TA KƏLA 9 - Bibəl ta Sar̄

Nə́ɓā əhɔ madə̄ naā kə Noe

¹ Nə́ɓā rāā majə kə Noe ō, ngánən gə̄ ō, ɓáý, ədadə́ na: Ɔ́jiī naā ī-bəlaī, ī-rosiī dɔ nang.

² Dā̰ gə̄ malang kə́ dɔ nang tə́ ō, yel̄ gə̄ malang ō, ngán dā̰ gə̄ malang ō, kānjə̄ kə́ kum bā bo gə̄ tə́ ō, a ɓōlə́n̄sí ngá̰ý. Ásiī rāā yá̰á̰ ń kemsí ndigə ní sedə́.

³ Yá̰a̰ malang ń a njə̄rā ō, ndi kə kumuú ō ní, a téĺ yá̰a̰ kəsa yāsí. M-ādə̄sí yá̰a̰ gə̄ ń noō malang tītə̄ ń m-ādəńsí mbī kámbə kadə̄ ə́saī ní.

⁴ Ɓá tā ba ā ə́saī dā̰ naā tə́ kə mósən ń rāā adə̄ a ndiń kə́ kə kumuú ní alé.

⁵ Mósə́sí ń rāā adə̄ ā ī-ndiī kə kumsí ní, m-ā m̄-dəje kə̄rān. M-ā m̄-dəje kə̄rān jī dā̰ ń a tɔ̄l̄ deē tə́ ní ō, jī deē ń a tɔ̄l̄ deē madə̄n tə́ ní ō.

⁶ Deē ń ɓōkə́ mósə deē nang tə́ ní, gáŕ kadə̄ i deē n a ɓōkə́ mósə deē ń noō nang tə́ ō ní, tɔdɔ̄ Nə́ɓā əndā deē adə̄ teēn.

⁷ Ba sḭḭ̄, ójiī ngán gə̄ ādī kutəsí i ngá̰ý, ba ī-taāī gō dɔ nang malang.

⁸ Nə́ɓā əda Noe nin̄ kə ngánən gēé ɓáý to̰ na:

⁹ Yāḿ mā tā anī, m-ə́hɔ madə̄ naā sesí sḭḭ̄ ō, kə ngáńsí gə̄ ń a utə̄n̄ gōsí ní ō,

¹⁰ kə yá̰a̰ malang ń ndi kə kumuú sesí ní: Yel̄ gə̄ ō, dā̰ kə́ ɓēé gə̄ ō, dā̰ kə́ bembeé gə̄ ō, yá̰a̰ malang ń teē kem to boó ní ō, ngé gə̄ ń ndɔ̄ń tə́ a ndin̄ kə kumuú dɔ nang tə́ ní ō.

¹¹ Yá̰á̰ ń m-ā m̄-rāā ní n toó: Man̄ kaw̄ a tɔ̄l̄ yá̰á̰ kə́ ndi kə kumuú dɔ nang tə́ to̰ aĺ ō, man̄ kaw̄ kə́ yā nujə dɔ nang to̰ a gətóo ō.

¹² Nə́ɓā əda ɓáý to̰ na: Yá̰á̰ ń ɔjə kadə̄ m-ā m̄-rāā yá̰á̰ ń toō tām̄ yāsí tə́ ō, tām̄ yā yá̰a̰ malang kə́ ndi kə kumuú tə́ ō, kə dɔ ɓāl̄ gə̄ malang ń de gə̄ a ndinə̄ń dɔ nang tə́ ní n toó:

¹³ M-ə̄ndā kə́ dēsə́ bā ń i ga̰ gərā yāḿ ní tū kil̄ man̄ tə́. Ni i yá̰á̰ kə́ ɔjə kadə̄ m-ə́hɔ madə̄ naā kə dɔ nangaá.

¹⁴ Loo ń ré m-ɔ́sə dɔ kil̄ man̄ gə̄ kə̄ naā tə́ ba kə́ dēsə́ bā teē anī,

¹⁵ a əga kemḿ dɔ yá̰á̰ ń m̄-ndigə rāā tə́ tām̄ yāsí tə́ ō, tām̄ yā gír dā̰ gə̄ malang tə́ ō ní. Man̄ kaw̄ kə́ a tɔ̄l̄ yá̰a̰ malang kə́ ndi kə kumuú to̰ a gətóo i kə́ bátə́ gə̄ tə́.

¹⁶ Ré m-á̰á̰ kə́ dēsə́ bā ní anī, a əga kemḿ dɔ madə̄ naā yāḿ kə́ a to ngándáńg ń m-ə́hɔ kə yá̰a̰ malang ń ndi kə kumuú dɔ nang tə́ ní tə́.

¹⁷ Ba Nə́ɓā tél əda Noe to̰ na: Kə́ dēsə́ bā i yá̰á̰ ń ɔjə kadə̄ m-ə́hɔ madə̄ naā kə yá̰a̰ malang ń ndi kə kumuú dɔ nang tə́ ní.

Ngán Noe kə́ mətá gə̄

¹⁸ Ngán Noe kə́ dəngam gə̄ ń teēn̄ kem to boó ní i Sem ō, Kam ō, Japet ō. Kam i bɔbə̄ Kanaan.

¹⁹ I ngán Noe kə́ mətá gə̄ ń toō n ojən̄ naā á taān̄ loo dɔ nang tə́ malang ní.

²⁰ Nge ndɔr̄ kə́ ta kəga dɔ i Noe. Ni əhɔ kāgə̄ nduú ō,

²¹ a̰ȳ kasən ō, adə̄ rāān bátə́ ró̰ȳ kūbə̄ kə́ rɔ̄n tə́ kɔ̄ɔ́ malang ō, to kem kújə tandā yān tə́ gírən karī ō.

²² Kam, bɔbə̄ Kanaan, a̰a̰ bɔbə̄n kə́ to gírən karī anī, tél aw̄ ndágá ndang ngákó̰o̰n kə́ jōó gə̄.

²³ Anī Sem nin̄ kə Japet unən̄ kūbə̄, ənīn̄ dɔ bɔ̄gə̄də́ tə́, ba télnə̄ń kə gidədə́ aw̄ ənīn̄ dɔ bɔbə̄də́ ń to gírən karī tə́ ní. Nin̄ tūrə̄n̄ kumdə́ kə̄ loo kə́ rang tə́ kɔ̄ɔ́, adə̄ a̰a̰n̄ bɔbə̄də́ kə́ to gírən karī alé.

²⁴ Dan ń kasə gán̄g kum Noe tə́ ní, oō yá̰á̰ ń ngōnən kə́ dūú rāā seneé ní anī,

²⁵ əda na: Ndɔ̄ĺ i dɔ Kanaan tə́! Ādə̄ ni i ɓəlo yā ɓəlo yā ngákó̰o̰n gə̄!

²⁶ Gō tə́ anī əda na: Ādə̄ de gə̄ tɔ̄ȳn̄ Kɔ́ɔ̄ɓē Nə́ɓā yā Sem! Ādə̄ Kanaan i ɓəlo yā Sem!

²⁷ Ādə̄ Nə́ɓā ɔr̄ gír loo yā Japet kə̄ gogə́! Ādə̄ Japet ndi kem kújə tandā gə̄ yā Sem tə́, ba ādə̄ Kanaan i ɓəlo yān!

²⁸ Noe rāā ɓāl̄ ɓú mətá kə kutə mí gō man̄ kaw̄ tə́.

²⁹ Noe rāā ɓāl̄ ɓú ndōhó kə kutə mí tá oy ɓáý.