TITƏ 2 - Bibəl ta Sar̄

Yá̰á̰ ndóō kə́ gō tə́

¹ Ba ḭ̄, yāí i kadə̄ ī-ndóō de gə̄ yá̰á̰ kə́ əhɔn̄ naā kə yá̰á̰ ndóō kə́ gō tə́.

² Əda de kə́ tɔgə ɓə́ga gə̄ kadə̄ nin̄ i ngé kəhɔ rɔ̄də́ dɔ yá̰á̰ tə́ gə̄ ō, nin̄ i de gə̄ kə́ asən̄ kadə̄ de gə̄ rɔȳn̄də́ ō, nin̄ i ngé rāā yá̰a̰ kadə̄ mān̄ dɔ loon aĺ gə̄ ō, kadə̄ nin̄-ndan̄ ngan̄g dɔ taā kem tə́ ō, dɔ táŕ tə́ ō, dɔ tə́gā ta tə́ ō.

³ Əda dəyá̰ kə́ tɔgə ɓə́ga gə̄ ō, ādə̄ nin̄-rāān̄ háĺ kə́ nel̄ Nə́ɓā ō. Ādə̄ tāmə̄n̄ kə de gēé aĺ ō, rāān̄ ɓəlo kasə aĺ ō. Ādə̄ ndóōn̄ de gə̄ loo rāā yá̰á̰ kə́ majə.

⁴ Ādə̄ ndóōn̄ dəyá̰ kə́ na̰y mandə ɓáý gə̄ loo tár ngaadə́ gə̄ ō, ngáńdə́ gə̄ ō,

⁵ loo rāā yá̰a̰ kadə̄ mān̄ dɔ loon aĺ ō, kadə̄ nin̄ i de kə́ unjə̄ njáý njáý gə̄ ō, loo kəndā rɔ̄də́ ta kəla kə́ kem kújə yādə́ tə́ ō, kadə̄ nin̄ i de kə́ majə gə̄ ō, oōn̄ ta ngaadə́ gə̄ ō. Loo ń noō tə́ de gə̄ a əngen̄ ta róbə́ ndájə̄ najə̄ dɔ najə̄ yā Nə́ɓā tə́ alé.

^6-7 Əda balsáa gə̄ ō, kadə̄ tū yá̰a̰ gə̄ tə́ malang ɓáa nin̄ i de kə́ ngé ka̰a̰ yá̰á̰ kə́ majə tá rāā gə̄. Īkɔ́ ī-rāā yá̰á̰ kə́ majə kété tá kadə̄ de gə̄ ndájīn̄. Ādə̄ yá̰á̰ ndóō yāí i yá̰á̰ ndóō kə́ kumən unjə̄ ō, o̰o̰ī tɔdɔ̄ ō.

⁸ Ādə̄ najə̄ kɔrīí i najə̄ kə́ to ngáā ō, kə́ dum̄ kadə̄ deē nējə̄ ō.

^9-10 Ādə̄ ɓəlo gə̄ oōn̄ ta kɔ́ɔ̄də́ gə̄ tū yá̰a̰ gə̄ tə́ malang. Ādə̄ mbātə́n̄ najə̄ gōdə́ tə́ aĺ ō, ɓogən̄də́ aĺ ō, kadə̄ nelə̄ń kɔ́ɔ̄də́ gə̄ sedə́. Ādə̄ nin̄-ɔjən̄ ngándáńg kə̄ ndágá kadə̄ ra dɔ ndū tə́ yādə́ i kə́ majə ɔtə̄ kə taá. Yā kadə̄ tū yá̰a̰ gə̄ tə́ malang ɓáa, de gə̄ ədan̄ najə̄ kə́ majə dɔ yá̰á̰ ndóō yā Nə́ɓā nge kajəjí tə́.

¹¹ Tɔdɔ̄ rajə deē ń i ta róbə́ kə́ kadə̄ de gə̄ malang ajən̄neé ní, Nə́ɓā ɔjə kə̄ ndágá.

¹² Rajə de gə̄ yā Nə́ɓā ngeé ń toō ndóōjí kadə̄ jə-lōōī gíŕ háĺ kə́ majaĺ tə́ ō, kadə̄ jə-lōōī gír ngur yá̰á̰ kə́ dɔ nang tə́ laā gə̄ tə́ ō, tá kadə̄ jə-ndiīneé kem ndɔ̄ gə̄ ń toō tə́ kə kum kedēé ō, kə yá̰a̰ rāā kə́ gōtə́ ō, jə-rāāīneé yá̰a̰ kə gō ń Nə́ɓā ndigə ní tə́ ō.

¹³ Majə kadə̄ jə-ngóōī rɔ̄nel̄ ń j-əndāī kemjí dɔ tə́ ní i tītə̄ ń noō. Ndɔ̄ ngeé ń noō tə́ ní, kɔsə gɔn yā Nə́ɓā yājí kə́ bo ō, kə́ nge kajəjí ō ń i Jeju Kərist ní, a ɔjə rɔ̄n kə̄ ndágá.

¹⁴ Ni-əya̰ rɔ̄n adə̄ de gə̄ əhɔ tɔ̄lə̄n̄ kum gotəjí, yā gāngəń dɔjí tām̄ yá̰á̰ kə́ majaĺ gə̄ ń jə-rāāī tə́ ní ō, yā rāań kadə̄ jḭḭ̄ i gír deē yān gə̄ kə́ unən̄ majaĺ dɔjí tə́ kɔ̄ɔ́ adə̄ j-unjī njáý njáý ō, kadə̄ jḭḭ̄ i gír de gə̄ kə́ jə-təngāī loo rāā kəla kə́ majə gə̄ tə́ ō.

¹⁵ Yá̰a̰ gə̄ ń sɔɔ̄ kadə̄ ī-ndóō de gə̄ ní n nuú, kadə̄ ādə̄nńdə́ tɔ́gə ō, ī-ndángəńdə́ dɔ háĺdə́ tə́ ō. Ādə̄ deē kógə̄ḿ kídī alé.