TA KƏLA 39 - Bibəl ta Sar̄

Jəjep i ɓē Potipar

¹ Ngán Ismael gə̄ ń aw̄n̄ kə Jəjepé Ejiptə tə́ ní aw̄ igən̄ seneé jī Potipar de kə́ Ejiptə tə́. Ni i de kə́ mban̄g Parao̰ ənī kemən adə̄n ō, ni i ngol áskar yān gə̄ ō.

² Kɔ́ɔ̄ɓē i naā tə́ kə Jəjepé adə̄ yá̰a̰ rāān gə̄ i kə́ majə malang. Ni-ndi i kem kújə yā kɔ́ɔ̄n tə́.

³ Kɔ́ɔ̄n ger̄ kadə̄ Kɔ́ɔ̄ɓē i naā tə́ seneé. Ni a̰a̰ kadə̄ yá̰a̰ malang ń Jəjep rāā ní, Kɔ́ɔ̄ɓē rāā adə̄ majə.

⁴ Nel̄ Potipar seneé ngá̰ý adə̄ əndān dɔ kəla kə́ kem ndogó looneé tə́ ō, əya̰ yá̰a̰ kənge yān gə̄ malang gír jīn tə́ ō.

⁵ Dan ń Potipar əndā Jəjep dɔ kəla kə́ kem ndogó looneé tə́ ō, dɔ yá̰a̰ kənge yān gə̄ tə́ malang ō anī, Kɔ́ɔ̄ɓē rāā adə̄ kəla yā Potipar teēn yá̰á̰ tə́ majə. Yá̰a̰ kənge yān kə́ ɓēé gə̄gē kə́ bembeé gə̄gē teēnən̄ yá̰a̰ majə. Kɔ́ɔ̄ɓē rāā nge ń noō i tām̄ yā Jəjep tə́.

⁶ Loo ń noō tə́ Potipar əya̰ yá̰a̰ yān malang jī Jəjep tə́. Yá̰á̰ ń ni a rāā ní i kun yá̰a̰ kəsa kaw̄ń tan tə́ ngóy. Jəjep balsáá ngá̰ý ō, majə deē ngá̰ý ō.

Jəjep nin̄ kə nə̄yá̰ kɔ́ɔ̄n

⁷ Gō yá̰a̰ gə̄ ń toō tə́ nə̄yá̰ Potipar əndā kumən rɔ̄ Jəjep tə́, adə̄ ədan na kə to seneé.

⁸ Jəjep mbātə́, ədan na kɔ́ɔ̄n na ənī kemən adə̄n, na əndā kumən gíŕ yá̰á̰ kə́ kem kújú tə́ alé, na əya̰ yá̰a̰ yān malang na i gír jīn tə́.

⁹ Ni na i de kə́ bo tɔȳn kem kújə́ ń toō tə́ aĺ ō, na ɔgə̄n rāā yá̰á̰ kógə̄ḿ aĺ ō, ngá̰ý a na i ni kə́ nə̄yá̰n nəkɔ́ n na adə̄n aĺ noō ngóý tá. Ní, kə n-rāā yá̰á̰ kə́ to yḛr beé yā rāań majaĺ ta kum Nə́ɓā yān tə́ ké i ba̰ý wa.

¹⁰ Kə dɔ ndɔ̄ gə̄ ń noō dəyá̰ ní a dəje Jəjep kadə̄ kə ɓīī seneé tā, ba Jəjep ənda mbīn dɔ tə́, mbātə́ sāān kɔ̄ɔ́.

¹¹ Ndɔ̄ kógə̄ḿ tə́ Jəjep udə kújú yā rāā kəla yān, ba ngé rāā kəla kə́ kem kújú gə̄ tá gətóon̄.

¹² Anī dəyá̰ ngeé láā ta kūbə̄ yā Jəjep əhɔ, ba ədan na kə to seneé, na i mbée a Jəjep əya̰ kūbə̄ yān jīn tə́ ba teē kújú kə ngɔ̄dɔ̄ɔ́.

¹³ Dan ń dəyá̰ ní a̰a̰ kadə̄ Jəjep əya̰ kūbə̄ yān jīn tə́ ba teē kə ngɔ̄dɔ̄ɔ́ anī,

¹⁴ ur sɔ̄ḿ ɓāŕəń ngé kəla yān gə̄ ədadə́ na kə a̰a̰n̄, ngaan na reē kə Hebəro adə̄də́ na i yā mbóoń sedə́. Hebəro ní na reē yā sāān anī na n-əga kɔŕ.

¹⁵ Dan ń na a̰a̰ kadə̄ n-ur sɔ̄ḿ dɔn tə́ anī, na əya̰ kūbə̄ yān jīn tə́ ba na teē kə ngɔ̄dɔ̄ɔ́.

¹⁶ Dəyá̰ ní ənī kūbə̄ ní ngóoń ngaan.

¹⁷ Dan ń ngaan reē ugə̄ anī ədan na ɓəlo hebəro ń na reē seneé ní na sāā kəla mbóo dɔn tə́,

¹⁸ tā ba dan ń na n-ur sɔ̄ḿ dɔn tə́ anī, na əya̰ kūbə̄ yān jīn tə́ ba na teē kə ngɔ̄dɔ̄ɔ́.

¹⁹ Dan ń kɔ́ɔ̄ Jəjep oō najə̄ kɔr̄ nə̄yá̰n ń əda na yá̰á̰ ń ɓəlo yān na rāā seneé ní n noó anī wōn̄g rāān ngá̰ý,

²⁰ adə̄ əhɔ Jəjep ənīn dəngáyá, loo ń dəngáy yā mban̄g gə̄ a ton̄ tū tə́ ní tə́. Dan ń Jəjep to dəngáyá ní,

Jəjep i kújə dəngáyá

²¹ Kɔ́ɔ̄ɓē i naā tə́ seneé. Ni əndā kumən gōn tə́ adə̄ ngol ngé ngɔ̄m̄ dəngáy gə̄ rāā majə seneé,

²² əndān dɔ dəngáy gə̄ tə́ malang kadə̄ ngɔ̄m̄də́, adə̄ Jəjep i nge kɔjədə́ kəla kadə̄ rāān̄.

²³ Ngol ngé ngɔ̄m̄ dəngáy gə̄ ní əya̰ kəla yān jī Jəjep tə́ malang, əndā kumən gírí to̰ alé, tɔdɔ̄ Kɔ́ɔ̄ɓē i naā tə́ kə Jəjepé, adə̄ kəla rāān i kə́ majə malang.