada ona do baṅa, menkhan Ahasberos rajren sanam cetan hudạren kạmiyạko ar disạmren sanam hoṛko upạrte hõe behok akada.

¹⁷ Ente Rạniyakʼ nonkan beohar reakʼ katha do sanam maejiuko talare baḍaeyokʼa ar onko do akoren jãwãeko nihạ̃tkoa, enteko mena, ‘Ahasberos raj samaṅre senokʼ lạgitʼ hukum ńamkate hõ Bạsti rạni do uni samaṅre bae senlena.’

¹⁸ Paras ar Madaeren manotan maejiuko do rạniyakʼ noa beohar reakʼ katha ańjomkate teheńge akoren jãwãeko sãote inạ mitʼ lekageko beohara. Ar onate nihạ̃t ar raṅgao do bạ̃ṛti idikʼa.

¹⁹ Onate maharaj bogeye bujhạu khan tobe uni do mitʼṭecʼ raj parwanae emokʼma, Bạsti rạni do ar tisge Ahasberos raj samaṅre bae hecʼ daṛeakʼa. Ar niạ hukum do Paras ar Madae reakʼ ạn puthire ol caṛhaokʼma ar ona do baṅ bodolokʼa. Ona chaḍa maharaj do Bạsti rạni khon hõ lekicʼ eṭakʼ ar mitʼṭen do rạni hudại emaema.

²⁰ Rajakʼ niạ hukum do tinre acʼakʼ rajosṭi reakʼ sanam jaegakore lại pasnaokʼa unre disạmren sanam maejiuko do akoren jãwãeko manotkoa.”

²¹ Niạ sopolha raj ar uniren cetan hudạren kạmiyạko do bhageko metatʼa. Onate raj do Memukonakʼ katha lekageye kạmikeda.

²² Uni do acʼakʼ rajosṭi reakʼ sanam disạmkore onkoakʼ akhorte ar mimitʼ jạtrenkoakʼ pạrsi lekate ciṭhiye kolkeda je, mitʼke mitʼ herel hoṛ do acʼakʼ gharońjren matha kanae ar uniyakʼ gharońjre acʼakʼ pạrsigeye beoharma.