TA KƏLA 4 - Bibəl ta Sar̄

Kain nin̄ kə Abel

¹ Adam ɓīī kə nə̄yá̰n Ebə adə̄ ndān̄ ngōn̄. Ebə ojə Kain anī əda na: Kɔ́ɔ̄ɓē rāā seḿ adə̄ m-ə́nge deē.

² Ni-ojə ngōkó̰o̰ Kain ń rīn na i Abel ní ɓáý to̰. Abel i nge kul̄ yá̰a̰, Kain i nge ndɔr̄.

³ Ugə̄ dan kə́rēý tə́ anī, Kain ndējə̄ Kɔ́ɔ̄ɓē kan̄ yá̰a̰ gə̄ ń teēn̄ dɔ nang tə́ ní.

⁴ Ba Abel ndējə̄ yān i ngán dā̰ gə̄ ń kṵ́ṵ́də́ ojədə́ ta kəga dɔ ní ō, yibə̄də́ ō. Kɔ́ɔ̄ɓē ndigə Abel ō, ndigə yá̰a̰ ndējə̄ yān ō,

⁵ banī mbātə́ Kain kə yá̰a̰ ndējə̄ yān gēé. Tōr̄ Kain ngá̰ý adə̄ dɔ kumən nelə̄n alé.

⁶ Ba Kɔ́ɔ̄ɓē ədan na: Ī-rāā wōn̄g ō, dɔ kumií nelī alé ō, i tām̄ rí tə́?

⁷ Ré kemií ndi kə gōó majanī, ā ún kumií dɔɔ́. Ba ré kemií ndi majə alé anī, majaĺ a to ta róbí tə́. Ngur kəhɔī rāān, ba ásə dum̄ tan.

⁸ Ba Kain əda ngōkó̰o̰n Abel na kə n-teēn̄. Dan ń nin̄ i kem ndɔrɔ́ anī, Kain ḭḭ udə kə̄ dɔ ngōkó̰o̰n Abel tə́ tɔ̄lə̄n.

⁹ Kɔ́ɔ̄ɓē dəje Kain na: Ngōkó̰ó̰í Abel i rá? Anī Kain tél ədan na: m̄-ger̄ alé. Mā i nge ngɔ̄m̄ ngōkó̰ó̰ḿ a?

¹⁰ Kɔ́ɔ̄ɓē tél ədan na: Ī-rāā i rí? Ndū mósə ngōkó̰ó̰í ɓār̄ dɔ nang tə́ bátə́ teē rɔ̄ḿ tə́.

¹¹ Dɔ nang ń teē tan taāń mósə ngōkó̰ó̰í ń ī-tɔ̄lə̄n ní jīí tə́ ní, ngɔlaā ndɔ̄líī.

¹² Adə̄ ré ā ī-ndɔr̄ dɔ nang anī, ni a teē yá̰a̰ yā kadī to̰ alé. Ā ī-ndi gotə kógə̄ḿ alé, ā ī-tél i de kə́ nge dáȳ dɔɔ́.

¹³ Kain əda Kɔ́ɔ̄ɓē na: Ndéý ń ə́ndam̄ ní tɔȳ tɔ́gə́ḿ, adə̄ m-ásə́ tə́gā taḿ gírí alé.

¹⁴ Ɓōólaā ī-tə̄ɓām̄ kɔ̄ɔ́ dɔ nang ń toō tə́, adə̄ m-āw̄ yā ɓɔ̄ɔ̄ rɔ̄ḿ kɔ̄ɔ́ sa̰y ta kumií tə́. M-ā m̄-tél de kə́ nge ndi gotə kógə̄ḿ alé, m-ā m̄-dáȳ i dɔɔ́. Náā nəkɔ́ ń a əngem̄ anī a tɔ̄lə̄m̄.

¹⁵ Banī Kɔ́ɔ̄ɓē tél ədan na: I beé alé. Ré deē tɔ̄lī anī, a tɔ̄lə̄n̄ de gə̄ sīrí kum gotií yā daləń ba̰ā̰í. Kɔ́ɔ̄ɓē əndā tə́ré yá̰á̰ kógə̄ḿ no Kain tə́ yā kadə̄ náā nəkɔ́ ń ənge Kain anī, kə tɔ̄lə̄n alé.

¹⁶ Gō tə́ anī Kain aw̄ ndi dɔ nang kə́ Nod tə́, sa̰y kɔ̄ɔ́ ta kum Kɔ́ɔ̄ɓē tə́, dām̄ ndɔr̄ Eden kə́ gír ɓē tə́ tə́.

Ngán kaa Kain gə̄

¹⁷ Kain ɓīī kə nə̄yá̰neé adə̄ ndān̄ ngōn̄. Ni-ojə Henok. Gō tə́ anī, ni-rāā ɓē bo kógə̄ḿ ba əndā rī ngōnə̄n Henok dɔ ɓē ní tə́.

¹⁸ Henok ojə Irad, Irad ojə Mehuyael, Mehuyael ojə Metusael, ba Metusael ojə Lamek.

¹⁹ Lamek taā dəyá̰ gə̄ jōó. Rī kə́ kógə̄ḿ na i Ada ō, kə́ noō na i Sila ō.

²⁰ Ada ojə Yabal. Ni i kaa ngé gə̄ ń ndin̄ kem kújə tandā tə́ dan yá̰a̰ kul̄ gə̄ tə́ ní.

²¹ Ngōkó̰o̰ Yabal rīn na i Yubal. Ni i kaa ngé kugə kənde gə̄ ō, ngé kɔ̄ŕ nal gə̄ ō.

²² Sila ojə Tubal Kain. Ni i nge koo yá̰a̰ malang kə́ rāā kə gində̄ nə̄ngá kasaá ō, kə gində̄ kə́ karī ō. Rī ngōkó̰o̰ Tubal Kain kə́ dəyá̰ na i Naama.

²³ Lamek əda nə̄yá̰n gə̄ na: Ada ō Sila ō, ōōī ndūḿ! Nə̄yá̰ Lamek gə̄, ōōī najə̄ kɔrə̄ḿ! Ré deē adə̄m̄ do anī, m-ā m̄-tɔ̄l̄ deē kógə̄ḿ kum gotə. Ré deē əndam̄ anī, m-ā m̄-tɔ̄l̄ ngōn̄ kógə̄ḿ kum gotə.

²⁴ Ré a tɔ̄lə̄n̄ de gə̄ i sīrí yā daləń ba̰ā̰ Kain anī, a tɔ̄lə̄n̄ de gə̄ i kutə sīrí gidə i sīrí tá yā daləń ba̰ā̰ Lamek.

²⁵ Adam ɓīī kə nə̄yá̰neé ɓáý, adə̄ nə̄yá̰n ojə ngōn̄ kə́ dəngam, ba əndā rīn na i Set tɔdɔ̄ ni-əda na: Nə́ɓā ndigə kadə̄m̄ ngōn̄ kə́ rang gotə Abel ń Kain tɔ̄lə̄n tə́ ní.

²⁶ Set ojə ngōn̄ kə́ dəngam ō. Ni-əndā rīn na i Enos. I loo ń noō tə́ n de gə̄ əlanə̄ń gír ɓāŕ Nə́ɓā na i Kɔ́ɔ̄ɓē dan ń a ndɔ̄ȳnən̄ tə́ ní.