3 Johan 1 - সান্তালী বাইবেল

¹ Isorakʼ sạriyakʼtetʼ iạte okoeyiń dulạṛ edekan, ińren uni dulạṛiạ gate Gạius ṭhen iń murubbi do noa ciṭhiń oleda.

² Dulạṛiạ gate, koejoṅreń disạyetʼmea jemon amakʼ jotowakʼge mońjte calakʼkan ar Jiu secʼ lekate cetʼlekam calakʼkan onkage jemon amakʼ hoṛmo hõ mońj tahentam.

³ Iń do ạḍitetʼ iń rạskạyena ente adom biswạsi boehako hecʼkate am reaṅ noa gohako emkeda je, am do Isorakʼ sạriyakʼre pạtiạr menama ar ona lekam taṛameda.

⁴ Ińren gidrạko je Isorakʼ sạriyakʼ horteko taṛametʼkan, noa khon bạ̃ṛti maraṅ rạskạ do ińre ar bạnukʼanaṅ.

⁵ Dulạṛiạ gate, am do begor oromte hõ biswạsi boehako lạgitʼ okaṭakʼem cekayetʼ ona do pạtiạrtegem onkayeda.

⁶ Onko do manḍerre sanamko samaṅre amakʼ dulạṛ reakʼ kathako roṛeda. Ar Isor jemone kusikʼ onkaleka onko calakʼ reaṅem bebosta ako khan boge hoykokʼa.

⁷ Onko do Mạsi lạgitʼgeko oḍok hecʼakana ar bepạtiạuko ṭhen khon cetʼge bako hatao akada.

⁸ Onate nonkan hoṛ goṛowako do lek tabona, jemon Isorakʼ sạriyakʼ lạgitʼ abo hõ onkoakʼ kạmire são kạmiyạko bon hoyokʼ.

⁹ Iń do manḍerrenko ṭhen mitʼṭecʼ ciṭhiń olleda, menkhan Diotrephes do manḍerren mukhiyạ hoyokʼe menetʼte aleakʼ katha do bae moneyakʼ kana.

¹⁰ Onate uni okaṭakʼe cekayetʼ ona do iń hecʼ tayom sanamkoń baḍae ocokoa. Uni do ale upạrte hiskạte aema eṛe kathae roṛakada. Onate hõ bae suklente boehako hõ bae ataṅetʼkoa ar okoe onkoko ataṅetʼko onko hõe tạkicʼ darametʼkoa ar manḍer khone oḍoketʼkoa.

¹¹ Dulạṛiạ gateko, bạṛicʼakʼko pańja baṅkate bickom bhageakʼ pańjaepe. Okoe bhageakʼe kạmikan uni doe Isorren hoṛ kana, ar okoe bạṛicʼakʼe kạmikan uni do Isor bae ńelakadea.

¹² Sanamkoge Demetriusko sarhaoede kana, ar Isorakʼ sạriyakʼtetʼ hõe onkawae kana. Ale hõ unile sarhaoede kana. Am dom baḍaegea ale okaṭakʼle lại ona do sạrigea mente.

¹³ Aema katha olam reakʼ menakʼtińạ, menkhan kạli ar kolomte ona olam do bạń monejoṅ kana.

¹⁴ Asokʼ kạnạń usạrageń ńapam mea, ar unre samna sạmni laṅ galmaraoa.

¹⁵ Suluk am ma. Amren gatekoko joharam kana. Onḍenko gateko do aleakʼ judạ judạ johar baṛe emakom.