Esra 1 - সান্তালী বাইবেল

Jihudiko akoakʼ disạmteko ruạṛ hecʼen

¹ Jirimiạ hotete roṛlen Probhu Isorakʼ katha purạukʼ lạgitʼ Parasren raj Korese rajokʼ pạhil bochorre Probhu Isor do Koresakʼ ontorre nonkan uskure danadea onate uni do sanam rajosṭire roṛte ar ol hotete noae lại sodorkeda:

² “Parasren raj Kores do niạ kathae meneda, ‘sermaren Probhu Isor do dhạrti reakʼ sanam rajosṭi ińe em akawạdińa ar Jihudạ reakʼ Jerusalemre acʼ lạgitʼ mitʼṭecʼ oṛakʼ benao lạgitʼe bachao akadińạ.

³ Uniren hoṛko modre, metakʼme ape talare okoeye khojkan uni do Jerusalemte senkate Probhu Isorakʼ oṛakʼe benaoma, ente uni do Jerusalemre menaea. Ar okoe onḍeko senokʼ onkoren Isor do onko soṅgetegeye tahena.

⁴ Isorren hoṛko okoe do ńithõ jiwetʼ menakʼko onko do jãhãregeko girobasokʼkan onko modre Jerusalemte okoe calakʼko menjoṅkan onko aḍepaseren hoṛko do sona, rupạ, emateakʼ jinisko ar janwarkoko em goṛoakoma ar Jerusalemre Isorakʼ oṛakʼ lạgitʼ apnarakʼ kusite dan sandesko emokʼma.’ ”

⁵ Noate Jihudạ ar Benjạminren bõs mukhiyạko, naekeko ar Liwiko talare okoekoakʼ ontorre Isor do monsubại janam ocoketʼtako onko mimitʼko do Jerusalemre Probhu Isorakʼ oṛakʼ benao lạgitʼko sapṛaoena.

⁶ Onko aḍepaseren sanam hoṛko do sona, rupạ reakʼ bhajan, eṭakʼ eṭakʼ jinisko, janwarko ar damanakʼ jiniskoko ematʼkote onkoko goṛowatʼkoa ar Isorakʼ oṛakʼ lạgitʼ apnarakʼ kusi leka danko emena.

^7-8 Ona chaḍa Nebukadnesar do Probhu Isorakʼ oṛakʼ reakʼ okako jinis Jerusalem khon idikate acʼren debotawakʼ mundilreye doholetʼ, Kores raj do khajańci sordar Mithredath hotete onakoe oḍok ạgukeda. Ar Mithredath do Jihudạren disạm cakʼlaoyicʼ Sesbasar onakoe lekhawadea.

⁹ Onako jinis do nonka leka tahẽkana: pegel sona reakʼ gamlako, mitʼ hajar rupạ reakʼ gamlako, bargel are goṭecʼ churiko,

¹⁰ pegel sona reakʼ bạṭiko, ponsae gel goṭecʼ rupạ reakʼ bạṭiko ar mitʼ hajar eṭakʼ eṭakʼ jinisko.

¹¹ Onḍe do jotote mõṛẽ hajar ponsae sona ar rupạ reakʼ jinisko tahẽkana. Bondi dosare bidisiạre girobasokʼ kan hoṛko do tinre Babel khon Jerusalemteko hecʼena unre Sesbasar do niạko jinis soṅgeteye ạgu darakeda.