TA KƏLA 7 - Bibəl ta Sar̄

Noe udə kem to boó

¹ Kɔ́ɔ̄ɓē əda Noe na: Údiī kem to boó, ḭ̄ ō, deē yāí gə̄ malang ō, tɔdɔ̄ i ḭ̄ ngóy n i de kə́ súmūú ta kumḿ tə́ dan de kə́ dɔ nang tə́ gə̄ tə́.

² Dā̰ gə̄ malang ń unjə̄ njáý njáý ní, ɔ́ý kə́ bəra gə̄ sīrí ō, kə́ kó̰o̰ gə̄ sīrí ō, kə gō gíŕdə́ gēé. Ba ngé gə̄ ń i kə́ yḛr ní tá, úń kə́ bəra kógə̄ḿ ō, kə́ kó̰ó̰ kógə̄ḿ ō, kə gō gíŕdə́ gēé.

³ Ɔ́y yel̄ kə́ bɔbə̄ gə̄ sīrí ō, kə́ kó̰o̰ gə̄ sīrí ō, kə gō gíŕdə́ gēé kadə̄ ndin̄ kə kumuú dɔ nang tə́.

⁴ Tɔdɔ̄ na̰y i ndɔ̄ sīrí kadə̄ m-ə́la kə maná kadə̄ edə dɔ nang tə́ ndɔ̄ kutə sɔ́. M-ā m̄-tɔ̄l̄ yá̰a̰ malang ń ndi kə kumuú dɔ nang tə́ ní kɔ̄ɔ́.

⁵ Noe rāā yá̰a̰ malang ń Kɔ́ɔ̄ɓē ɔjən kadə̄ rāā ní.

Man̄ kaw̄ kə́ tɔȳ madə̄ gə̄ malang

⁶ Dan ń man̄ kaw̄ taā loo dɔ nang tə́ malang ní, ɓāl̄ Noe i ɓú mehḛ́.

⁷ Ni udə kem to bo tə́ kə ngánən kə́ dəngam gə̄ ō, nə̄yá̰n ō, umən gə̄ ō, yā ka̰ȳń man̄ kə́ a rāā yā taā loo.

⁸ Dā̰ kə́ unjə̄ njáý njáý gə̄ ō, dā̰ kə́ yḛr gə̄ ō, yel̄ gə̄ ō, ngán dā̰ kə́ kagə nang tə́ gə̄ ō,

⁹ udən̄ kem to boó gō Noe tə́ jōó jōó, kə́ bɔbə̄ ō, kə́ kó̰o̰ ō, tītə̄ ń Nə́ɓā ədań Noe ní.

¹⁰ Rāā ndɔ̄ sīrí gō tə́ anī man̄ kaw̄ taā dɔ nang.

¹¹ Kem ɓāl̄ ń ɓāl̄ Noe i ɓú mehḛ́ tə́ ní, kə ndɔ̄ kə́ nge ko̰ kutə gidə i sīrí yā nāā kə́ nge ko̰ jōó anī, ndɔ̄ ń noō tə́ ta kəɓa man̄ kə́ gír nángāá gə̄ malang teēn̄ ō, ta kār̄ man̄ kə́ dɔɔ́ gə̄ malang i kə́ teē ō.

¹² Man̄ edə dɔ nang tə́ bátə́ ndɔ̄ kutə sɔ́.

¹³ Ndɔ̄ ń noō tə́ Noe udə kem to bo tə́ nin̄ kə nə̄yá̰neé ō, ngánən kə́ dəngam kə́ mətá gə̄ ń i Sem ō, Kam ō, Japet ní ō, umən kə́ dəyá̰ kə́ mətá gə̄ ō,

¹⁴ gír dā̰ kə́ bembeé gə̄ malang ō, kə́ ɓēé gə̄ malang ō, gíŕ ngán dā̰ kə́ dūú gə̄ malang ō, yel̄ gə̄ malang ō, kur̄ gə̄ malang ō.

^15-16 Yá̰a̰ malang ń Nə́ɓā rāā á ndi kə kumuú ní, kə́ bəra ō, kə́ kó̰o̰ ō, udən̄ jōó jōó kem to boó gō Noe tə́ tītə̄ ń Nə́ɓā ədań Noe ní. Loo ń noō tə́ Kɔ́ɔ̄ɓē utə̄ ta róbə dɔ Noe tə́ tā.

¹⁷ Man̄ kaw̄ taā loo dɔ nang tə́ ndɔ̄ kutə sɔ́, un to kə̄ dɔɔ́ kə̄ dɔɔ́.

¹⁸ Man̄ ḭḭ ngá̰ý adə̄ ənda to aw̄ń kə gō nōó.

¹⁹ Mbal̄ kə́ dɔ nang tə́ gə̄ kə́ ngāl̄ ngá̰ý gə̄ ní, man̄ un dɔ malang.

²⁰ Man̄ ḭḭ mān̄ tadə́ asə kíl deē kutə gidə i mí.

²¹ Adə̄ yel̄ gə̄ ō, dā̰ kə́ ɓēé gə̄ ō, kə́ bembeé gə̄ ō, ngán dā̰ kə́ kagə nang tə́ gə̄ ō, de gə̄ ō, oyn̄ malang.

²² Yá̰a̰ malang kə́ dɔ nang tə́ ń koō ndi kə kumuú i kemən tə́ ní oy.

²³ Kɔ́ɔ̄ɓē tɔ̄l̄ yá̰a̰ malang ń ndi kə kumuú dɔ nang tə́ ní kɔ̄ɔ́. De gə̄ gə̄gē, dā̰ kə́ bo gə̄gē, kə́ dūú gə̄gē, yel̄ gə̄gē malang. Na̰y i Noe ō, ngé gə̄ ń i seneé kem to boó ní ō ngóy.

Noe teē kem to boó kə̄ ndágá

²⁴ Man̄ kaw̄ taā loo rāā ndɔ̄ ɓú kə kutə mí.