1 Samuel 1 - সান্তালী বাইবেল

Samuelakʼ janam

¹ Ephrayim buru ṭoṭha reakʼ Ramathayim Sophim nagrahare Elkana ńutuman mitʼ hoṛ do Ephrayim gusṭiren hoṛko sãoteye girobasokʼ kan tahẽkana. Uniren apatakʼ ńutum do Jeroham tahẽkana. Jeroham do Elihuren hopone tahẽkana, Elihu do Tohuren hopon ar Tohu do Suphren hopone tahẽkana.

² Elkanaren do barea bạhukin tahẽkantaea; mitʼ hoṛakʼ ńutum do Hanna ar eṭagicʼakʼ ńutum do Peninna. Peninnaren do gidrạko hoylena menkhan Hannaren do cele gidrạge bako hoyakan tahẽkana.

³ Elkana do jao bochor acʼakʼ nagraha khon Siloteye calakʼkan tahẽkana. Uni do onḍe senkate sanam daṛeanicʼ Probhu Isor sewawae ar uni ńutumte janwarkoe samaṅetʼko tahẽkana. Unre onḍe do naeke Eliaserren banar hopon Probhu Isorren naeke kin tahẽkana. Unkinakʼ ńutum do Hopni ar Pinehas tahẽkana.

⁴ Janwar samaṅko hilokʼ Elkana ar uniren bạhu Peninna ar uniren sanam gidrạko do acʼakʼ samaṅakatʼ jel reakʼ mitʼṭecʼkate hĩse hạṭińako kan tahẽkana.

⁵ Menkhan Hanna do bar hạṭińe emaekan tahẽkana, ente uni do bạ̃ṛtiye dulạṛede tahẽkana. Menkhan Probhu Isor do Hannaye bạńhi ocoakade tahẽkana.

⁶ Probhu Isore nonka akatʼ tahẽkante uniren hirạmtetʼ do ạḍiye khijlạuede tahẽkana ar uniyakʼ monkoe haṛhatʼ ocoyetʼtae tahẽkana.

⁷ Ar nonkage bochorke bochor do parom calakʼkan tahẽkana. Hanna do jãhãtinrege Probhu Isorakʼ oṛakʼteye senokʼkan tahẽkan unrege uni do Peninna ṭhene khijlạu ocokʼkan tahẽkana. Onate uni doe rakʼetʼ tahẽkana ar cetʼge bae jom ńũiyetʼ tahẽkana.

⁸ Noa ńelte uniren jãwãe Elkana do uniye kulikedea, “E Hanna, cedakʼem rakʼeda? Ar cedakʼ cetʼge bam jom ńũiyeda? Nunạkʼ do cetʼ reakʼ duktam? Iń do cetʼ am ṭhen gel goṭen koṛako khon hõ bạń sorosa?”

⁹ Mitʼdin Hanna do Siloreye tahẽkanre jom ńũ baṛakateye beretʼena ar mundilteye boloyena. Unre naeke Eli do Probhu Isorakʼ oṛakʼ reakʼ duạr ṭhenakʼ mitʼṭecʼ mạcireye duṛupʼ akan tahẽkana.

¹⁰ Hanna do mon reakʼ kosṭote Probhu Isor ṭhen rakʼate koejoṅe ehopʼena.

¹¹ Ar Probhu Isor ṭhen manot dohokateye menkeda, “E sanam daṛeanicʼ Probhu Isor, amren kạ̃ṛmĩyakʼ mon reakʼ duk secʼ baṛe beṅgedme ar ańjomtińme. Ar iń bam hiṛiń akadińte amren kạ̃ṛmĩ jodi mitʼṭen hoponem danae enḍekhan jonom bhor uni do am ńutumteń emokʼa. Ar uniyakʼ bohokʼre tisge holatʼ do bạń lagaoakʼa.”

¹² Hanna do Probhu Isor ṭhen ạḍi ghạṛicʼe koejoṅkan tahẽkante Eli do uniye ạribạndhiyede tahẽkana.

¹³ Hanna do mone monteye koejoṅkan tahẽkante uniyakʼ luṭikin do laṛaokʼkantae tahẽkana menkhan aṛaṅ do baṅ ańjomokʼkan tahẽkana. Onate Eli hudiskeda maejiu doe bul akana.

¹⁴ Uni doe metadea, “Bubulakʼ ńũkate am do ar tinạkʼ ghaṛicʼem bul hapekokʼa. Bubulakʼ do ar alom ńũiya.”

¹⁵ Hanna doe roṛ ruạṛkeda, “E ińren Baba, ona do baṅa. Iń do mitʼṭen dukhi hoṛ kạnạń; iń do darkha rasa hõ bạń ńũ akada, ar bubulakʼ hõ bạń ńũ akada. Iń do Probhu Isor samaṅre ińakʼ ontorgeń duletʼtiń tahẽkana.

¹⁶ Amren kạ̃ṛmĩ do mitʼṭen bạṛicʼ maejiu mente do alom hudisea. Iń do ạḍi utạr mon duk ar kosṭo iạte nunhạbicʼ iń koejoṅkan tahẽkana.”

¹⁷ Unre Eliye menkeda, “Amakʼ jiwi baṛe raṛejokʼtam ma. Israelkoren Isor ṭhen okam khojakatʼ ona jemone emam.”

¹⁸ Hannae menkeda, “Nui kạ̃ṛmĩ cetanre amakʼ daya tahenma.” Ar niạ menkate uni doe calaoena are jom ńũkeda. Uniyakʼ monre ar jãhãn duk do baṅ tahẽlena.

¹⁹ Dosar hilokʼ setakʼ onko do beretʼkate mundilre senkate Probhu Isorko sewawadea. Ar ona tayom do akoakʼ oṛakʼ Ramoteko ruạṛ calaoena. Tayomte Elkana do acʼren bạhu Hanna ṭhene boloyena ar Probhu Isor hõ Hannae luturadea.

²⁰ Onate Hanna doe bhạrti hoṛmoyena ar okte purạuen khan mitʼṭen koṛa gidrại janamkedea. Ar Hanna doe menkeda, “Iń do Probhu Isor ṭhen khoniń koe hatao akawana,” Ar gidrạwakʼ ńutum do Samuele dohoketʼtaea.

Samuel do Probhu Isor ńutumteye dan ocokʼkan

²¹ Elkana do jao bochor leka arhõ acʼakʼ gharońjrenko soṅgekate Probhu Isor ńutumte samaṅokʼren janwar samaṅe ar manot doho akatʼakʼ purạu lạgitʼe senena,

²² menkhan Hanna do bae senlena. Uni do acʼren jãwãetetʼe metadea, “Gidrạ toa nunui bạgile khange iń do Probhu Isor samaṅreń idiyea jemon jonom bhor onḍegeye tahẽdaṛeakʼ.”

²³ Uniren jãwãe Elkana do uniye metadea, “Am okaṭakʼ bhagem hudisetʼ onage onkaeme. Ar gidrạ do nunu ạuriye bạgi hạbicʼ nonḍege tahenme. Probhu Isor do acʼakʼ gokʼakʼe purạuma.” Ar onate Hanna do oṛakʼregeye tahẽyena ar gidrạ nunu ạuriye bạgi hạbicʼe jotonkedea.

²⁴ Ado gidrạ toa nunui bạgiketʼ khan Hanna do pea ḍaṅgra, gel irạl keji holoṅ, harta reakʼ thulire mitʼ thuli darkha rasa ar gidrạ soṅgekate Silote Probhu Isorakʼ oṛakʼteye calaoena. Unre gidrạ do huḍińgeye tahẽkana.

²⁵ Onḍe onko do mitʼṭen ḍaṅgrako dãṛẽkedea ar gidrạ do Eli ṭhene idikedea.

²⁶ Hannae menkeda, “E baba, amge ińren goha dohokateń kiriạkʼ kana, iń kangeạń uni maejiu do one am samaṅre nonḍe teṅgokate Probhu Isor ṭheniń koejoṅkan tahẽkan.

²⁷ Iń do nui gidrạ ńame lạgitʼ iń koeleda, ar Probhu Isor ṭhen okań khojletʼ uni do onageye em akawạdińa.

²⁸ Ona iạte gidrạ do Probhu Isorgeń emadea. Ar tinạkʼ din jiwetʼe tahen unạkʼ din nui do Probhu Isorrene tahena.” Ar onko do bohokʼ kuḍburkate Probhu Isorko sewawadea.