TA KƏLA 48 - Bibəl ta Sar̄

Jakob tɔ́r̄ tan dɔ ngán Jəjep gə̄ tə́

¹ Gō yá̰a̰ gə̄ ń noō tə́ anī, reē ədan̄ Jəjep najə̄ yā bɔbə̄n kə́ i mo̰y. Anī ni ɔy ngánən kə́ jōó gə̄ seneé, Manase ō, Epəraim ō.

² Dan ń ədan̄ Jakob kōō ngōnə̄n Jəjep kə́ a reē kə̄ go̰ō̰n tə́ anī, əhɔ rɔ̄n tɔ́gə ba ḭḭ ndi dɔɔ́ dɔ tə̄rá yān tə́.

³ Əda Jəjep na Nə́ɓā kə́ bo kə́ tɔ́gən i ngá̰ý na ndɔ̄bə̄n Lujə, dɔ nang kə́ Kanaan tə́, na əda najə̄ kə́ majə dɔn tə́.

⁴ Ədan na n-a n-adə̄n ngán gə̄ ngá̰ý kadə̄ na a téĺ gír de kə́ ngá̰ý gə̄ ō, dɔ nang ń noō na n-adə̄ ngán kaan gə̄ gotən tə́ kadə̄ na i yādə́ tə́ ngándáńg ō.

⁵ Ń toō tā a, ngáń kə́ jōó gə̄ ń na ojədə́ dɔ nang kə́ Ejiptə tə́ kété tá kadə̄ na n-reē rɔ̄n tə́ ní na i ngán yān gə̄. Epəraim ō, Manase ō, na i yān gə̄ tītə̄ Ruben nin̄ kə Simeo̰ó̰.

⁶ Banī ngán gə̄ ń na ojədə́ gōdə́ tə́ ní tá na i yān ni Jəjep gə̄, na a ɓārə́n̄də́ loo kēgə̄ naā yá̰a̰ ndəbā tə́ na i kə rī ngákó̰ó̰də́ gēé.

⁷ Dan ń na n-ḭḭ Mesopotami na n-reē ní, Rasel na oy jīn tə́ róbó, dɔ nang kə́ Kanaan tə́, ngɔr kə̄ Epərataá. Na n-dubə̄n na i loo ń noō tə́, dɔ róbə́ kə́ kaw̄ kə̄ kem ɓē kə́ Epərata tə́, Epərata ń rīn kə́rēý na i Betlehem ní.

⁸ Israel a̰a̰ ngán Jəjep gə̄ anī əda na ké i náā gə̄ n noó wa.

⁹ Anī Jəjep tél əda bɔbə̄n na i ngán gə̄ ń Nə́ɓā na adə̄n dɔ nang kə́ Ejiptə tə́ ní. Israel əda na kə reē sedə́ kə̄ rɔ̄n tə́ kadə̄ kə n-tɔ́r̄ tan dɔdə́ tə́.

¹⁰ Jakob tɔgə ɓə́gá ngá̰ý adə̄ kumən a̰a̰ loo ngá̰ý to̰ alé. Jəjep reē sedə́ rɔ̄n tə́, adə̄ əhɔdə́ kə̄ rɔ̄n tə́ ɓir̄də́ dagə.

¹¹ Gō tə́ anī Israel əda Jəjep na n-əda na n-a n-a̰a̰ kumən to̰ alé, ba Nə́ɓā rāā adə̄ na n-a̰a̰ ngán kemən gə̄gē.

¹² Jəjep ɔr̄ ngánən gə̄ no mbā bɔbə̄n tə́ ba ɔsə non nang tə́ non tə́.

¹³ Gō tə́ anī Jəjep ɔy ngánən gə̄ jōó mbak reē sedə́ rɔ̄ bɔbə̄n tə́. Epəraim ń i dɔ jī ko̰n tə́ ní i dɔ jī gel Israel tə́ ō, Manase ń i dɔ jī gelən tə́ ní i dɔ jī ko̰ Israel tə́ ō.

¹⁴ Banī Israel tə́la jīn mánəń gír naā, adə̄ jīn kə́ ko̰ i dɔ Epəraim ń i nge kə́ dūú tə́ ní ō, jīn kə́ gel i dɔ Manase tə́ ō. Manase i ngōn̄ hágə ɓá tā ba i jīn kə́ gel n əndā dɔn tə́ ní.

¹⁵ Israel tɔ́r̄ tan dɔ Jəjep tə́, əda na: Kadə̄ Nə́ɓā ń kaan Abəraham nin̄ kə bɔbə̄n Isaaká njə̄rān̄ kə̄ non tə́ ní, kadə̄ Nə́ɓā ń ngɔ̄mən bátə́ ɓōólaā ní,

¹⁶ kadə̄ de kə́ dɔ rā̰ tə́ ń un yá̰á̰ kə́ majaĺ gə̄ kɔ̄ɔ́ dɔn tə́ ní, kə rāā majə kə ngán gə̄ ń toō. Kadə̄ ɓārə́n̄də́ kə rīneé ō, kə rī kaan Abərahamaá ō, kə rī bɔbə̄n Isaaká ō. Kadə̄ ojən̄ naā ngá̰ý kem ɓēé ō.

¹⁷ Dan ń Jəjep a̰a̰ kadə̄ bɔbə̄n əndā i jī ko̰n dɔ Epəraim tə́ ní, nelə̄n alé, adə̄ əhɔ jī bɔbə̄n yā tūr̄ dɔ Epəraim tə́ kaw̄ń dɔ Manase tə́,

¹⁸ əda bɔbə̄n na i beé alé, nge ń noō na i nga tɔ́gə, kə əndā jī ko̰n dɔn tə́.

¹⁹ Ba bɔbə̄n mbātə́ ədan na n-ger̄. N-ger̄ kadə̄ na a tél gír de kə́ ngá̰ý gə̄ ō, na a reē de kə́ bo ō, banī ngōkó̰o̰n kə́ dūú tá na a reē de kə́ bo tɔȳn ō, ngán kemən gə̄ na a télən̄ nápar de kə́ ngá̰ý gə̄ ō.

²⁰ Israel tɔ́r̄ tan dɔdə́ tə́ ndɔ̄ ń noō tə́, əda na ngán Israel gə̄ na a unən̄ na i rīdə́ n na a tɔ́r̄nəń tadə́ dɔ naā tə́ ní, a ədan̄ na kə Nə́ɓā kə rāā kem majə seí tītə̄ ń na rāań kə Epəraim nin̄ kə Manaseé ní. Jakob əndā Epəraim kété no Manase tə́.

²¹ Gō tə́ anī əda Jəjep na n-a n-oy tā, ba Nə́ɓā na a ndi sedə́, na a tél yā kaw̄ sedə́ dɔ nang yā kaadə́ gə̄ tə́.

²² Na n-adə̄n dɔ nang kə́ Sisem ń na n-taā jī Amor gə̄ tə́ kə kaskar yānneé ō, kə ga̰ gərā yānneé ō ní, kadə̄ yān na a tɔȳ yā ngákó̰o̰n gə̄.