TITƏ 1 - Bibəl ta Sar̄

Pol rāā Titə lápə́ya

¹ I mā Pol n m-ə́la kə makətūbūú mādə̄sí ní. Mā i nge kəla yā Nə́ɓā ō, ngōmbang kəla yā Jeju Kərist ō. Əndān̄ dɔḿ tə́ kadə̄ m-ɔ́jə́ ngé gə̄ ń Nə́ɓā gə̄rādə́ ní najə̄ kadə̄ taān̄ kem ō, kadə̄ m-ə́dádə́ najə̄ kə́ rɔ̄kum kə́ əhɔn̄ naā kə yá̰a̰ rāā kə́ kə gō ń Nə́ɓā ndigə ní kadə̄ gerə̄n̄ ō.

² Yā kadə̄ nin̄-əndān̄ kemdə́ dɔ ndi kə kumuú kə́ ngándáńg tə́. Nə́ɓā ń sor̄ aĺ ní, ənī ndūn kété no yá̰a̰ gə̄ tə́ malang yā kadə̄jí ndi kə kumuú kə́ ngándáńg ngeé ń toō.

³ Dan ń kum mbang yān asə anī, ni-teē kə najə̄neé kə̄ ndágá kə ta kūl najə̄ yān. Najə̄ ndi kə kumuú ní i tū kəla ń əndān̄ taḿ tə́ ní. Ba i Nə́ɓā nge kajəjí n ɔsə seḿ ta kənī mbērən ní.

⁴ m̄-ndang makətūbə̄ ń toō m-ə́lań m-ādə̄ i ḭ̄ Titə, ngōnə̄ḿ kə́ rɔ̄kum sɔɔ̄ń taā kem kə́ kógə̄ḿ beē kə́ j-əga naā dɔ tə́. Ādə̄ Bɔbə̄jí Nə́ɓā nin̄ kə Jeju Kərist nge kajəjí, rāān̄ kem majə seí ō, sɔlə̄n̄ kemií ō.

Kəla ń əndān̄ dɔ Titə tə́ gō nang kə́ Kəretə tə́ ní

⁵ M-ə́ya̰ī gō nang kə́ Kəretə tə́ i yā kadə̄ ə̄ndā dɔ yá̰a̰ gə̄ ń na̰yn̄ ɓáý ní danaá kə gōó ō, kadə̄ ə̄ndā kum kɔɔ̄ gə̄ kə dɔ ɓē gə̄ kógə̄ḿ kógə̄ḿ tītə̄ ń m-ə́daīń ní ō.

⁶ Majə kadə̄ najə̄ gətóo dɔ kum kɔɔ̄ tə́ ō, kadə̄ nə̄yá̰n i kógə̄ḿ beē ō, ngánən gə̄ taān̄ kem najə̄ yā Nə́ɓā ō, deē əndā najə̄ háĺ kə́ gō tə́ aĺ, aláa dum̄ naā dɔdə́ tə́ aĺ ō.

⁷ Nge kɔr no ngé kán̄ naā gə̄ ń i de kə́ əndān̄ dɔn tə́ kadə̄ əndā kumən gír yá̰a̰ gə̄ yā Nə́ɓā tə́ ní, majə kadə̄ ni i de kə́ najə̄ gətóo dɔn tə́. Adə̄ ni i de kə́ nge kídə̄ deē aĺ ō, nge wōn̄g aĺ ō, nge ka̰ȳ yá̰a̰ aĺ ō, de kə́ nge sāā nar kə ta róbə́ kə́ gō tə́ aĺ aĺ ō.

⁸ Majə kadə̄ ni i de kə́ nge kəhɔ de gə̄ mbā ō, de kə́ yá̰á̰ kə́ majə nelə̄n ō. Ni a a̰a̰ i yá̰á̰ kə́ majə tá a rāā ō, i de kə́ nge rāā yá̰á̰ kə́ gōtə́ ō, yá̰á̰ kə́ nel̄ Nə́ɓā ō, de kə́ a əhɔ rɔ̄n dɔ yá̰á̰ tə́ ō.

⁹ Ni i nge kəhɔ najə̄ kə́ to kadə̄ deē taā kem kadə̄ ngan̄g, adə̄ i najə̄ kə́ əhɔn̄ naā kə yá̰á̰ ń ni-ndóō ní. Loo ń noō tə́ ni-asə kadə̄ de gə̄ tɔ́gə kə yá̰á̰ ndóō kə́ rɔ̄kum ō, ni-asə kɔjə kə̄ ndágá kadə̄ najə̄ yā ngé mbātə́ najə̄ gə̄ i rɔ̄kum aĺ ō.

¹⁰ Tɔdɔ̄ ngé dum̄ naā gə̄ ō, ngé kɔr̄ najə̄ kə́ kanjə̄ kumən gə̄ ō, ngé gól̄ de gə̄ ō i ngá̰ý. Ba mandang ɓáa kə́ ngá̰ý gə̄ i dan ngé kəja mɔtədə́ gə̄ tə́.

¹¹ Majə kadə̄ deē utə̄ tadə́ kɔ̄ɔ́, tām̄ nin̄ i ngé nujə kem de gə̄ kə́ kem gír kojə kə́ kógə̄ḿ beē tə́ gə̄ malang kə yá̰á̰ ndóō kə́ majə kadə̄ deē ndóō de gə̄ aĺ tə́. Nin̄-rāān̄ nge ń nuū i yā kəngeń yá̰a̰ kə ta róbə́ kə́ gō tə́ alé.

¹² Deē kógə̄ḿ dandə́ tə́ kə́ nge koō ta yādə́ nin̄ kɔ́ gə̄ əda na: Kəretə gə̄ i ngé sor̄ gə̄ tá dejə. Nin̄ i dā̰ kə́ do̰ gə̄.

¹³ Najə̄ ń deē ń nuū əda ní, i najə̄ kə́ rɔ̄kum. Adə̄ majə kadə̄ ī-ndán̄gdə́ tá kadə̄ taā kem yādə́ i taā kem kə́ gō tə́.

¹⁴ Ādə̄ nin̄-əhɔn̄ gō gotə najə̄ kə́ tūr̄ gidə kadə̄ majə gə̄ yā Jipə gə̄ aĺ ō, əhɔn̄ gō yá̰a̰ gə̄ ń ngé tūr̄ gidədə́ kɔ̄ɔ́ ta najə̄ kə́ rɔ̄kum tə́ gə̄ ran̄ kə de gēé ta rāā ní aĺ ō.

¹⁵ De gə̄ ń nin̄ i de gə̄ kə́ unjə̄n̄ unjə̄ njáý njáý ní, yá̰a̰ malang i yá̰á̰ kə́ unjə̄ unjə̄ njáý njáý tām̄ yādə́ tə́, banī de gə̄ ń nin̄ i de kə́ yḛr gə̄ ō, nin̄ i ngé taā kem aĺ gə̄ ō ní, yá̰á̰ kə́ unjə̄ njáý njáý tām̄ yādə́ nin̄ tə́ gətóo. Tɔdɔ̄ kur̄ dɔdə́ ō, kemdə́ ō, i kə́ yḛr.

¹⁶ Nin̄-ədan̄ na n-gerə̄n̄ Nə́ɓā, banī yá̰a̰ rāādə́ ɔjə kadə̄ nin̄-gerə̄n̄ Nə́ɓā alé rɔ̄kum. Nin̄ i de kə́ majaĺ ngá̰ý gə̄ ō, de kə́ ngé dɔ ngan̄g gə̄ ō, asən̄ rāā yá̰á̰ kógə̄ḿ kə́ majə aĺ ō.