1Timothi 1 - সান্তালী বাইবেল

¹ Iń Pạul do aboren babańcaoicʼ Isor ar Jisu Mạsiyakʼ hukumte apostoliń hoyakana. Ar aboakʼ sanam as do Mạsi Jisurege.

² Biswạsi lekate sạri gidrạtiń Timothi ṭhen noa ciṭhi doń oleda. Aboren Isor Baba ar Probhu Jisu Mạsi do daya, mãyã ar suluke dan am ma.

Eṛe cecetʼko babotre sontorko reakʼ

³ Makedoniạte calakʼ jokhecʼ cetʼ lekań galmaraoatʼme tahẽkan ńitokʼ hõ onkageń metam kana, am do Ephesus nagraharege tahẽ hataṛokʼme, jemon adom adom hoṛem hukumako onko do eṛe cecetʼakʼ aloko emokʼ.

⁴ Ar noa hõm hukumakoa jemon onko do kạhniko ar maraṅ maraṅ bõsbudạkore mon aloko lagao. Noako do Isorakʼ kạmi baṅkate ạḍi lekan roṛ ropoṛe janam ocoya menkhan Isor cetʼlekate acʼakʼ kạmiye ạyura ona do biswạs hotetege baḍaeyokʼa.

⁵ Noa hukum reakʼ monsubạ do hoyokʼ kana dulạṛ udgạu ocoy. Noa dulạṛ do niphuṭ ontor, sapha bibek ar sạri biswạs khon hijukʼkana.

⁶ Adom hoṛ do noako khon ocokʼkate ạuṛi sạuṛi roṛ baṛae secʼgeko ghańjeṛ akana.

⁷ Onko do nijạrakʼ kathage bako bujhạueda ar okaṭakʼ reaṅ murukteko roṛetʼkan ona do bako baḍaere hõ Moseyakʼ ạn-ạriren guru hoyokʼko menjoṅkana.

⁸ Baḍaegea bon ạn do bhagegea, khạjuk jãhãe ṭhik leka kạmireye lagao.

⁹ Ar noa hõ bon baḍaea, jãhãe dhorom hoṛ lạgitʼ noa ạn do baṅ emakana; menkhan bemanotko, bebataoko, bebhoktiko, kại hoṛko, besonotko, bedhoromko, eṅgat-apat gogocʼko, khũniạhiko,

¹⁰ loṭghuṭiko, jojognako, hoṛ kiriń-ạkhrińko, eṛe katha roroṛko, eṛe goha emokʼko, sạri sikhnạt upạrte eṭakʼ jãhãnakʼko kạmikan onkanko lạgitʼge noa do emakana.

¹¹ Ṭhonokren Isorakʼ maraṅ bhage sombat lekate okaṭakʼ cecetʼakʼ menakʼ, onage hoyokʼkana sạri cecetʼakʼ. Ar noa bhage sombat porcar reakʼ dạyik do iń cetanreye emakada.

¹² Aboren Probhu Jisu Mạsi, okoe do daṛeye emakawạdiń, uniń gunmanao joharae kana, ente uni do pạtiạricʼe bujhạukedeńte acʼakʼ sapʼdapʼ kạmireye dhurạu akadińạ.

¹³ Lahate Mạsiyiń opomane kan ar khekhedicʼ ar ṭhok hoṛiń tahẽkanre hõ uni do noa kạmireye bahalkedińa. Uni do ińe daya akawạdińa, ente bepạtiạu ar bin baḍaete onakoń kạmikan tahẽkana.

¹⁴ Aboren Probhu Isor do asambheṛe daya akawạdińa ar Jisu Mạsi tulucʼ iń kolom mitʼakante oka biswạs ar dulạṛ menakʼ onae dan akawạdińa.

¹⁵ Noa katha do sạrikana ar purạ puri ataṅ reakʼ hõ lek kana je, kại hoṛ bańcaoko lạgitʼge Jisu Mạsi do noa dhạrtiteye hecʼlena. Ar onko kạkạiko modre iń kangeạń maraṅ kạiyan hoṛ do.

¹⁶ Onate Isor do ińe mãyã akawạdińa, jemon iń maraṅ kạiyan hotete Jisu Mạsi do acʼakʼ asambheṛ soboriye udukʼ daṛeakʼ. Ar unire pạtiạukʼ hotete okoe jaejug jionko ńam onko jemon iń ńelteko cetʼ daṛeakʼ onate uni do ińreye nonka akada.

¹⁷ Okoe doe jaejugren rajkan, okoe doe bin maraokʼicʼkan ar one okoe do bae ńelokʼkan, uni mitʼ Isorakʼ man ar ṭhonokge jug cetan jug hoyokʼtae ma. Amen.

¹⁸ E bachatiń Timothi, am reaṅ eṭakʼko nạbi lekate oka kathako lạiletʼ ona katha lekage iń do noań hukumam kana. Ar noa katha disạ dohoy tulucʼ am do Mạsi khạtirte jiwi alaekate ma lạṛhạime.

¹⁹ Ona sãote biswạs ar bhage bibek dohojoṅme. Adom hoṛ do bibek reakʼ katha bako ańjometʼkante biswạsre tạkicʼakʼko janam ocoyeda.

²⁰ Onko hoṛ modre Humenaeos ar Aleksander hõ menakʼkinạ. Onate unkin do Soetanakʼ tireń aṛakʼ akatʼkinạ, jemon noa sikhạunakin ńam baṅma, Isor opomane do baṅ ṭhika.