2 Johan 1 - সান্তালী বাইবেল

¹ Isor okoeye bachao akade uni maejiu ar uniren hoponko ṭhen iń murubbi do noa ciṭhiń oletʼkana. Isorakʼ sạriạkʼtetʼ iạte iń do ape sanamkoń dulạṛetʼpea. Eken ińiń dulạṛetʼpea ona do baṅ, menkhan okoe Isorakʼ sạriyakʼtetʼko baḍae oromakatʼ onko sanamkoge apeko dulạṛetʼpea.

² Oka sạriyakʼtetʼ aboakʼ ontorre menakʼ ar jaejug hạbicʼ abo tulucʼ tahenkan ona sạriyakʼtetʼ iạtege ale do apele dulạṛetʼpea.

³ Isor Baba ar uniren Hopon Jisu Mạsi ṭhen khon sạriyakʼ ar dulạṛte daya, mãyã ar sulukge abo tulucʼ tahenma.

Sạriyakʼ ar dulạṛ reaṅ

⁴ Baba okaṭakʼe hukumakatʼ bon ona lekage amren adom gidrạko do Isorakʼ sạri horte calakʼiń ńeletʼkote ạḍiń rạskạkʼ kana.

⁵ Abo mimitʼko jemon bon dupulạṛ, noage am ṭhen ińakʼ nehõr do. E dulạṛiạ miseratiń, okań oletʼkan ona do jãhãn nãwã hukum do baṅkana, bickom noa hukum do pạhil khonge bon ńam akada.

⁶ Dulạṛ do hoyokʼ kana Isorakʼ hukum leka calakʼ. Pạhil khon okaṭakʼ hukum reakʼ kathape ańjom ạguakatʼ onkage ape do dulạṛ horte taṛam idipe.

⁷ Dhạrtire nonkan aema hoṛko oḍok akana okoe doko bukʼlạuko kan. Ente Jisu Mạsi manwa lekateye hecʼlen ona do bako aṅgoceda. Ar nonkan bulạukan hoṛge Mạsiren do bạiri kanako.

⁸ Ape do sontor akae tahenpe, jemon apepe kạmiakatʼ reakʼ kuṛại purạtepe ńam daṛeakʼ.

⁹ Okoe Mạsiyakʼ sikhnạtko taṛam parom ar ona sikhnạtre ṭarhao akae bako tahen, onkoakʼ ontorre Isor do bạnugicʼan. Menkhan okoe ona sikhnạtre ṭarhao akane tahenkan uniyakʼ ontorre do Baba ar Hopon bana hoṛge menakʼkinạ.

¹⁰ Ar jãhãe hoṛ ape ṭhen hecʼkate ona sikhnạt bae emokʼ enḍekhan apeakʼ oṛakʼre uni do alope ataṅ daramea ar johar hõ alope joharaea.

¹¹ Okoe uniye joharae uni do uniyakʼ bạṛicʼ kạmi reakʼ hõ bhạgiyạdare hoyokʼa.

¹² Ape olape lạgitʼ ińakʼ aema katha menakʼre hõ enhõ kagoc ar kạlite olape do bạń menjoṅ kana. Ona khon bickom ape ṭhen senkate mocate galmarao reakʼ iń asokʼ kana, jemon aboakʼ rạskạ purạukʼ tabon.

¹³ Isorren bachao akan miseramren gidrạko do amko joharam kana.