Dosar Biboron 1 - সান্তালী বাইবেল

Horeb buru bạgiyakʼ reakʼ hukum

¹ Mose do jordan gaḍa purub secʼ reakʼ hahaṅkar jaegare, metakʼme Arabatre sanam Israelkoe galmaraoatʼkoa. Ar oka jaegareye galmaraoatʼko ona do Sup samaṅ secʼre tahẽkana. Ona reakʼ mitʼ secʼre do Paran, Tophel, Laban, Haserot ar Di-Sahab tahẽkana.

² Horeb khon Seyir buru reakʼ horte Kadesh hạbicʼ calakʼ do gelmitʼ din hạbicʼ lagaokʼa.

³ Israelko reaṅ Mose okakoe hukumade tahẽkan ona do onkoakʼ dãṛãn horre pongel bochor reakʼ gelmitʼ cando reakʼ pạhil hilokʼ Probhu Isor do onko ṭhene sodorleda.

⁴ Amorikoren raj Sihon ar Edreyi nagraha reakʼ Bason disạmren raj Og bhagaokin tayom uni do onae sodorleda. Sihon do Hesbonre ar Og do Astarotreye rajokʼkan tahẽkana.

⁵ Mose do Israelko jordan gaḍae paromketʼko tayom Moab disạmre ạn-ạri reakʼ noako katha galmaraoakoe ehopʼena. Uni doe metatʼkoa,

⁶ “Aboren Probhu Isor do Horeb burureye metatʼbon tahẽkana, ‘noa burure ape do aema dinpe khemaokeda.

⁷ Ńitokʼ do ḍera uṭhạukate Amorikoakʼ buru ṭoṭha ar ona aḍepase jaegaren hoṛko ṭhen calakʼpe. Onko do Arabare, usul burure, latar burure, Negebre ar doreão aṛereko girobasokʼ kana. Noako jaega do hoyokʼ kana Kananikoakʼ disạm Lebanon secʼte maraṅ gaḍa phurạt hạbicʼ sanam jaegakoge.

⁸ Ńelpe, onako jaega doń emakawatʼpea. Iń Probhu Isor do aperen hapṛam Abraham, Isahak, Jakob ar onko tayom do onkoren bõsko oka disạm emako lạgitʼ iń kiriạlen onḍe senkate ape do ona disạm ạidạri joṅpe.’

Mose do mukhiyạkoe bahaletʼko

⁹ “Un jokhecʼ iń do apeń metatʼpe tahẽkana, ‘iń eskarte gokʼ ghõṛakate idipe do ohoń daṛelea.

¹⁰ Aperen Probhu Isor do nunạkʼe saṅge ocoakatʼpea je, teheń ape do sermaren ipil lekape saṅge akana.

¹¹ Aperen hapṛamkoren Probhu Isor do arhõ hajar doboṛe saṅge ocopema ar acʼakʼ gokʼakʼ lekageye bhorape ma.

¹² Menkhan iń eskar do cekate apeakʼ bojha doń gokʼ sambṛao daṛeatapea?

¹³ Ape do apeakʼ gusṭiko khon ạkilanko, bujhạntar hoṛko, namḍak hoṛko bachaokope; jemon onko cetanre ńel todarot reakʼ bhariń em daṛeakʼ.’

¹⁴ “Unrepe roṛ ruạṛạdiń tahẽkana, ‘am okam menetʼkan onage bhage hoyokʼa.’

¹⁵ Ona iạte aperen gusṭiko khon ạkilanko, bujhạntar hoṛko, namḍak hoṛko hataokate ape cetanre, hajarko cetanre, saeko cetanre, mõṛẽgelko cetanre, gelko cetanre mathako ar judạ judạ kạmiyạkoń bahalketʼkoa.

¹⁶ Noko bikʼcạrko unreń metatʼko tahẽkana, ‘aperen boehako reakʼ ańjomtakope ar ona leka bicạr chinḍạukatakope baṅ do Israel boehako tala reakʼ jhogṛage baṅ do upriạko tala reakʼ jhogṛakange.

¹⁷ Ar bicạrre okoeyakʼ mẽtʼãhã hõ alope beṅgetʼakʼa ar kạṭicʼ lạṭu sanamkoakʼ kathape ańjomtakoa. Bicạr reakʼ kạmi do Isorakʼkangea; onate okoe manwage alope botorakoa. Ar jãhãṭakʼ bicạr kuṭhingepe bujhạu khan ona do iń ṭhenpe ạguiya, ar iń do onań bicạr chinḍạukatakoa.

¹⁸ Ape okaṭakʼ cekae hoyokʼtape unre ona hoń lạiyatʼpe tahẽkana.

Disạm cikʼyạ hoṛko kol ocokʼkan

¹⁹ “Inạ tayom aboren Probhu Isorakʼ hukumte abo do Horeb buru bạgikate Amorikoakʼ buru ṭoṭha secʼ bon mohnḍa idiyena. Tinạkʼ maraṅ ar tinạkʼ botoranakʼ hahaṅkar talatebon calaolen ona dope ńelakada. Nonkate abo do Kadesre senkate bon seṭerena.

²⁰ Ona tayom apeń metatʼpea, ‘abo do Amorikoakʼ buru ṭoṭhate bon seṭerakana; noa do aboren Probhu Isore emabon lạgitʼ.

²¹ Ar ńelpe, aperen Probhu Isor emakʼ goṭa disạmge ape samaṅre menakʼa. Aperen hapṛamkoren Probhu Isorakʼ katha leka senkate ape do disạm dokhol joṅpe. Ar alope botorokʼa, ar alope as chuṭạukʼa.’

²² “Unre ape do hecʼkatepe metadińạ, ‘disạm ciyạ lạgitʼ thoṛa hoṛ baṛe lahare kolkom, jemon onko do disạmko ńel ạguiyteko lại daṛeabon oka horte bon calakʼa ar okako nagraha abo samaṅre paṛaokʼa mente.’

²³ “Unre apeakʼ katha do bhagegeń bujhạukeda. Onate aperen mimitʼ gusṭiko khon mitʼ hoṛkate jotote gelbar hoṛiń bachaoketʼkoa.

²⁴ Onko do ape bạgikate ona buru ṭoṭhateko rakapʼ calaoena ar Eskol buru otet hạbicʼ mońjteko ńel ạgukeda.

²⁵ Ar ona disạm reakʼ thoṛa jo hõ ạgu darakateko menkeda, ‘aboren Probhu Isor okaṭakʼ disạme emabon lạgitʼdokʼkan ona do sạrige napaegea.’

²⁶ “Menkhan ape do ona disạmte calakʼ bape rebenlena. Ape do aperen Probhu Isorakʼ hukum upạrtepe teṅgoyena.

²⁷ Ape do apeakʼ tạmbukorepe hulkeda arpe menkeda, ‘Probhu Isor do aleye kurudale kana. Ona iạte uni do Amorikoakʼ tire jimạkate maraole lạgitʼ Misor disạm khone oḍok ạguakatʼlea.

²⁸ Abo do cekate onḍebo calakʼa? Aboren boehage coṅ aboakʼ mon mako bạṛicʼ akatʼtabon. Onkoko meneda, onḍenko hoṛ do abo khonko daṛeangea arko maraṅgea; onkoakʼ nagrahako hõ maraṅgetakoa ar beṛhaete pạcri hõ usulgetakoa. Onḍe do Anakren hopon hõko ńelketʼkoa.’

²⁹ “Ona ańjomkate apeń metatʼpea, ‘alope botorokʼa, ar onko hoṛ hõ alope botorakoa.

^30-31 Aperen Isor Probhu Isorge ape laha lahateye calakʼa. Uni do ape mẽtʼãhã samaṅre Misor disạm ar hahaṅkarre cetʼleka ape secʼ hoykateye lạṛhạilen ńitokʼ hõ onkageye kạmiya. Arpe ńeletʼkangea, apat jemon hopon ghõṛakateye idiye onkage noa jaegare ạuripe seṭerokʼ hạbicʼ aperen Probhu Isor do goṭa hore ghõṛa ạgu akatʼpea.’

³² Enhõ ape do aperen Probhu Isor cetanre bape bhorsalena.

³³ Unige coṅ ḍera ṭhạ̃i ṭhik lạgitʼ ar hor udukʼ idiape lạgitʼ ńindạ do seṅgel khunṭire ar siń do rimil khunṭire tahẽkate apeye ạyur idiyetʼpe tahẽkana.

Israelko sạjạiko reakʼ

^34-36 “Apeakʼ katha ańjomkate Probhu Isor do edrete kiriạkateye menleda, ‘okaṭakʼ disạm aperen hapṛamko emako lạgitʼ iń gokʼatʼko tahẽkan eken Jephun hopon Kaleb chaḍa ar nonḍe bedhorom hoṛko modren mitʼhoṛ hõ ona do bako ńela. Eken Kaleb eskargeye ńela. Uni do purạte Probhu Isorakʼ katha lekae calakʼkante onae ńela ar onḍe okareye dãṛã ạguakatʼ onage iń do uni ar uniren bõskoń emakoa.’

³⁷ “Ape iạte Probhu Isor hõ iń cetanre bekusi iạteye men akada, ‘ona disạmre amhõ bam bolo ńama,

³⁸ menkhan amren gokʼṛoyicʼ Nun hopon Josuạ doe bolokʼa. Am do Josuạ udgạu emaeme, ente unige disạm doe dokhola ar Israelko ạidạri lekateye emakoa.

³⁹ Ar okoeko gidrạko reaṅpe menletʼ baṅma bondikateko idikotapea onko gidrạko, okoe do boge bạṛicʼ papacnao reakʼ akel baṅ hoyakantako, onkoge ona disạmteko bolokʼa. Disạm do onkogeń emakoa ar onko do onako dokhol joṅa.

⁴⁰ Ńitokʼ ape do tayom secʼ ạcurkate Akaba doreão reakʼ horte hahaṅkar secʼ monhḍakʼpe.’

⁴¹ “Niạ katha ańjomkate apepe menleda, ‘ale do Probhu Isor birudtele kại akada. Ńitokʼ ale do aboren Probhu Isorakʼ hukum lekagele lạṛhạiya.’ Ar niạ menkate jotoge lạṛhại reakʼ khanḍa bhanḍape horokʼana. Arpe hudiskeda buru ṭoṭha secʼte rakapʼ calakʼ do algagea mente.

⁴² “Menkhan Probhu Isor do ińe metadińạ, ‘onkom metakoa lạṛhại lạgitʼ jemon onḍe aloko rakapʼ calakʼ ente iń do onko sãote bạń tahena; onate onko do bạiri ṭhenko bhagao ocokʼa.

⁴³ “Iń do onako kathageń baḍae ocoletʼpea menkhan bape luturatʼtińạ. Ape do Probhu Isor upạrte senkatepe phulạuena ar buru ṭoṭhatepe rakapʼ calaoena.

⁴⁴ Ona ńelte okoe Amoriko ona burureko girobasokʼkan tahẽkan onko do ape upạrte lạṛhại lạgitʼko oḍok hecʼena. Ar mitʼ jhãk dumur leka apeko lagaketʼpea ar Seir reakʼ Horma nagraha hạbicʼko tuṛ idiketʼpea.

⁴⁵ Ar ruạṛ hecʼkate Probhu Isor ṭhenpe rakʼkeda, menkhan uni do apeakʼ rakʼjoṅakʼ bae ańjomletʼtapea; luture bondketʼtaea.

⁴⁶ Nonkate ape do Kadesre ḍher dinpe tahẽyena ar onḍege ḍher dinpe khemaokeda.