1 Bõsbudạ 13 - সান্তালী বাইবেল

Kiriạt-Jearimte Bondobos reakʼ sinduk ạguiyena

¹ Dạud do acʼren mitʼke mitʼ mukhiyạko, metakʼme hajar lạṛhại phạdkoren subedar ar sae sae lạṛhại phạdkoren subedarko sãoteye sopolhawana.

² Ona tayom uni do Israelren goṭa dolkoe metatʼko, “Bhagepe hudisetʼ khan ar niạge aboren Probhu Isorakʼ sanakan khan dela, abo do Israel ṭoṭharen aboren sarecʼ boehako ṭhen ar onko sãote naekeko ar Liwiko okoe do onkoakʼ atokore ar janwarkoakʼ ạtiń ṭạnḍikore menakʼko onko ṭhen hõ khobor bon kola jemon onko hõ hecʼkate abo sãoteko seletʼ daṛeakʼ.

³ Dela bon, aboren Isorakʼ goha sunduk do abo ṭhen bon ruạṛ ạguiyma; Sạulakʼ rajokʼ oktere abo do sinduk secʼge babon lutur akawatʼ tahẽkana.”

⁴ Unre goṭa dolrenkoge ona ạgui lạgitʼko rạjiyena, ente joto hoṛko ṭhenge ona do lek kana menteko hudiskeda.

⁵ Onatege Kiriat-Jiyarim khon Isorakʼ sinduk ạgui lạgitʼ Dạud do Misor reakʼ Sihor gaḍa khon Homat reakʼ simạ hạbicʼ sanam Israelkoe jarwa mitʼketʼkoa.

⁶ Jihudạ disạm reakʼ Bala, metakʼme Kiriat-Jiyarim khon Probhu Isorakʼ sinduk ạgui lạgitʼ Dạud ar uni sãoten sanam Israelko onḍeko senena. Niạ sinduk do Probhu Isor ńutumtege oprom tahẽkana, ente uni do onḍe Kerubkin talareye tahenkan tahẽkana.

⁷ Hoṛko do Abinadabakʼ oṛakʼ khon Isorakʼ sinduk oḍok kate mitʼṭecʼ nãwã sagaṛ gạḍi cetanre ladekateko idiyetʼ tahẽkana. Unre Us ar Ahiạ do ona sagaṛ gạḍikin calaoetʼ tahẽkana,

⁸ Dạud ar sanam Israelko do Probhu Isor samaṅre akoakʼ goṭa daṛeteko enecʼ sereńetʼ tahẽkana ar peṛesaṅ, binạ banama, tabla, kortal ar pẽpṛẽtʼanteko rạskạkʼkan tahẽkana.

⁹ Onko do Kidạn reakʼ khạrại ṭhenko seṭeren khan ḍaṅgra dokin tohotʼena ar Us do sinduk sapʼ lạgitʼ acʼakʼ tiye lahakeda.

¹⁰ Onate Us cetanre Probhu Isor do edreteye perecʼena. Ar sinduke sapʼketʼ iạte uni doe hạnkedea. Ar onate uni do Isor samaṅre onḍegeye gocʼena.

¹¹ Us cetanre Probhu Isorakʼ niạ edre ńelte Dạud do bae kusilena. Ar teheń hạbicʼ hõ ona jaega do Peres-Usko metakʼkana.

¹² Enhilokʼ Dạud do Probhu Isor ạḍiye botoradea. Uniye menkeda, “Probhu Isorakʼ sinduk do enḍekhan cekate iń ṭhen ạgukʼa?”

¹³ Ar Dạud do acʼakʼ nagraha acʼ ṭhen sinduk do bae idileda. Uni do ona idikate Gatren Obed-Idomakʼ oṛakʼreye dohokada.

¹⁴ Idomakʼ oṛakʼre acʼakʼ gharońjrenko ṭhen sinduk do pe cando tahẽyena. Ar Probhu Isor do uniyakʼ gharońj ar uniyakʼ sanamakʼe bhoratʼtaea.