TA KƏLA 32 - Bibəl ta Sar̄

¹ Laban ḭḭ dɔɔ́ kə gír looí ɓatə, əhɔ ngánən kə́ dəyá̰ gə̄ ō, ngán kaan gə̄ ō, kə̄ rɔ̄n tə́ ɓir̄də́ dagə. Ni tɔ́r̄ tan dɔdə́ tə́ ba tél ta kaw̄ kə̄ gogə́ ɓēé.

Jakob əla ngé kəla yān gə̄ rɔ̄ Esau tə́

² Jakob un ta njə̄rā yān anī, ngé kəla yā Nə́ɓā gə̄ əngenən̄.

³ Dan ń Jakob a̰a̰də́ anī əda na loo ń toō i gérger yā Nə́ɓā, adə̄ ni əndā rī loo ní na i Mahanaim.

⁴ Jakob əla ngé kəla yān gə̄ kété non tə́ rɔ̄ ngōkó̰o̰n Esau tə́, dɔ nang kə́ Seir ń i Edom ní tə́.

⁵ Ni ədadə́ na: Yá̰á̰ ń kadə̄ ā ə́daī kɔ́ɔ̄ḿ Esau ní n toó, ə́dain̄ na nge kəla yān Jakob əda na n-ndi na i rɔ̄ Laban tə́ bátə́ ɓōólaā,

⁶ na n-ənge man̄g kə́ bəra gə̄ ō, kərō gə̄ ō, batə̄ gə̄ ō, bə̄yā̰ gə̄ ō, ngé rāā kəla kə́ dəngam gə̄ ō, kə́ dəyá̰ gə̄ ō, adə̄ na n-əla n-əda kɔ́ɔ̄n kété kadə̄ kɔ́ɔ̄n kə əhɔn kə̄ rɔ̄n tə́ majə.

⁷ Ngé kaw̄ kəla gə̄ tél reē ədan̄ Jakob na: J-aw̄ j-ənge ngōkó̰ó̰í Esau, nəkɔ́ ɔy de gə̄ ɓú sɔ́ a tə́nīn taí.

⁸ Ɓōĺ rāā Jakob ngá̰ý adə̄ kə̄ngā sāā gāngə̄n. Ni kēgə̄ de gə̄ ń seneé ní gír jōó. Kēgə̄ batə̄ gə̄ ō, bə̄yā̰ gə̄ ō, man̄g gə̄ ō, jámbal gə̄ ō,

⁹ ba əda na ré Esau reē rɔ̄ɔ̄ gír ɓūtə̄ kə́ kógə̄ḿ tetən rɔ̄ɔ̄ anī, ɓūtə̄ kə́ kógə̄ḿ na a ənge ta róbə yā ka̰ȳń.

¹⁰ Jakob əda na: Nə́ɓā yā kaaḿ Abəraham, Nə́ɓā yā bɔbə́ḿ Isaak, i ḭ̄ Kɔ́ɔ̄ɓē n ə́dam̄ na kə m̄-tél kə m-āw̄ ɓē kojəḿ tə́ rɔ̄ ngééḿ gə̄ tə́, na ā ī-rāā seḿ majə ní.

¹¹ m̄-dūú ngá̰ý kadə yá̰á̰ kə́ majə gə̄ ō, ra dɔ ndū tə́ ō ń ī-rāā seḿ mā nge kəla yāí ní tə́. Tɔdɔ̄ kété m̄-teē bā Jurdḛ i kə kāgə̄ jī yāḿ ngóy, ba ɓōólaā m-ə̄ndā gír ɓūtə̄ de gə̄ jōó.

¹² m̄-rāāī ɓɔ́, ī-taām̄ jī ngōkó̰ó̰ḿ Esau tə́. Tɔdɔ̄ m̄-ɓōĺ kadə̄ reē tɔ̄lə̄m̄ mā ō, dəyá̰ gə̄ ō, ngán gə̄ ō.

¹³ Ḭ̄ ə́dam̄ na ā ī-rāā seḿ ō, na ā ī-rāā kadə̄ ngánə́ḿ gə̄ ō, ngán kaaḿ gə̄ ō, na a ton̄ tītə̄ nán̄g ngárə̄ḿnjēý kə́ ta bā bo tə́ kə́ deē asə tə́da alé.

¹⁴ Jakob rāā loo ɓīīn loo ngeé ń noō tə́. Ni gə̄rā yá̰a̰ kul̄ yān kə́rēý gə̄ dan madə̄ gə̄ tə́ yā kadə̄ ngōkó̰o̰n Esau kadə̄ karī tə́. Ni ɔr̄ kó̰o̰ bə̄yā̰ ɓú jōó ō, bal bə̄yā̰ kutə jōó ō,

¹⁵ kó̰o̰ batə̄ ɓú jōó ō, bal batə̄ kutə jōó ō,

¹⁶ kó̰ó̰ jámbal kutə mətá naā tə́ kə ngáńdə́ gə̄ ń a ilən̄ mba ní ō, kó̰o̰ man̄g kutə sɔ́ ō, man̄g kə́ bəra kutə kógə̄ḿ ō, kó̰o̰ kərō kutə jōó ō, kərō kə́ bəra kutə kógə̄ḿ ō, yā kadə̄ ngōkó̰o̰n Esau.

¹⁷ Ni kēgə̄ yá̰a̰ kul̄ gə̄ ní naā tə́ adə̄ ngé kəla yān gə̄, ba ədadə́ na kə mānə̄n̄ kété non tə́ ba kadə̄ dɔ dán loo kə to mbo̰ō̰ ɓūtə̄ yá̰a̰ kul̄ gə̄ tə́.

¹⁸ Ni əda nge kəla yān kə́ ta kəga dɔ na: Ré ngōkó̰ó̰ḿ Esau əngeī ba dəjeī na ké ḭ̄ i deē yā náā wa, ké ā āw̄ i kə̄ rá wa, ké ɓūtə̄ yá̰a̰ kul̄ ń noí tə́ noō ké i yā náā wa anī,

¹⁹ ī-téĺ ə́dan na i yā nge kəla yān Jakob, na i kadə̄ karī kə́ əlań kadə̄ kɔ́ɔ̄n Esau tə́, ba nəkɔ́ na a reē gōsí tə́ noō.

²⁰ Najə̄ kə́ kógə̄ḿ nəkɔ́ ń toō əda nge kəla yān kə́ nge ko̰ jōó ō, kə́ nge ko̰ mətá ō, de gə̄ ń unən̄ gō yá̰a̰ kul̄ gə̄ ní malang ō, əda na ré əngen̄ Esau ní a, najə̄ ń a ədanən̄ ní n noó,

²¹ ba kə tél kə ədanən̄ na nge kəla yān Jakob na a reē gōdə́ tə́ noō. Tɔdɔ̄ Jakob əda na kadə̄ karī ń na aw̄ kété non tə́ noō na a sɔl̄ kem Esau, adə̄ gō tə́ anī na n-a n-a̰a̰ kumən ō, majanī na a əhɔn kə̄ rɔ̄n tə́ majə ō.

²² Kadə̄ karī ní aw̄ kété non tə́, ba nəkɔ́ tá na̰y gogə́ ndɔ̄ɔ́ ndɔ̄ ń noō tə́, loo ń ndin̄ tū tə́ ní.

Jakob rɔ̄ɔ̄ naā kə Nə́ɓāá

²³ Ni ḭḭ dɔɔ́ ndɔ̄ɔ́ ndɔ̄ nəkɔ́ ń noō tə́, ɔy nə̄yá̰n kə́ jōó gə̄ ō, ngé kəla yān kə́ dəyá̰ kə́ jōó gə̄ ō, ngánən kə́ kutə gidə i kógə̄ḿ gə̄ ō, ba udə man̄ Yabok teē. Udə i loo ń de gə̄ a udən̄ man̄ tū tə́ kə njadə́ ní tə́.

²⁴ Ni ɔydə́ teē man̄ sedə́ ō, ɔy yá̰a̰ yān malang teēń man̄ ō.

²⁵ Ba nəkɔ́ tá na̰y gogə́ kə kérneé. Anī deē kógə̄ḿ rɔ̄ɔ̄n ndɔ̄ɔ́ bátə́ teēń ta gír loo tə́.

²⁶ Loo ń deē ní a̰a̰ kadə̄ a asə tetə Jakob rɔ̄ɔ̄ aĺ anī, ənda ta rɔtə ɓúrən adə̄ ḭḭ ta naā tə́,

²⁷ ba ədan na kə əya̰n kadə̄ n-aw̄ na loo na a tīī na i mbée. Anī Jakob tél ədan na ré tɔ́r̄ tan dɔn tə́ aĺ anī, n-a n-əya̰n kadə̄ aw̄ alé.

²⁸ Deē ní dəjen na ké rīn na i rí wa. Anī Jakob tél ədan na rīn na i Jakob.

²⁹ Deē ní ədan: Rīí na i Jakob to̰ alé. A ɓāríīn̄ na i Israel, tɔdɔ̄ ḭ̄ ī-rɔ̄ɔ̄ kə Nə́ɓāá ō, kə de gēé ō, ba tɔ́gí tɔȳ yādə́.

³⁰ Jakob əda na: m̄-rāāī ɓɔ́, ə́dam̄ rīí! Anī deē ni-tél ədan na: Ī-dəjem̄ rīḿ i yā rāań rí? Ba ni tɔ́r̄ tan dɔ Jakob tə́ loo nəkɔ́ ń noō tə́.

³¹ Jakob əndā rī loo ní na i Penuel, tɔdɔ̄ əda na n-a̰a̰ ta kum Nə́ɓā gágá̰ ba na n-oy alé.

³² Dan ń Jakob teē man̄ kə́ Penuel anī, mbang əɓa. Ni əsō motə tām̄ ta rɔtə ɓúrən ń ḭḭ ta naā tə́ ní.

³³ I tām̄ najə̄ ń noō tə́ n ngán Israel gə̄ a əsanə̄ń ngəɓa dā̰ kə́ ta rɔtə ɓúrən tə́ aĺ ní, tɔdɔ̄ Nə́ɓā ənda Jakob i ta rɔtə ɓúrən tə́ dɔ ngəɓan tə́.