2 Rapajko 1 - সান্তালী বাইবেল

Eliạ nạbi ar Ahab raj

¹ Ahabe gocʼen tayom Moab disạmrenko do Israel upạrteko hulkeda.

² Ahasiạ do Samariạre acʼakʼ oṛakʼ cetan kandha reakʼ jalna khone ńuren iạteye ghạllena. Unre uni do mitʼbar hoṛ kolkate noa kathae roṛgotʼkada, “Ape do Ekronren debota Bakʼal-sebub ṭhen senkate kulijoṅpe, iń do niạ ghạl khoniń boge ruạṛokʼa se baṅa.”

³ Menkhan Probhu Isorren goḍet do Tisberen Eliại metadea, “Am do senkate Samariạren raje kol akatʼko hoṛko sãote ńapamkatem metakoa, ‘Israelre Isor do cetʼ bạnuiya, onate Ekronren debota Bakʼal-sebub ṭhen kulijoṅpe calakʼ kana?

⁴ Ona iạte Probhu Isore meneda, okaṭakʼ aṭetʼrem giticʼ akan ona khon do ar bam beretʼ ruạṛ daṛeakʼa. Am do khạṭigem gujukʼa.’ ” Niạ menkate Eliạ doe calaoena.

⁵ Ado onko hoṛ do raj ṭhenko ruạṛ hecʼen khan uni doe kuliketʼkoa, “Cedakʼpe ruạṛ hecʼena?”

⁶ Onkoko roṛ ruạṛkeda, “Mitʼṭen hoṛ do ale sãote ńapamkateye metatʼlea, ‘okoe aleye kol akatʼle uni raj ṭhen ruạṛ senkate jemonle metae, Probhu Isore meneda, ‘Israelre Isor do cetʼ bạnuiya, onate am do Ekronren debota Bakʼal-sebub ṭhen kulijoṅ lạgitʼ hoṛem koletʼkoa? Onate am okaṭakʼ aṭetʼrem giticʼ akan ona khon do ar bam beretʼ ruạṛ daṛeakʼa. Am do khạṭigem gujukʼa.’ ”

⁷ Raj do onkoe kuliketʼkoa, “Okoeṭakʼ hoṛ ape sãoteye ńapamen ar niạ kathae metatʼpe uni do ńelokʼte cetʼ lekan hoṛ kanae?”

⁸ Onkoko roṛ ruạṛadea, “Uniyakʼ hoṛmo do upʼte perecʼ ar ḍanḍare do harta reakʼ totolakʼ menakʼtaea.” Raje menkeda, “Uni do Tisberen Eliạ kanae.”

⁹ Inạ tayom raj do mitʼṭen subedar ar uniren mõṛẽgel lạṛhại phạdko Eliạ ṭhene kolkatʼkoa. Unre Eliạ do mitʼṭecʼ burureye duṛupʼ akan tahẽkana. Ar uni subedar do Eliạ ṭhen rakapʼ senkateye menkeda, “E Isorren hoṛ, raj do pheḍ hijukʼe metamkana.”

¹⁰ Eliạ do roṛ ruạṛketʼte subedare metadea, “Isorren hoṛ kan khaniń enḍekhan serma khon seṅgel ńurokʼte am ar amren mõṛẽgel lạṛhại phạdko jemone ḍahao maraoko.” Unre serma khon seṅgel ńurente uni subedar ar uniren mõṛẽgel lạṛhại phạdkoe ḍahao maraoketʼkoa.

¹¹ Niạ katha ańjomkate raj do eṭagicʼ subedar ar uniren mõṛẽgel lạṛhại phạdko Eliạ ṭhene kolketʼkoa. Uni subedar do Eliại metadea, “E Isorren hoṛ, raj do ńitge pheḍ hijukʼe metamkana.”

¹² Eliại menkeda, “Isorren hoṛ kan khaniń enḍekhan serma khon seṅgel ńurokʼte am ar amren mõṛẽgel lạṛhại phạdko jemone ḍahao maraoko.” Unre serma khon Isorakʼ seṅgel ńurente uni ar uniren mõṛẽgel lạṛhại phạdkoe ḍahao maraoketʼkoa.

¹³ Inạ tayom raj do armitʼṭen subedar ar uniren mõṛẽgel lạṛhại phạdkoe kolketʼkoa. Ar nui tesaricʼ subedar do cetante rakapʼkate Eliạ samaṅre ikhṛumente nehõrkateye menkeda, “E Isorren hoṛ, dayakate iń ar amren mõṛẽgel gutikoakʼ jiwi baṛe rukhiyại taleme.

¹⁴ Ńelme, serma khon seṅgel ńurente lahaten banar subedar ar onkoren sanam lạṛhại phạdkoko ḍahao maraoena. Menkhan niạ dhao do ińakʼ jiwi rukhiyạitiń me.”

¹⁵ Unre Probhu Isorren goḍet do Eliại metadea, “Uni sãote pheḍ calakʼme, ar alom botoraea.” Onate Eliạ do uni sãote pheḍkate raj ṭhene senena.

¹⁶ Uni do raje metadea, “Probhu Isor do niạ kathae meneda, ‘Israelre cetʼ Isor do bạnuiya, onate Ekronren deboda Bakʼal-sebub ṭhen kulijoṅ lạgitʼ hoṛem kolletʼkoa? Ar noam kạmi akatʼte am do aṭetʼ khon ar bam beretʼ ruạṛ daṛeakʼa. Khạṭigem gujukʼa.’ ”

¹⁷ Eliạ hotete Probhu Isor okaṭakʼ kathae roṛketʼ ona lekage Ahasiạ doe gocʼena. Ahasiạren do cele hoponge bako tahẽkante uniyakʼ jaegare Jehorame rajena. Jihudạren raj Jehosaphatren hopon Jehoramakʼ rajokʼ dosar bochorre uni do raje hoylena.

¹⁸ Ahasiạwakʼ eṭakʼ eṭakʼ sanam kạmi reakʼ katha do, “Israelren rapajkoakʼ Itihãs” ńutumanakʼ puthire ol menakʼa.