2Timothi 1 - সান্তালী বাইবেল

¹ Mạsi Jisu hotete jaejug jion reakʼ gokʼakʼ lekate Isorakʼ monejoṅ leka iń Pạul do Mạsi Jisuren mitʼṭen apostoliń hoyakana.

² Noa ciṭhi iń do ińren dulạṛiạ hopon Timothi ṭheniń oleda. Isor Baba ar aboren Probhu Jisu Mạsi do daya, bhor ar suluke dan amma.

Biswạsi hoyokʼ reakʼ udgạu

³ Ińren hapṛamko cetʼleka Isorko sewawaekan tahẽkan onkage ińhõ sapha bibekte Isoriń sewawae kana; ar am lạgitʼ siń sạṭupʼ koejoṅ jokhecʼ iń do uniń sarhaoede kana.

⁴ Ar amakʼ mẽtʼ dakʼ disạkate am tulucʼ ńapamokʼ iń cuṭ cuṭokʼ kana, jemon ińakʼ mon rạskạte perejokʼtiń.

⁵ Amakʼ ontorre menakʼ sạri biswạs reakʼ katha hõ disạ menakʼ getińa. Ar noa biswạs do amren goṛom ayo Loisre ar amren eṅgam Eunikere girobas akankin tahẽkana, ar ińiń baḍaea, noa biswạs do amakʼ ontorre hõ menakʼgea.

⁶ Onate iń do arhõ noa kathań disạ ocoyetʼme kana, jemon ińakʼ tikin reakʼ capote amre menakʼ Isorakʼ daya danem salgao aroy.

⁷ Ente Isor do ḍurukiạ jiu do bae emakatʼbona; bickom nonkan jiugeye emakana, one unire do daṛe, dulạṛ ar apnar sambṛaokʼ reakʼ ektiạri menakʼ.

⁸ Onate aboren Probhu Isor reaṅ goha emokʼ do alom lajaokʼa, ar uni iạte hajotre minạń, onate hõ alom lajaokʼa. Ona bodolte Isor okaṭakʼ daṛeye emakatʼme ona daṛete uniyakʼ bhage sombat porcar lạgitʼ iń tulucʼ duk jomme.

⁹ Isorge aboakʼ kại khone bańcao akatʼ bona ar sonot jion khemao lạgitʼe hohoakatʼbona. Aboakʼ jãhãn kạmiko lạgitʼ do baṅ, bickom uniyakʼ monsubạ ar daya lạgitʼgeye kạmi akada. Dhạrti sirjạu laha khonge Mạsi Jisu hotete uni do acʼakʼ daya dane emakawatʼ bona,

¹⁰ Menkhan ńitokʼ aboren babańcaoicʼ Jisu Mạsi do noa dhạrtiteye hecʼente ona dayaye sodorakada. Mạsi do morone bhagao akada ar bhage sombat hotete bin maraokʼ jion reakʼ kathae sodorakada.

¹¹ Ar noa bhage sombat lạgitʼge uni do jạhiricʼ, apostol ar cecetʼicʼ menteye bahal akadińạ.

¹² Ar ona iạte noako dukiń jomakada; ar enrehõ bạń lajaokʼkana, enteń baḍaea okoereń bhorsa akana mente. Iń doń khạṭi akawana, uni ṭhen okań dohoakatʼ ona do Mạsiyakʼ hijukʼ din hạbicʼ rukhiyạ lạgitʼ daṛe menakʼtaea mente.

¹³ Iń ṭhen khon okam ańjomakatʼ ona sạriyakʼ reakʼ sikhnạt do nạmuna lekate sapʼ dohoyme; ar Mạsi Jisu tulucʼ jopoṛao iạte aboakʼ ontorre oka dulạṛ ar biswạs janam akan ona sapʼ dohojoṅme.

¹⁴ Isor okaṭakʼ rukhiyại lạgitʼe emakawatʼme ona horho dohoakae tahenme, okoe aboreye girobasokʼkan uni sonot Jiu hotete.

¹⁵ Noa dom baḍaegea, Ạsiạ disạmren sanamkoge ińko dea giḍiakadińa. Onko modre Phugelus ar Hermogenes hõ menakʼkinạ.

¹⁶ Onesiphoros gharońjrenko Probhu Isore mãyãwakoma; uni do ạḍi dhaogeye cerṭha ocoakadińa, ar ińakʼ hajot iạte bae lajaolena.

¹⁷ Romreye tahẽkanre uni do jidkateye sendra ńamledińạ.

¹⁸ Ephesusre okalekae sapʼ dapʼetʼ tahẽkan, ona do bes okocʼtem baḍaegea. Probhu Isore danae ma, jemon Mạsiyakʼ hijukʼ dinre Probhu Isor ṭhen khon mãyãe ńam.