Bikʼcạrko 1 - সান্তালী বাইবেল

Sarecʼ Kananren sãote lạṛhại

¹ Josuạwakʼ gujukʼ tayom Israelko do Probhu Isorko kulikedea, “Kananrenko sãote lạṛhại lạgitʼ pạhilte do okoeye calakʼtalea?”

² Probhu Isor do roṛ ruạṛatʼkoteye metatʼkoa, “Pạhilre Jihudạ gusṭiren hoṛko oḍok calakʼma; onkoakʼ tirege disạm doń jimạ akada.”

³ Noa katha ańjomkate Jihudạ gusṭiren hoṛko do Simeon gusṭiren hoṛkoko metatʼkoa, “Okako jaega aleakʼ hạṭińre paṛao akan onḍenko Kananiko upạrte lạṛhại lạgitʼ ale sãote dela hijukʼpe, ar ale hõ apeakʼ jaega hat lạgitʼ ape sãotele calakʼa.” Onate Simeon gusṭiren hoṛko do onko sãoteko oḍok senena.

⁴ Ar Probhu Isor do Jihudạ gusṭiren hoṛkoakʼ tire Kananrenko ar Pherisikoe jimạkatʼkoa. Onkoren gel hajar hoṛ do Besek nagrahareko gocʼ ocoyena.

⁵ Onḍe onko do Adoni-Besekko ńamkedea ar uni sãoteko lạṛhạiyena ar onko do Kanani ar Pherisikoko bhagaoketʼkoa.

⁶ Adoni-Besek tinreye dạṛ pharakokʼkan tahẽkana unre onko do uniko khudạu tiyokʼkedete uniyakʼ ti ar jaṅga reakʼ buḍhạ kạṭupʼko samakʼketʼtaea.

⁷ Onate Adoni-Beseke menkeda, “Iń do eaegel rapajkoakʼ ti ar jaṅga reakʼ buḍhạ kạṭupʼ iń samakʼ kuṭrạletʼtakoa. Onko do ińakʼ ṭebil latar reakʼ ạiṭhạwakʼko halaṅ jometʼ tahẽkana. Onko cetanre okań cekaletʼ Isor hõ iń cetanre onkageye kạmi akada.” Ar Adoni-Besek do Jerusalemteko idikede khan onḍeye gocʼena.

⁸ Jihudạ-gusṭiren hoṛko do Jerusalem upạrteko lạṛhạiyena ar onako hatkeda. Onko do nagraharen hoṛko gocʼketʼkote nagrahare seṅgelko jeretʼada.

⁹ Inạ tayom onko do cetan buru ṭoṭha, Negeb ar latar buru ṭoṭharen Kananiko upạrte lạṛhại lạgitʼko oḍok calaoena.

¹⁰ Ar Hebronren Kananiko birudteko lạṛhại idiyente onko do Sesae, Ahiman ar Talmaeko bhagaokedea. Hebron reakʼ lahateakʼ ńutum do Kiriạt-Abra tahẽkana.

¹¹ Onḍe khon onko do Debir nagraharen hoṛko birudteko laha idiyena. Debir reakʼ ńutum do Kiriạt-Sepher tahẽkana.

¹² Kalebe menkeda, “Jãhãege Kiriạt-Sephere hat, uni sãotege ińren hoponera Aksa doń baplakaea.”

¹³ Niạ katha ańjomkate Kaleb bokot Kenas hopon Othniyel do onae hatkeda. Onate Kaleb do Othniyel sãote acʼren hoponerae baplakadea.

¹⁴ Aksa do Othniel ṭhene senen khan apattetʼ ṭhen khon mitʼṭecʼ jumi koeye lạgitʼe uskurkedea. Ar gadha khon Aksae pheḍen khan Kaleb do uniye kulikedea, “E biṭi cetʼem khojkana?”

¹⁵ Aksae menkeda, “E ba, ińakʼ mitʼṭecʼ katha dohoyme. Am do Negebre jaegam emakawạdińa onate onḍenakʼ dakʼ jharnako hõ imạńme.” Noa katha ańjomkate Kaleb do onḍenakʼ usul ar latar jaegako reakʼ dakʼ jharnako hõe emadea.

¹⁶ Mose hońhartetʼren hoponko, okoe do Kanani jạtrenko tahẽkan, onko do khijur-nagraha khon oḍok hecʼkate Arad ṭoṭha reakʼ dạkhin Jihudạ gusṭirenkoakʼ hahaṅkar ṭoṭhateko calaoena ar onḍenko hoṛ sãote girobasokʼko ehopʼena.

¹⁷ Jihudạ gusṭiren hoṛko do onkoren boeha Simeon gusṭiren hoṛko soṅgekate Sephat nagraharen Kananikoko akromonketʼkoa ar onkoakʼ nagrahako marao utạrkeda. Ona iạte nagraha reakʼ ńutum do Hormako dohokeda (metakʼme “Ḍahao maraokʼ ”).

¹⁸ Jihudạ gusṭiren hoṛko do Gasa, Askelon ar Ekron nagraha ar onako aḍepase reakʼ jaegako hatkeda.

¹⁹ Probhu Isor do Jihudạ gusṭiren hoṛko sãoteye tahẽkana. Onko do buru ṭoṭhakoko hatletʼgea, menkhan bilạn ṭạnḍiren hoṛko do bako laga ńir daṛeatʼkoa, ente onkoakʼ do mẽṛhẽtʼ reakʼ rãt gạḍiko tahẽkantakoa.

²⁰ Moseyakʼ gokʼakʼ lekate Kaleb do Hebron nagrahae em ocolena. Kaleb do Anakren pea hopon Hebron khone laga ńirletʼkoa.

²¹ Menkhan Benjạmin gusṭiren hoṛko do Jerusalemre girobasokʼ kan Jebusiko bako laga oḍok daṛeatʼko tahẽkana. Onate teheń hạbicʼ Jebusiko do Benjạmin gusṭirenko sãote onḍeko girobasokʼkana.

²² Josephren hoponko do Bethel nagraha hat lạgitʼko calaoena. Ar Probhu Isor do onko sãoteye tahẽkana.

²³ Onko do nagraha mońjteko ńel ạguketʼ tayom onḍe thoṛagan hoṛko kolkatʼkoa. Bethel reakʼ laha ńutum do Lus tahẽkana.

²⁴ Onko hoṛ do nagraha khon mitʼ hoṛ oḍok hijukʼkanko ńelkede khan uniko kulikedea, “Nagraha bolokʼ hor udukʼaleme, ale do amakʼ jãhãnakʼ bale lokshan tama.”

²⁵ Unre uni hoṛ do hore udukʼatʼkoa ar onko do senkate nagraharen sanam hoṛko gocʼketʼkoa, menkhan uni hoṛ ar uni bõsren doko aṛakʼkatʼkoa.

²⁶ Inạ tayom uni hoṛ do Hitikoakʼ disạmte senkate mitʼṭecʼ nagrahae benaokeda ar ona reakʼ ńutum do Luse dohokeda. Teheń hạbicʼ ona nagraha reakʼ ńutum do inạge menakʼa.

²⁷ Manase gusṭiren hoṛko do Bet-Sean, Tanak, Dor, Ibleam ar Megido nagraha ar onako beṛhaeteakʼ atokoren hoṛko bako laga ńir daṛeatʼkoa, ente onako jaegaren Kananiko doko goṭa akatʼ tahẽkana, disạm do bako bạgiyakʼa mente.

²⁸ Israelko tinreko daṛe idiyena unre onko hoṛ do akoren golamko hoe ocoketʼkoa menkhan bako laga ńir utạrletʼkoa.

²⁹ Ephrayim gusṭiren hoṛko hõ Geser khon Kananiko bako laga oḍokletʼkoa. Kananiko do onḍe onko talaregeko tahẽyena.

³⁰ Sebulon gusṭiren hoṛko hõ Kiṭron ar Mahalol khon Kananiko bako laga oḍokletʼkoa. Onate onko talaregeko tahẽyena, menkhan Sebulon gusṭiren hoṛko do akoren golamko hoe ocoketʼkoa.

³¹ Aser gusṭiren hoṛko hõ Akkor, Sidon, Ahiạb, Aksib, Helba, Aphik ar Rehobren hoṛko bako laga oḍokletʼkoa.

³² Onate disạmren Kananiko talarege girobasokʼko ehopʼena, ente onko do bako laga oḍokletʼkoa.

³³ Napthali gusṭiren hoṛko hõ Bet-semes ar Bet-anatren hoṛko bako laga oḍokletʼkoa menkhan akoren golamko hoe ocoketʼkoa.

³⁴ Amoriko do Dan gusṭiren hoṛko buru ṭoṭhareko aṭok dohoketʼkoa; bilạn ṭạnḍite do bako pheḍ ocowatʼkoa.

³⁵ Amoriko do Har-heserre, Ajalonre ar Sa-albinre tahengeko goṭa uricʼkeda; menkhan Joseph bõsren hoṛkoakʼ daṛe tinre ḍher idiyena unre onko do Amoriko akoren golamko hoe ocoketʼkoa.

³⁶ Amorikoakʼ simạna do Akrabimte rakapʼ calakʼ hor reakʼ Sela khon cetan hạbicʼ rakapʼ calaoena.