TA KƏLA 6 - Bibəl ta Sar̄

Nə́ɓā ndigə tɔ̄l̄ de gə̄ kə́ dɔ nang tə́ malang kɔ̄ɔ́

¹ Dan ń de gə̄ bəlan̄ ngá̰ý dɔ nang tə́ ō, ojən̄ ngáń kə́ dəyá̰ gə̄ ō anī,

² ngáń Nə́ɓā gə̄ a̰a̰n̄ ngáń kə́ dəyá̰ yā de gə̄ ní mandən̄ ngá̰ý ta kumdə́ tə́, adə̄ táān̄ ngé gə̄ ń nin̄ gə̄rān̄də́ ní kə́ dəyá̰ gə̄ tə́.

³ Tā anī Kɔ́ɔ̄ɓē əda na: M-ā m-ādə̄ ndílə́ḿ a ndi kem deē tə́ kə ndɔ̄ gə̄ ngándáńg alé, tɔdɔ̄ deē i dā̰ rɔ̄ kə́ tɔ́gən i ngá̰ý alé, adə̄ ɓālə̄n a aw̄ ngá̰ý gē a, i ɓú kə kutə jōó ngóy.

⁴ Dan ń noó tə́ ní de kə́ ngāl̄ ngá̰ý gə̄ ndin̄ dɔ nang tə́. I nin̄ n i go̰ rɔ̄ɔ̄ kə́ jóo gə̄ ń rīdə́ ɓār̄ ngá̰ý ní. I ngáń Nə́ɓā gə̄ ń táān̄ ngáń kə́ dəyá̰ yā de gə̄ ní n ojən̄də́ ní.

⁵ Kɔ́ɔ̄ɓē a̰a̰ kadə̄ kem de kə́ dɔ nang tə́ gə̄ ndul ngá̰ý ō, gír̄ yādə́ i kə́ majaĺ kə ndɔ̄ gə̄ ō.

⁶ Tōrə̄n ngá̰ý adə̄ ndə̄ngā rɔ̄n tām̄ rāā ń ni-rāā deē əndān dɔ nang tə́ ní.

⁷ Anī Kɔ́ɔ̄ɓē əda na: M-ā m̄-rāā kadə̄ deē ń m-ə̄ndān dɔ nang tə́ ní gətóo kɔ̄ɔ́. I deē ngóy alé, ba əla gír dɔ deē tə́ bátə́ ugə̄ń dɔ yá̰a̰ kul̄ gə̄ tə́ ō, dɔ ngán dā̰ kə́ kagə nang tə́ gə̄ tə́ ō, dɔ yel̄ kə́ dɔɔ́ gə̄ tə́ ō. Tɔdɔ̄ m̄-ndə̄ngā rɔ̄ḿ tām̄ rāā ń m̄-rāā deē tə́ ní.

⁸ Ɓá tā ba Kɔ́ɔ̄ɓē rāā kem majə kə Noeé.

Nə́ɓā ndigə kajə Noe

⁹ Gotə najə̄ yā Noe n toó: Noe i de kə́ súmūú ō, najə̄ gətóo dɔn tə́ dan de kə́ ɓāl̄ yān tə́ gə̄ tə́ ō. Ni njə̄rā kə Nə́ɓāá.

¹⁰ Noe ojə ngáń kə́ dəngam gə̄ i mətá: Sem ō, Kam ō, Japet ō.

¹¹ De kə́ dɔ nang tə́ gə̄ nujən̄ kɔ̄ɔ́ ta kum Nə́ɓā tə́. De gə̄ malang rāān̄ yá̰a̰ i kə dɔ́nɔ́.

¹² Dan ń Nə́ɓā a̰a̰ loo kə́ dɔ nang tə́ anī, a̰a̰ kadə̄ hál de gə̄ malang i kə́ nujə kɔ̄ɔ́, tɔdɔ̄ nin̄ njə̄rān̄ i dɔ róbə́ kə́ súmūú tə́ alé.

¹³ Anī ni-əda Noe na: m̄-gḛy kadə̄ gír yā de gə̄ gān̄g kɔ̄ɔ́, tɔdɔ̄ yá̰á̰ kə́ rāā kə dɔ́nɔ́ al̄ naā ngá̰ý dɔ nang tə́, adə̄ m-ā m̄-nujədə́ kɔ̄ɔ́ ō, m-ā m̄-nujəń dɔ nang kɔ̄ɔ́ ō.

¹⁴ Ī-rāā to bo kə kāgə̄ goper tām̄ yāí tə́. Ī-gán̄g kemən ō, ī-tə́ya̰ nō kāgə̄ kemeé ō, gidə tə́ ō.

¹⁵ Ā ī-rāān i beé: Ngāl̄ to bo ní i kíl deē ɓú mətá ō, laan i kíl deē kutə mí ō, ngālən kə́ kə̄ dɔɔ́ i kíl deē kutə mətá ō.

¹⁶ Ā ə́ya̰ kum loo kadə̄ ra wōȳ tū to bo ní tə́ dɔɔ́, kadə̄ asə kíl deē kógə̄ḿ. Ā ī-rāā ta róbə́ kógə̄ḿ kadə to bo ní tə́. Ā ī-rāā kemən kə́ gírí ō, kemən kə́ dɔ tə́ kə́ ta kəga dɔ ō, kə́ nge ko̰ jōó ō.

¹⁷ Ba m-ā m̄-rāā kadə̄ man̄ kaw̄ kə́ ngá̰ý a taā loo dɔ nang tə́ yā tɔ̄ləń yá̰a̰ malang kə́ ndi kə kumuú kɔ̄ɔ́. Yá̰a̰ malang kə́ dɔ nang tə́ a oy.

¹⁸ Ba m-ā m-ə́hɔ madə̄ naā seí ḭ̄ḭ́. Ā údiī kem to boó, ḭ̄ ō, ngání kə́ dəngam gə̄ ō, nə̄yá̰í ō, umií gə̄ ō.

¹⁹ Yá̰a̰ malang ń ndi kə kumuú ní, ā ī-rāā kadə̄ udən̄ jōó jōó kem to boó kə gō gíŕdə́ gēé, kə́ bəra ō, kə́ kó̰o̰ ō, yā ngɔ̄məńdə́ kadə̄ ndin̄ kə kumdə́ seí.

²⁰ Yel̄ gə̄ ō, dā̰ kə́ bo gə̄ ō, kə́ dūú gə̄ ō, kə gō gíŕdə́ gēé, a reēn̄ rɔ̄í tə́ jōó jōó, kadə̄ ī-ngɔ̄m̄də́ kadə̄ ndin̄ kə kumdə́.

²¹ Ī-tɔ́sə̄ dɔ yá̰a̰ kəsa gə̄ naā tə́ malang rɔ̄í tə́, ī-rāā sádə̄ tə́, tām̄ yāí tə́ ō, tām̄ yādə́ tə́ ō.

²² Yá̰á̰ ń Noe rāā ní n noó. Ni rāā yá̰a̰ malang ń Nə́ɓā ədan kadə̄ rāā ní kə gōó majə.