Amos 1 - সান্তালী বাইবেল

¹ Tekoaren gukʼpiko modre Amos hõ mitʼhoṛe tahẽkana. Unre Jihudạren raj do Usiạ ar Israelren raj do Joasren hopon Jerobiame tahẽkana. Dhạrti laṛaokʼ bar bochor lahare Israel babotre Isor okae udukʼade tahẽkan onage Amos doe lại jạhirleda.

Israel beṛhaeten jạtrenkoakʼ bicạr

² Amose menkeda, “Probhu Isor do Sion khone hạnḍrạukʼkana ar Jerusalem khon do acʼakʼ ãṭ aṛaṅe ańjom ocoyeda. Onate gukʼpikoakʼ ạtiń ṭạnḍiko do ṭonḍaṅokʼ kana ar Karmel buru muthni reakʼ dareko do gujukʼkana.”

³ Probhu Isore meneda, “Damesek reakʼ pea ghạṭ iạte, hẽ, ponea ghạṭ iạte iń do khạṭige onkoń sạjạikoa, ente mẽṛhẽtʼ reakʼ jạnumanakʼ enokʼ paṭate onko do Gileadko en akadea.

⁴ Ona iạte iń do Hasael reakʼ raj oṛakʼ cetanre seṅgeliń kola; ona do Benhadadakʼ gaṛkoe joma.

⁵ Iń do Damesek reakʼ huṛkạṛ koń rạputʼ giḍikakʼa; ar Awen reakʼ lodamre hoṛko ar Beth-Edenre okoeṭakʼ hoṛ do raj ṭheṅgae sapʼakatʼ uni doń marao giḍikaea. Ar Aramren hoṛ do bondikate Kirteko idi ocokʼa.”

⁶ Probhu Isore meneda, “Gasa reakʼ pea ghạṭ iạte, hẽ, ponea ghạṭ iạte iń do khạṭige onkoń sạjạikoa, ente onko sanam hoṛ do bondikate Edomakʼ tireko jimạ ocoakana.

⁷ Ona iạte iń do Gasa reakʼ pạcri bhit upạrte seṅgeliń kola; ona do uniyakʼ gaṛkoe jomtaea.

⁸ Iń do Asdosren hoṛkoakʼ ar Askelonre okoeṭakʼ hoṛ raj ṭheṅgae sapʼakatʼ uniń marao utạrea. Iń do Ekron upạrte ińakʼ tiyiń tiyạrtińạ, onate Philisṭiren sarecʼ hoṛ doko gujukʼa.”

⁹ Probhu Isore meneda, “Tur reakʼ pea ghạṭ iạte, hẽ, ponea ghạṭ iạte iń do khạṭige onkoń sạjạikoa, ente boeha tulucʼ boehawakʼ bondobos nihạ̃t giḍikate onko do adom atoren sanam hoṛ bondikate Edomakʼ tireko jimạ akatʼkoa.

¹⁰ Ona iạte iń do Tur reakʼ bhit upạrte seṅgeliń kola; ona do uniyakʼ gaṛkoe joma.”

¹¹ Probhu Isore meneda, “Edom reakʼ pea ghạṭ iạte, hẽ, ponea ghạṭ iạte iń do khạṭige onkoń sạjạikoa, ente sanam daya mãyã bạgikate uni do tarwaṛeante acʼren boehako khudạu akadea. Ona chaḍa botoranakʼ edre do onkore ńelokʼkangea ar onako dohoakada.

¹² Onate iń do Teman upạrte seṅgeliń kola; ona do Bosrawakʼ gaṛkoe joma.”

¹³ Probhu Isore meneda, “Amon reakʼ pea ghạṭ iạte, hẽ ponea ghạṭ iạte iń do khạṭige onkoń sạjạikoa, ente simạna baṛhaotako lạgitʼ onko do Gileadren bhạrti hoṛmo maejiukoakʼ lacʼko cirạ akatʼtakoa.

¹⁴ Ona lạṛhại dinre botoranakʼ birbão hoe leka lạṛhại talare iń do Rahab reakʼ bhit upạrte seṅgeliń kola; ar ona do uniyakʼ gaṛkoe joma.

¹⁵ Uniren raj ar uniren disạm cakʼlaoko do mitʼ sãote bondikateko idi ocokʼa.”