TA KƏLA 41 - Bibəl ta Sar̄

Nī rāā Parao̰

¹ Rāā ɓāl̄ jōó anī nī rāā Parao̰ adə̄ ra i ta bā tə́.

² Anī a̰a̰ kó̰o̰ man̄g kə́ bo majə gə̄ sīrí teēn̄ kum man̄ tə́ ra a əsan̄ mu.

³ Gō tə́ anī man̄g kə́ rang kə́ majaĺ kə́ kon̄g ngéngéréńg gə̄ teēn̄ gō madə̄də́ gə̄ tə́ kum man̄ tə́, reē ran̄ kadədə́ tə́ kadə bā tə́.

⁴ Man̄g kə́ majaĺ kə́ kon̄g gə̄ ní əsan̄ man̄g kə́ bo majə gə̄ ní kɔ̄ɔ́, anī Parao̰ ndól̄ ta tə́.

⁵ Tél to a ɓīī gogə́ anī nī kə́ rang rāān ɓáý to̰. Ni a̰a̰ dɔ kōō kə́ majə gə̄ sīrí teēn̄ tū kádə́ kə́ kógə̄ḿ beē tə́.

⁶ Gō tə́ anī a̰a̰ dɔ kōō kə́ dūú gə̄ sīrí kə́ néĺ kə́ dūn̄ ɓē tə́ tutədə́ teēn̄ yādə́.

⁷ Dɔ kōō kə́ dūú gə̄ ní túrə̄n̄ kə́ bo majə kə́ sīrí gə̄ ní kɔ̄ɔ́. Anī Parao̰ ndól̄ ta tə́ ɓáý to̰. Nī yā Parao̰ ní n noó.

⁸ Teē dəloí anī kem Parao̰ ndi kə gōó alé, adə̄ ɓāŕ mbōlí gə̄ ō, ngé ger̄ yá̰á̰ ngá̰ý kə́ Ejiptə tə́ gə̄ ō, malang ɔjədə́ gotə nī ní tā, ba deē kógə̄ḿ kə́ asə kɔjən kum gətóo.

⁹ Anī ngol ngé kadə̄ mban̄g yá̰a̰ ka̰ȳ gə̄ əda Parao̰ na: Kɔ́ɔ̄ɓē gə̄, m-ā m-ə́da i gotə yá̰á̰ kə́ gōtə́ aĺ gə̄ ń m̄-rāā kété ní.

¹⁰ Ndɔ̄ kógə̄ḿ tə́ wōn̄g rāāī seḿ māá ō, kə ngol ngé kɔr̄ mápa gēé ō, adə̄ ī-ɓōkə́jí kújə dəngáy yā ngol áskar yā mban̄g gə̄ tə́.

¹¹ Ndɔ̄ɔ́ anī nī rāājí mbak. Ba kum nī ń rāājí ní tá i kə dɔjí gēé.

¹² Balsáa hebəro kógə̄ḿ kə́ ɓəlo kə́ nge rāā kəla yā ngol áskar gə̄ i gōjí tə́ kújə dəngáyá. J-ənīn gotə nī ń rāājí ní anī ni ɔjəjí kum.

¹³ Yá̰a̰ gə̄ reē rāān̄ yá̰a̰ kə gō kum nī ń ɔjəjí ní. Parao̰ tél əndām̄ gogə́ loo kəla yāḿ tə́ ō, adə̄ ənīn̄ kəlā kɔ́ɔ ngol ngé kɔr̄ mápa gə̄ tə́ naānənə̄ń dɔɔ́ ta jī kāgə̄ tə́ ō.

Jəjep ɔjə kum nī ń rāā Parao̰ ní

¹⁴ Parao̰ əla gō Jəjep tə́ adə̄ aw̄n̄ láẃ ɔr̄nən̄ kújə dəngáyá. Dəsān̄ mbāýn ō, əlan̄ kūbə̄ kə́ rang rɔ̄n tə́ ō, tá aw̄ rɔ̄ Parao̰ tə́.

¹⁵ Parao̰ əda Jəjep na nī na rāān tā, ba de kə́ asə kɔjən kum na gətóo, ba na n-oō kadə̄ ré nī rāā deē ba kɔ́ɔ̄ ənīn gotə anī, na a ɔjən kum.

¹⁶ Jəjep tél əda Parao̰ na i ni alé, na i Nə́ɓā n asə kɔjən kum nī kə gōó majə ní.

¹⁷ Anī Parao̰ əda Jəjep na nī na rāān adə̄ na n-ra i ta bā tə́.

¹⁸ Anī kó̰o̰ man̄g kə́ bo majə gə̄ sīrí teēn̄ kum man̄ tə́, na ra a əsan̄ mu.

¹⁹ Kó̰o̰ man̄g kə́ rang kə́ majaĺ kə́ kon̄g ngéngéréńg ngéngéréńg gə̄ sīrí kə́ dā̰də́ gətóo gə̄ teēn̄ gōdə́ tə́, na dɔ nang kə́ Ejiptə tə́ malang ní na n-a̰a̰ man̄g kə́ majaĺ gə̄ tītə̄ ngé gə̄ ń noō aĺ ɓáý.

²⁰ Na kó̰o̰ man̄g kə́ majaĺ gə̄ ń dā̰də́ gətóó ní na əsan̄ kó̰o̰ man̄g kə́ sīrí kə́ bo gə̄ ní kɔ̄ɔ́,

²¹ na túrə̄n̄də́ kemdə́ tə́ kanjə̄ kadə̄ deē ger̄ ta kudədə́, ba ré deē a̰a̰də́ anī majən̄ aĺ na i tītə̄ kə́ kété ɓáý to̰. Ɓáa na n-ndól̄ ta tə́.

²² Gō tə́ anī na nī kə́ rang na rāān ɓáý, na n-a̰a̰ dɔ kōō kə́ ngón̄g gə̄ sīrí na teēn̄ tū kádə́ kə́ kógə̄ḿ beē tə́.

²³ Na n-a̰a̰ dɔ kōō kə́ sii gə̄ sīrí kə́ néĺ kə́ dūn̄ ɓē tə́ tutədə́ kɔ̄ɔ́ teēn̄ yādə́ ō,

²⁴ na dɔ kōō kə́ sii gə̄ ní na túrə̄n̄ dɔ kōō kə́ ngón̄g kə́ sīrí gə̄ ní kɔ̄ɔ́. Əda na n-ənī mbōlí gə̄ gotə nī ní tā, ba deē kógə̄ḿ kə́ asə kɔjən kum na gətóo.

²⁵ Jəjep əda Parao̰ na kum nī ń na rāān ní na i kógə̄ḿ beē, na yá̰á̰ ń Nə́ɓā a rāā yā rāā ní n na ɔjən kété kadə̄ ger̄ toó.

²⁶ Kó̰o̰ man̄g kə́ majə kə́ sīrí gə̄ ní na i ɓāl̄ kə́ sīrí gə̄ ō, dɔ kōō kə́ ngón̄g kə́ sīrí gə̄ ní na i ɓāl̄ kə́ sīrí gə̄ ō, adə̄ na i nī kə́ kógə̄ḿ beē.

²⁷ Na kó̰o̰ man̄g kə́ sīrí kə́ majaĺ kə́ kon̄g gə̄ ń na teēn̄ gō madə̄də́ gə̄ tə́ ní ō, dɔ kōō kə́ sii kə́ sīrí gə̄ ń néĺ kə́ dūn̄ ɓē tə́ tutədə́ kɔ̄ɔ́ ō ní na i ɓāl̄ kə́ sīrí gə̄ tā, ba na i ɓāl̄ kə́ sīrí gə̄ kə́ ɓō a əsōń dɔ nang tə́.

²⁸ Adə̄ tītə̄ ń na n-ədań ní, na i yá̰á̰ kə́ Nə́ɓā a rāā yā rāā ɓáý n əda Parao̰ kété kadə̄ ger̄ ní.

²⁹ Kem ɓāl̄ sīrí yá̰a̰ kəsa na a to ngá̰ý dɔ nang kə́ Ejiptə tə́ malang.

³⁰ Gō tə́ anī ɓō a utə̄ gō ɓāl̄ sīrí, adə̄ dɔ de gə̄ na a ndígə̄nal yá̰á̰ kə́ kal̄ naā ngá̰ý ń na to dɔ nang kə́ Ejiptə tə́ ní. Ɓō ní na a nujə ɓē,

³¹ adə̄ deē a a̰a̰ yá̰á̰ kə́ kal̄ naā ngá̰ý ní kem ɓēé to̰ alé sɔɔ̄ń ɓō ń a utə̄ gō ní, tɔdɔ̄ i ɓō kə́ to ɓōĺ ngá̰ý.

³² Adə̄ ré nī rāā Parao̰ nja i jōó ō, i nī gə̄ kə́ tītə̄ ń naā ō anī, kumən na i yá̰á̰ ń Nə́ɓā a sāā rāā ní, adə̄ a ɔr bā̰ā̰ loo rāān tə́ alé.

³³ Ní, kə Parao̰ kə gə̄rā deē kógə̄ḿ kə́ ger̄ yá̰a̰ ō, kə́ kum kedə̄ ō, kə əndān dɔ ɓē kə́ Ejiptə tə́.

³⁴ Kə Parao̰ kə əndā ngé tīr̄ kōō gə̄ dɔ ɓē tə́ kadə̄ kə tīrə̄n̄ dɔ kōō, kadə̄ ré kōō i kem yá̰á̰ mí anī, kə taān̄ kə́ nge ko̰ mí kem ɓāl̄ kə́ sīrí gə̄ ń yá̰a̰ a toń ngá̰ý dɔ nang kə́ Ejiptə tə́ ní.

³⁵ Kadə̄ kə kánə̄n̄ kōō malang kə́ kem ɓāl̄ kə́ majə kə́ sīrí gə̄ ń a reēn̄ tə́ ní. Kadə̄ kə udən̄ dūbə̄ gémē kə gō ɓē gēé kə ngɔ̄mə̄n̄ kə gō ndū Parao̰ó̰.

³⁶ Kōō kə́ kán̄ dɔ naā tə́ ń noō i yā ngɔ̄m̄ tām̄ ɓō kə́ ɓāl̄ sīrí ń a rāā yā kəsō dɔ ɓē kə́ Ejiptə tə́ ní yā, kadə̄ ɓō nujəń kə ɓēé alé.

Jəjep tél ngōmbang yā Parao̰

³⁷ Najə̄ ní nel̄ Parao̰ ō, nel̄ ngé rāā kəla yān gə̄ malang ō.

³⁸ Anī Parao̰ əda ngé rāā kəla yān gə̄ na ké na n-əngen̄ de kə́ aw̄ kə Ndíĺ Nə́ɓāá dɔn tə́ tītə̄ deē ń toō wa.

³⁹ Ni tél əda Jəjep na tītə̄ ń Nə́ɓā na ɔjən yá̰a̰ gə̄ ń toō malang adə̄ na ger̄ ní, de kə́ rang kə́ ger̄ yá̰a̰ ō, kumən edə̄ tītə̄ yān ō na gətóo.

⁴⁰ Adə̄ na n-əndān dɔ ɓē yān tə́ kadə̄ gír deē yān gə̄ malang na a oōn̄ tan. Yá̰á̰ ń na n-tɔȳnəń ní na i kōr̄ kāgə̄ mbang yān ngóy,

⁴¹ na n-əndān kadə̄ a o̰o̰ ɓē dɔ ɓē kə́ Ejiptə tə́ malang.

⁴² Parao̰ ɔr̄ kulūm̄ kə́ jīn tə́ əla jī Jəjep tə́ ō, əla kūbə̄ kə́ majə kə́ sɔl̄ lɔ́ḿ lɔ́ḿ rɔ̄n tə́ ō, ənī məde lɔ́ŕ kɔ́ɔn tə́ ō,

⁴³ ba adə̄ al̄ kem púsə́ sə́ndá ń utə̄ gō yān tə́ ní. Adə̄ deē kógə̄ḿ njə̄rā kété non tə́ ənī mbēr̄ əda na kə de gə̄ kə tétə̄n̄ kejədə́ nang tə́. Parao̰ adə̄n ndū ko̰o̰ ɓē dɔ nang kə́ Ejiptə tə́ malang i beé.

⁴⁴ Ni əda Jəjep ɓáý to̰ na ni na i Parao̰ ɓá tā ba dɔ nang kə́ Ejiptə tə́ malang ní, ré ni Jəjep adə̄ ta róbə aĺ anī, de kə́ yā kun jīn dɔɔ́ na a gətóo.

⁴⁵ Parao̰ əndā rī Jəjep na i Sapənat Paneas ō, adə̄n Asənat ngōn̄ Potipera kadə̄ i nə̄yá̰n ō. Potipera i nge tun̄ yá̰á̰ kə́ kem ɓē kə́ On tə́. Loo ń noō tə́ Jəjep aw̄ ka̰a̰ gō ɓē gə̄ kə́ Ejiptə tə́.

⁴⁶ Dan ń aw̄n̄ kə Jəjepé rɔ̄ Parao̰ mban̄g kə́ Ejiptə tə́ ní, ɓālə̄n i kutə mətá. Jəjep əya̰ Parao̰ ba ɔr̄ gō loo njə̄rā kə gō ɓē kə́ Ejiptə tə́ gēé malang.

⁴⁷ Kem ɓāl̄ kə́ sīrí gə̄ ń dɔ nang majəń tə́ ní, kōō teē ngá̰ý,

⁴⁸ adə̄ Jəjep tīr̄ dɔ kōō malang kə́ kem ɓāl̄ kə́ sīrí gə̄ ń noō tə́ kə̄ dɔ naā tə́. Ni kán̄ kōō kə́ ndɔr̄ kem ngán ɓē gə̄ tə́ kə̄ kem ɓē kə́ bo gə̄ tə́.

⁴⁹ Jəjep kán̄ kōō gémē ngá̰ý kə̄ dɔ naā tə́, adə̄ dūbə̄n ra dɔ naā tə́ bing bing tītə̄ dūbə̄ nán̄g ngárə̄ḿnjēý kə́ ta bā bo tə́ beé, i ngá̰ý al̄ naā adə̄ deē tə́da kutən to̰ alé, tām̄ kutə yá̰á̰ kə́ yā tə́dan to̰ gətóo.

⁵⁰ Kété no ɓāl̄ ɓō tə́ ní, Asənat ngōn̄ Potipera nge tun̄ yá̰á̰ kə́ On ojə ngáń kə́ dəngam gə̄ jōó adə̄ Jəjep.

⁵¹ Jəjep əndā rī ngōn̄ hágən na i Manase, tɔdɔ̄ əda na Nə́ɓā na rāā adə̄ dɔn na ndígə̄nal yá̰á̰ kə́ tōr̄ gə̄ ń na rāān ní malang ō, ndɔ̄ gə̄ ń na n-a̰a̰nə̄ń naā kə bɔbə̄neé aĺ ní ō.

⁵² Əndā rī ni kə́ nge ko̰ jōó na i Epəraim, tɔdɔ̄ əda na Nə́ɓā na adə̄n ngán gə̄ kem ɓē ń na n-a̰a̰ tápə̄ ngá̰ý tū tə́ tə́ ní.

⁵³ Ɓāl̄ kə́ sīrí gə̄ ń yá̰a̰ i ngá̰ý dɔ nang kə́ Ejiptə tə́ ní reē mānə̄n̄,

⁵⁴ ɓáa ɓāl̄ ɓō kə́ sīrí gə̄ əlan̄ gír reē tītə̄ ń Jəjep ədań ní. Ɓō əsō kə̄ kem ɓē gə̄ tə́ malang ba kəsa to dɔ nang kə́ Ejiptə tə́.

⁵⁵ Dan ń ɓō reē əsō dɔ nang kə́ Ejiptə tə́ malang ō anī, kósə de gə̄ nōōn̄ kə̄ dɔ Parao̰ tə́ najə̄ yá̰a̰ kəsa tə́. Parao̰ əda de kə́ Ejiptə tə́ gə̄ malang na kə aw̄n̄ rɔ̄ Jəjep tə́, kə rāān̄ yá̰á̰ ń na a ədadə́ ní.

⁵⁶ Ɓō rāā de kə́ kem ɓēé gə̄ malang tā a Jəjep teē ta loo gə̄ ń kánə̄n̄ kōō tū tə́ ní malang adə̄ de gə̄ mangən̄. Ba gō tə́ anī ɓō aw̄ i kum kə̄ kété kété dɔ nang kə́ Ejiptə tə́.

⁵⁷ De gə̄ ḭḭn̄ kə̄ dɔ ɓē gə̄ tə́ malang reēn̄ Ejiptə tə́ mang kōó jī Jəjep tə́, tɔdɔ̄ ɓō i ngá̰ý kə̄ kem ɓē gə̄ tə́ malang.