TA KƏLA 34 - Bibəl ta Sar̄

Simeo̰ ō, Lebi ō, dalən̄ ba̰ā̰ ngōkó̰ó̰də́ kə́ dəyá̰

¹ Ndɔ̄ kógə̄ḿ tə́ Dina, ngōn̄ kə́ dəyá̰ ń Lea ojə kə Jakobó ní, teē aw̄ ka̰a̰ ngáń kə́ dəyá̰ kə́ kem ɓēé gə̄ tə́.

² Anī Sisem, ngōn̄ ngār kə́ kem ɓēé ń rīn na i Hamor ní, a̰a̰n. Ni əhɔn aw̄ sāān dɔ gúú tə́ əlań rɔ̄sɔl̄ dɔn tə́,

³ banī kemən tá na̰y dɔn tə́. Sisem tár Dina ō, sāā kadə̄ kem Dina ndigən ō,

⁴ adə̄ əda bɔbə̄n Hamor na kə taā ngōn̄ kə́ dəyá̰ ń noō kə adə̄n.

⁵ Jakob oō kadə̄ Sisem əla rɔ̄sɔl̄ dɔ ngōnən Dina tə́. Ba dan ń ngánən kə́ dəngam gə̄ na̰yn̄ bembeé kə yá̰a̰ kul̄ yān gēé ɓáý ní, ni-ndi jəke adə̄ tél reē ugə̄nəń ɓēé.

⁶ Hamor bɔbə̄ Sisem aw̄ rɔ̄ Jakob tə́ kɔr̄ najá seneé.

⁷ Dan ń ngán Jakob gə̄ télən̄ bembeé á oōn̄ najə̄ ní ní, wōn̄g rāādə́ ngá̰ý tām̄ yá̰á̰ kə́ to rɔ̄sɔl̄ ń Sisem rāā tə́ ní. Ni sāā ngōn̄ Jakob dɔ gúú tə́, i yá̰á̰ kə́ deē a rāā Israel tə́ alé.

⁸ Hamor ɔr̄ najə̄ sedə́, əda na: Ngōnə̄ḿ Sisem gḛy ngōn̄sí kə́ dəyá̰ ngá̰ý ní, m̄-rāāsí ɓɔ́, ādīin̄ seneé ādə̄ taān.

⁹ Ī-rāāī madə̄ naā sejí, ādījí ngáńsí kə́ dəyá̰ gə̄ ādə̄ jə-taā ō, ī-taāī yājí gə̄ ō.

¹⁰ Ā ī-ndiī sejí ō, dɔ nang a to tām̄ yāsí tə́ ō. Ī-ndiī tū tə́, ī-rāāī gātə̄ ō, ə́ngeī loo tū tə́ ō.

¹¹ Sisem əda bɔbə̄ Dina ō, ngákó̰o̰ Dina kə́ dəngam gə̄ ō na: Ī-mā̰yī rɔ̄sí dɔḿ tə́, yá̰á̰ ń ā ī-gāngī dɔḿ tə́ ní m-ā m-ādə̄sí.

¹² Ásiī gān̄g nar dəyá̰ ngá̰ý dɔḿ tə́ ō, gān̄g kadə̄ karī gə̄ ngá̰ý dɔḿ tə́ kadə̄ m-ādə̄ ō. Yá̰a̰ malang ń ā ī-dəjemī ní m-ā m-ādə̄sí, ba ādə̄mī ngōn̄ kə́ dəyá̰ ní ādə̄ m̄-taā.

¹³ Ngán Jakob gə̄ tél ɔrə̄n̄ najə̄ kə Sisemé ō, kə bɔbə̄n Hamoró ō, kə kum kedēé, tɔdɔ̄ Sisem əla rɔ̄sɔl̄ dɔ ngōkó̰ó̰də́ Dina tə́.

¹⁴ Nin̄ ədanən̄ na: Jḭḭ j-asə kun ngōkó̰ó̰jí kadə̄ de kə́ əja mɔtən aĺ alé, tɔdɔ̄ i yá̰á̰ kə́ to rɔ̄sɔl̄ tām̄ yājí tə́.

¹⁵ J-a jə-ndigə gōsí tə́ i loo ń dəngam yāsí gə̄ a əjan̄ mɔtədə́ malang tītə̄ yājí ní.

¹⁶ Loo ń noō tə́ j-a j-adə̄sí ngáńjí kə́ dəyá̰ gə̄ kadə̄ ā ī-taāī ō, j-a jə-taā yāsí gə̄ ō, j-a jə-ndi ɓē sesí ō, j-a jə-téliī gír de kə́ kógə̄ḿ beē gə̄ ō.

¹⁷ Ba ré sḭḭ̄ ī-ndigiī kəja mɔtəsí aĺ ɓáa, j-a j-əhɔ ngōkó̰ó̰jí kə́ dəyá̰ yā tél seneé.

¹⁸ Hamor nin̄ kə ngōnə̄n Sisemé ndigən̄ najə̄ kɔr̄də́ ní.

¹⁹ Balsáá ní ɔr̄ bā̰ā̰ loo rāā yá̰á̰ ní tə́ alé, tām̄ gḛy ngōn̄ Jakob kə́ dəyá̰ ní ngá̰ý. Tá de kə́ kem ndogə̄ yā bɔbə̄n tə́ gə̄ malang a tetən̄ rɔ̄də́ i gōn ni tə́.

²⁰ Hamor nin̄ kə ngōnə̄n Sisemé aw̄n̄ loo gān̄g sarya kə́ kem ɓēé tə́ ba ɔrə̄n̄ najə̄ kə de kə́ kem ɓē yādə́ tə́ gēé, ədan̄ na:

²¹ De gə̄ ń noō gírə̄n̄ rāā yá̰á̰ kə́ majaĺ alé ní, ādə̄ ndin̄ sejí kem ɓēé ō, rāān̄ gātə̄ kem ɓēé ō. Dɔ nang i kə́ laa asə ta tə́ tām̄ yādə́ tə́. J-a jə-táāī ngáńdə́ kə́ dəyá̰ gə̄ ō, j-a j-adīdə́ ngáńjí kə́ dəyá̰ gə̄ kadə̄ taān̄ ō.

²² Ba i loo ń dəngam kə́ dɔ dáńjí tə́ gə̄ a əjan̄ mɔtədə́ malang tītə̄ yādə́ ní tá a ndigən̄ ndi sejí ō, tél gír de kə́ kógə̄ḿ beē gə̄ sejí ō ɓáý.

²³ Ré jə-ndigiī anī a ndin̄ sejí, adə̄ yá̰a̰ kul̄ yādə́ gə̄ ō, yá̰a̰ kənge yādə́ gə̄ ō, a télən̄ yá̰a̰ yājí malang.

²⁴ De gə̄ ń reēn̄ loo gān̄g sarya tə́ malang ní ndigən̄ najə̄ kɔr̄ Hamor nin̄ kə ngōnə̄n Sisemé, adə̄ dəngam kə́ kem ɓēé gə̄ malang əjan̄ mɔtədə́.

²⁵ Kə ndɔ̄ kə́ nge ko̰ mətá dan ń do a tōr̄də́ anī, ngán Jakob kə́ jōó gə̄ Simeo̰ ō Lebi ō, ngákó̰o̰ Dina gə̄, ɔyn̄ kaskar yādə́ ba udən̄ kem ɓēé. Nin̄ əhɔn̄ dəngam gə̄ dɔ jīdə́ tə́, tɔ̄lə̄n̄də́ kɔ̄ɔ́ malang kə kaskaraá.

²⁶ Tɔ̄lə̄n̄ Hamor nin̄ kə ngōnə̄n Sisemé ō, ba əhɔn̄ Dina kem kújə yā Sisem tə́ teēn̄ seneé.

²⁷ Ngán Jakob kə́ dəngam gə̄ udən̄ dɔ nīń gə̄ tə́ ró̰ȳn̄ yá̰a̰ kənge gə̄ kə́ rɔ̄də́ tə́ ō, ɔyn̄ yá̰á̰ kə́ kem ɓēé gə̄ ō, tɔdɔ̄ Sisem əla rɔ̄sɔl̄ dɔ ngōkó̰ó̰də́ kə́ dəyá̰ tə́.

²⁸ Nin̄ ɔyn̄ yá̰a̰ kul̄ yādə́ gə̄ ō, man̄g yādə́ gə̄ ō, kərō yādə́ gə̄ ō, ɔyn̄ yá̰á̰ kə́ ɓēé ō yá̰á̰ kə́ ndɔrɔ́ ō.

²⁹ Əhɔn̄ ngáńdə́ gə̄ ō, nə̄yá̰də́ gə̄ ō, ɔyn̄ yá̰a̰ kənge yādə́ gə̄ malang ō, yá̰á̰ kə́ kem kújú gə̄ malang ō, aw̄nəń.

³⁰ Anī Jakob əda Simeo̰ nin̄ kə Lebií na: Ə̄nīī i najə̄ dɔḿ tə́, tɔdɔ̄ ī-rāāī ādə̄ m̄-tél de kə́ majaĺ ta kum de kə́ kem ɓēé gə̄ tə́, ta kum Kanaan gə̄ tə́ ō, Periji gə̄ tə́ ō. Kutə de gə̄ yāḿ gə̄ i ngá̰ý alé, de gə̄ ń noō a ɔsən̄ dɔdə́ naā tə́ yā reē rɔ̄ɔ̄m̄. Nin̄ a tetəmə̄n̄ rɔ̄ɔ̄, adə̄ a tɔ̄l̄mə̄n̄ kə de gə̄ yāḿ gēé kadə̄ gír yāḿ a gān̄g kɔ̄ɔ́.

³¹ Nin̄ tél ədanən̄ na: I kadə̄ deē kə rāā ngōkó̰ó̰jí kə́ dəyá̰ ájə́ba tə́ a?