2 Bõsbudạ 1 - সান্তালী বাইবেল

Bud ar ạkil ńam lạgitʼ Solomonakʼ koejoṅ

¹ Dạudren hopon Solomon do acʼakʼ rajosṭi ạḍi kajakge acʼ tabereye dohokeda, ente uniren Probhu Isor do uni sãoteye tahẽkana ar ạḍiye maraṅkedea.

² Solomon do sanam Israelko, metakʼme hajar lạṛhại phạdkoren ar sae sae lạṛhại phạdkoren subedarko, bikʼcạrko ar Israelren sanam bõsren mukhiyạko jarwa mitʼko lạgitʼe hukumkeda.

³ Ona tayom uni ar sanam hoṛko do Gibiạn reakʼ ona than boṭkocʼ ṭhenko senena, ente Isorakʼ ńapamokʼ tạmbu do onḍege tahẽkana one okaṭakʼ do Probhu Isorren guti Mose hahaṅkarre tahẽkanreye benaoletʼ tahẽkan.

⁴ Menkhan Isorakʼ sinduk do Jerusalemre tahẽkana, ente Dạud do Kiriat-Jiạrim khon onae ạguketʼte Jerusalemre okaṭakʼ tạmbui beretʼletʼ onḍegeye dohokeda.

⁵ Menkhan Hurren goṛomtetʼ koṛa Urren hopon Botsolel do pitạl reakʼ okaṭakʼ pinḍe benao ocoletʼ tahẽkan ona do Gibiạnre Probhu Isorakʼ ḍera tạmbu samaṅre tahẽkana. Ona iạte Solomon ar sanam hoṛko do onḍeko senena.

⁶ Unre Solomon do ona pitạl reakʼ pinḍ ṭhen senkate Probhu Isor samaṅre ona cetanre mitʼ hajar janwarkote jeredokʼ samaṅokʼakʼ porobe hoyocokeda.

⁷ Ar enhilokʼ ńindạ Isor do Solomon ṭhene sodorenteye metadea, “Iń ṭhen okam khoj ona reakʼ jotowakʼge amiń emama.”

⁸ Solomon do Isorre roṛ ruạṛadea, “Am do ińren ạpuń Dạud cetanre asambheṛ dulạṛem udukʼ akada ar uniyakʼ jaegare ińem raj akadińạ.

⁹ E Probhu Isor, ińren ạpuń Dạud ṭhen okam gokʼ akatʼ ona baṛe ńitokʼ purạume, ente nonkan mitʼ jạtrenko cetanrem raj akadińạ okoe do dhạrtiren dhuṛi leka ohoko lekha caba daṛelen.

¹⁰ Iń do bud ar ạkil imạńme jemon ińakʼ dạyikiń purạu daṛeakʼ, ente amren noko maraṅ jạtrenko ḍanṭaoko reakʼ daṛe do okoeyakʼ menakʼa?”

¹¹ Unre Isor do Solomone metadea, “Amakʼ mon reakʼ sana do bhagegea. Am do dhon-durib, sonman se bạirikoakʼ gujukʼ hõ bam khoj akada, se ḍher dinem bahaokʼ reakʼ hõ bam khoj akada. Ona khon boroṅ amren okoe hoṛko cetanreń raj akatʼme onko ḍanṭaoko lạgitʼ bud ar ạkilgem khoj akada.

¹² Ona iạte am do bud ar ạkilem em ocoyena. Ona chaḍa iń do nonkan dhon-durib ar manotiń emama one am lahaten cele rajakʼge baṅ tahẽkan ar am tayom hõ baṅ tahentakoa.”

Solomon rajakʼ daṛe ar dhon-duribko

¹³ Inạ tayom Solomon do Gibiạn reakʼ than boṭkocʼre, okare ńapamokʼ tạmbu tahẽkan, onḍe khon uni do Jerusalemteye ruạṛ calaoena ar Israelko cetanre rajokʼe ehopʼena.

¹⁴ Solomon do ạḍi utạr rãt gạḍiko ar sadomkoe jogaṛketʼkoa. Onate uniyakʼ do mitʼ hajar ponsae rãt gạḍiko ar gelbar hajar sadomko hoyentaea. Ar noako rãt gạḍi do nagrahakore ar Jerusalemre acʼ ṭhene dohokeda.

¹⁵ Jerusalemre sona ar rupạ do dhiri lekae hoyocokeda ar debdạru kaṭko do latar buru ṭoṭha reakʼ loa dareko lekae hoyocokeda.

¹⁶ Solomonren sadomko do Misor ar Kilikiạ khonko ạguyetʼko tahẽkana. Rajren bạnij bepariko do Kilikiạ khonko kiriń ạguyetʼko tahẽkana.

¹⁷ Misor disạm khon ạguwakʼ mimitʼ rãt gạḍiko reakʼ dam do eae keji irạl sae gram rupạ ar mimitʼ goṭen sadomakʼ dam do eae keji irạl sae gram rupạ tahẽkana. Onko bepariko do Hittiko ar Aramren sanam rapajko ṭhenko ạkhrińetʼko tahẽkana.