1 Johan 1 - সান্তালী বাইবেল

Jion reakʼ katha

¹ Okoe pạhil khongeye tahẽkan, ar okoeyakʼ moca reakʼ kathale ańjom akatʼ, okoe nij mẽtʼtele ńel akade, okoe do mońj okocʼtele ạri bạndhi akade, okoe do nij titele joṭetʼ akade, ona jion reakʼ kathage nonḍeń oleda.

² Ona jion doe sodorlena. Ale do unile ńelakadea ar uni reaṅ gohale emeda. Okoe do Baba ṭhene tahẽkan ar ale ṭhene sodorlen ona jaejug jion reakʼ kathage apele baḍae ocoyetʼpea.

³ Okoe alele ńelakade ar okoeyakʼ moca reakʼ kathale ańjomakatʼ uni reaṅgele baḍae ocoyetʼpea. Ale do onale baḍae ocoyetʼpea jemon ape ar ale talare mitʼṭecʼ helmel benao rakabokʼ. Noa do hoyokʼ kana Baba ar uniren Hopon Jisu Mạsi ar abo tala reakʼ helmel.

⁴ Aleakʼ rạskạ jemon perejokʼ onate ale do noakole oleda.

Isorge marsaltetʼ

⁵ Okaṭakʼ katha Jisu Mạsi ṭhen khon ańjomkate apele baḍae ocoyetʼpe ona do noage, Isor doe marsal kana; ar unire ńut do bạnukʼanaṅ.

⁶ Isor ar abo talare helmel menakʼa mente bon menetʼ khan ar ńutre bon taṛametʼ khan enḍekhan eṛe katha bon roṛeda, ar sạriyakʼ horte do babon taṛameda.

⁷ Menkhan Isor do cetʼleka marsalre menae ar onkage abo hõ marsalre bon taṛametʼ khan enḍekhan abo talare helmel menakʼtabona ar uniren Hopon Jisuakʼ mãyãm do sanam kại khone sapha bona.

⁸ Ar abore kại bạnukʼa mente bon menle khan enḍekhan abo do apnarge bon bulạukʼ kana. Onate noage bujhạukʼ kana je, aboakʼ ontorre Isorakʼ sạritetʼ do bạnukʼa.

⁹ Abo do aboakʼ kạiko bon aṅgocle khan, enḍekhan uni do unrege aboakʼ kạikoe ikại tabona ar sanam bedhorom khone sapha bona, ente uni doe pạtiạrgea ar tis hõ bae bedhoroma.

¹⁰ Ar babon kại akada mente bon menle khan, enḍekhan unige eṛeyicʼ bon benao edekana, ar uniyakʼ katha aboakʼ ontorre do bạnukʼanaṅ.