TA KƏLA 3 - Bibəl ta Sar̄

Kɔ́ɔ̄ɓē Nə́ɓā tə̄ɓā dəngam nin̄ kə dəyá̰ kem ndɔr̄ kə́ Eden tə́ kɔ̄ɔ́

¹ Lī i dā̰ kə́ kumən edə̄ tɔȳ gotə dā̰ gə̄ malang kə́ bembeé ń Kɔ́ɔ̄ɓē Nə́ɓā rāā ní. Ni-dəje dəyá̰ na: Nə́ɓā əda na kə ə́saī kan̄ kāgə̄ kə́ ndɔrɔ́ malang aĺ rɔ̄kum a?

² Dəyá̰ tél əda lī na: Nə́ɓā adə̄jí ta róbə kəsa kan̄ kāgə̄ gə̄ kə́ kem ndɔrɔ́.

³ Banī kan̄ kāgə̄ ń ra dan ndɔrɔ́ ní, ɔgə̄jí kɔ̄ɔ́, əda na ré j-əsa ō, j-ɔdə rɔ̄ ō anī, j-a j-oy.

⁴ Lī tél ədan na: Kógə̄ḿ alé! Ā óyiī alé.

⁵ Tām̄ Nə́ɓā ger̄ kadə̄ ndɔ̄ ń ā ə́saī tə́ anī, kumsí a teē kadə̄ ā ī-toī tītə̄ Nə́ɓā ō, ā ī-gerī yá̰á̰ kə́ majə ō, yá̰á̰ kə́ majaĺ ō.

⁶ Dəyá̰ a̰a̰ kadə̄ kan̄ kāgə̄ ní majə kəsa ngá̰ý ō, majə ka̰a̰ ngá̰ý ō, ngur kəsan kadə̄ gerə̄ń yá̰á̰ ngá̰ý rāān ō. Anī ni-əja kan̄ kāgə̄ ní kógə̄ḿ əsa ō, adə̄ ngaan ń ra kadən tə́ ní adə̄ əsa ō.

⁷ Nin̄ jōó mbak kumdə́ teē adə̄ gerə̄n̄ kadə̄ gíŕdə́ i karī, ɓáa anī urə̄n̄ mbī kótə̄ do̰ō̰n̄ gíŕdə́ tə́.

⁸ Dəngam nin̄ kə dəyá̰ oōn̄ kōō Kɔ́ɔ̄ɓē Nə́ɓā a njə̄rā kem ndɔrɔ́ loo sɔlí anī, a̰ȳ aw̄ ɓɔ̄ɔ̄n̄ rɔ̄də́ kɔ̄ɔ́ dan kāgə̄ gə̄ kə́ kem ndɔrɔ́ tə́.

⁹ Kɔ́ɔ̄ɓē Nə́ɓā ɓāŕ dəngam ədan na: Ḭ̄ i rá?

¹⁰ Dəngam tél əda na: M-ōō kōí kem ndɔrɔ́ ɓáa ɓōĺ rāām̄ tɔdɔ̄ gírə́ḿ i karī á m̄-ɓɔ̄ɔ̄ rɔ̄ḿ ní.

¹¹ Kɔ́ɔ̄ɓē Nə́ɓā ədan na: I náā n ədaī na gírí na i karī ní? Kan̄ kāgə̄ ń m-ɔ̄gī kəsa ní ə́sa a?

¹² Dəngam tél ədan na: I dəyá̰ ń ādə̄m̄ seneé ní n adə̄m̄ kan̄ kāgə̄ ní adə̄ m-ə́sá ní.

¹³ Anī Kɔ́ɔ̄ɓē Nə́ɓā əda dəyá̰ na: Ī-rāā yá̰á̰ ń toō i tām̄ rí tə́? Anī dəyá̰ əda na: I lī n gólə̄m̄ á m-ə́sa kan̄ kāgə̄ ní.

¹⁴ Anī Kɔ́ɔ̄ɓē Nə́ɓā əda lī na: Ī-rāā yá̰á̰ ń noō ɓá ní, ndɔ̄ĺ i dɔí tə́ dan dā̰ kə́ ɓēé gə̄ tə́ ō, kə́ bembeé gə̄ tə́ ō. Ā ágə i nang tə́ kə kemií, adə̄ bumbə́ru a ḭḭ kóní tə́ i kə dɔ ndɔ̄ gə̄ ń ā ī-ndiń kə kumuú ní.

¹⁵ M-ā m-ə̄nī madə̄ ba̰ā̰ naā dɔ dáńsí tə́ kə dəyá̰ ō, dɔ dáń gír kaa yāí tə́ kə gír kaa yānneé ō. Ni a rējə̄ dɔí, ba ḭ̄ ā ī-tə́gā gíŕ gándən.

¹⁶ Gō tə́ anī Kɔ́ɔ̄ɓē Nə́ɓā əda dəyá̰ na: Ré ī-ndān̄ ngōn̄ anī, m-ā m̄-rāā kadə̄ rɔ̄í a tōrī ngá̰ý. Ā ójə ngōn̄ i kə rɔ̄ tōrōó. Ngur kaw̄ rɔ̄ ngaaí tə́ a rāāī, ba ni a o̰o̰ ɓē dɔí tə́.

¹⁷ Ta tɔ̄l̄ ta anī ni-əda dəngam na: Ḭ̄ ōō ta nə̄yá̰í adə̄ ə́sa kan̄ kāgə̄ ń m-ɔ̄gī kəsa ní ɓá ní, dɔ nang i kə́ ndɔ̄ĺ najə̄ yāí tə́. Ā á̰á̰ tápə̄ kə dɔ ndɔ̄ gə̄ ń ā ī-ndiń kə kumuú ní tá ā ə́ngeń yá̰a̰ kəsa yāí tū tə́.

¹⁸ Kōn̄ gə̄ kə ngar̄ gə̄ a əɓan̄ tū tə́ najə̄ yāí tə́. Ā ə́sa mu kə́ bembeé.

¹⁹ Ā ī-rāā kəla kə́ úy tətō tá ā ə́ngeń yá̰a̰ kəsa yāí, bátə́ kadə̄ ā ī-tél āwń gogə́ tū nán̄g ń ī-teē tū tə́ ní tə́. Tɔdɔ̄ rāāīn̄ i kə nángāá, adə̄ ā ī-tél kə̄ gogə́ gíŕ nángāá.

²⁰ Adam əndā rī nə̄yá̰n na i Ebə tɔdɔ̄ i Ebə n i kó̰o̰ de gə̄ malang ń ndin̄ kə kumdə́ ní.

²¹ Kɔ́ɔ̄ɓē Nə́ɓā rāā ngə̄rā dā̰ do̰ō̰ gír dəngam nin̄ kə nə̄yá̰neé tə́.

²² Gō tə́ anī ni-əda na: De gə̄ tél ton̄ tītə̄ Nə́ɓā tɔdɔ̄ gerə̄n̄ kɔr̄ nin̄ yá̰á̰ kə́ majə ō, yá̰á̰ kə́ majaĺ ō, naā tə́ ní, majə kadə̄ m-ɔ̄gə̄də́ kəla jīdə́ kəjań kan̄ kāgə̄ kə́ deē əsa anī a ndi kə kumuú, na sōgə́ əsan̄ anī ndin̄ kə kumdə́ ngándáńg.

²³ Kɔ́ɔ̄ɓē Nə́ɓā tə̄ɓā de gə̄ kɔ̄ɔ́ kem ndɔr̄ kə́ Eden tə́ kadə̄ aw̄ ndɔrə̄n̄ dɔ nang ń rāańdə́ ní.

²⁴ Kɔ́ɔ̄ɓē Nə́ɓā tə̄ɓādə́ kɔ̄ɔ́ ba əndā de kə́ dɔ rā̰ tə́ gə̄ kə́ ngé ngɔ̄m̄ loo gə̄ ta ndɔr̄ kə́ Eden tə́, dām̄ kə́ dūn̄ ɓē tə́, kə kaskar kə́ to tītə̄ ndo̰ hor kə́ tūr̄ gidə naā tə́, kadə̄ ngɔ̄mə̄n̄ ta róbə́ kə́ yā kaw̄ń kə̄ rɔ̄ kāgə̄ kə́ deē əsa anī a ndi kə kumuú ní tə́.