TA KƏLA 24 - Bibəl ta Sar̄

Isaak taā Rebeka

¹ Abəraham tɔgə ɓə́gá ngá̰ý kɔ̄ɔ́. Kɔ́ɔ̄ɓē rāā majə seneé tū yá̰a̰ gə̄ tə́ malang.

² Ndɔ̄ kógə̄ḿ tə́ anī, Abəraham əda nge ngɔ̄m̄ yá̰a̰ kənge yān gə̄ malang na: Əla jīí gír bingə̄ḿ tə́,

³ ba ə̄nī míndí ādə̄m̄ kə rī Kɔ́ɔ̄ɓē Nə́ɓā kə́ nge rāā dɔ rā̰ ō, dɔ nang ō, kadə̄ ā ī-taā dəyá̰ dan ngáń kə́ dəyá̰ yā Kanaan gə̄ ń m̄-ndi dɔ dáńdə́ tə́ toō tām̄ yā ngōnə̄ḿ tə́ alé,

⁴ ba kadə̄ ā āw̄ i dɔ nang yāḿ tə́, ɓē ngééḿ gēé, yā taā dəyá̰ tām̄ yā ngōnə̄ḿ Isaak tə́.

⁵ Nge kəla ní tél ədan na: Majanī dəyá̰ ní a gḛy reē seḿ dɔ nang ń toō tə́ aĺ ní, kə m-āw̄ kə ngōnīí dɔ nang ń ī-teē tū tə́ ní tə́ a?

⁶ Abəraham ədan na: M-ɔ́də alé, ī-lōō kaw̄ kə ngōnə̄ḿ tū tə́.

⁷ Kɔ́ɔ̄ɓē Nə́ɓā kə́ dɔ rā̰ tə́ ń teē seḿ kɔ̄ɔ́ ɓē bɔbə́ḿ ō, ɓē ngééḿ gēé ō ní, ɔr̄ najə̄ seḿ ō, ənī míndən adə̄m̄ ō, əda na dɔ nang ń toō n-a n-adə̄ ngán kaaḿ gə̄. Ní, nəkɔ́ a əla deē yān kə́ dɔ rā̰ tə́ kété noí tə́, adə̄ ā ī-taā dəyá̰ i nú tām̄ yā ngōnə̄ḿ tə́.

⁸ Ré dəyá̰ ní gḛy reē seí aĺ anī, míndí ń m-ādə̄ ə̄nī ādə̄m̄ ní ā ī-teē kɔ̄ɔ́ kum tə́, ba ngōnə̄ḿ tá, ā ī-tél yā kaw̄ seneé gogə́ nú alé.

⁹ Nge kəla ní əla jīn gír bingə̄ Abəraham tə́, ənī míndən adə̄n, əda na n-a n-rāā yá̰a̰ gə̄ ń Abəraham ədan ní.

¹⁰ Nge kəla ní əhɔ jámbal kutə kógə̄ḿ dan jámbal yā kɔ́ɔ̄n Abəraham gə̄ tə́ ō, gə̄rā yá̰á̰ kə́ majə majə gə̄ dan yá̰a̰ kənge yā kɔ́ɔ̄n gə̄ tə́ malang ō, ba əsō róbó aw̄ kə̄ dɔ nang kə́ Mesopotami tə́, ɓē Nahor.

¹¹ Dan ń aw̄ ugə̄ dɔ bəlo man̄ kə́ gidə ɓēé tə́ anī, adə̄ jámbal gə̄ tétə̄n̄ kejədə́ nang tə́ ɔrə̄n̄ koō. I kum mbang kə́ loo sɔlí ń dəyá̰ gə̄ a reēn̄ kuȳ maná tə́ ní.

¹² Ni-ndɔ̄ȳ Nə́ɓā, əda na: Kɔ́ɔ̄ɓē, Nə́ɓā yā kɔ́ɔ̄ḿ Abəraham, m̄-rāāī ɓɔ́, ī-rāā ādə̄ m-ə́ngé yá̰á̰ ń m̄-reē sāāá ní ɓōólaā. Ɔ́jə kem majə yāí kə́ tām̄ yā kɔ́ɔ̄ḿ Abəraham tə́ kə̄ ndágá.

¹³ m̄-ra i dɔ bəlo maná n toó. Sḛ́ý laā anī, ngáń kə́ dəyá̰ yā de kə́ kem ɓēé gə̄ a teēn̄ yā reē kuȳ man̄.

¹⁴ M-ā m̄-dəje ngōn̄ kə́ dəyá̰ kógə̄ḿ kə́ dandə́ tə́ kadə̄ ɗel ta jóo yān kadə̄ m-ā̰yń man̄. Ré tél ədam̄ na kə m-ā̰ȳ ō, n-a n-adə̄ jámbal yāḿ gə̄ kadə̄ a̰ȳn̄ ō anī, m-ā m̄-ger̄ kadə̄ i nge ń ə̄ndān tām̄ yā nge kəla yāí Isaak tə́ ní. Loo ń noō tə́ m-ā m̄-ger̄ kadə̄ ī-rāā i kem majə kə kɔ́ɔ̄ḿ.

¹⁵ Ənī tan kə̄ nang tə́ aĺ ɓáý anī, Rebeka reē ugə̄ kə jóo maná dɔ bɔ̄gə̄n tə́. I Betuel ngōn̄ Milka kə́ nə̄yá̰ Nahor ń i ngōkó̰o̰ Abəraham ní n ojə Rebeka ní.

¹⁶ Rebeka i ngōn̄ kə́ dəyá̰ kə́ mandə ngá̰ý. Ni-ger̄ dəngam aĺ ɓáý. Aw̄ dɔ bəlo maná, ɔdə man̄ adə̄ rosə jóo yān ba a tél a aw̄ i kə̄ ɓēé.

¹⁷ Anī nge kəla yā Abəraham a̰ȳ ngɔ̄də̄, tə́nī tan ədan na: m̄-rāāī ɓɔ́, ādə̄ m-ā̰ȳ man̄ kə́ kem jóo yāí tə́ sḛ́ý.

¹⁸ Rebeka tél ədan na: Kɔ́ɔ̄ḿ, ā̰ȳ tā. Ni-usə̄ jóo adə̄ a̰ȳń man̄.

¹⁹ Dan ń adə̄n man̄ adə̄ a̰ȳ oy anī, əda na: M-ā m-ɔ́də tām̄ yā jámbal yāí gə̄ tə́ kadə̄ a̰ȳn̄ asədə́ ō.

²⁰ Ni-tél kə man̄ kə́ kem jóo yān tə́, ɓōkə́ kem yá̰a̰ ka̰ȳ man̄ yā dā̰ gə̄ tə́, ba a̰ȳ ngɔ̄də̄, aw̄ dɔ bəlo maná gogə́ aw̄ uȳ man̄ tām̄ yā jámbal gə̄ tə́ malang.

²¹ Dəngam ní əndā kumən dɔn tə́ kə tan kə́ mbóó, yā ka̰a̰ń ké Kɔ́ɔ̄ɓē a rāā kadə̄ mbā yān a majə aké a majaĺ wa.

²² Dan ń jámbal gə̄ a̰ȳn̄ man̄ oy anī, dəngam ní un nə̄ngá kə́ yā kəla kóń tə́ kə́ rāā kə lɔ́rɔ́ kə́ ɔȳ asə ngán kəlōo mehḛ́ ō, nə̄ngá jī kə́ rāā kə lɔ́rɔ́ gə̄ jōó kə́ ɔȳn̄ tɔȳ ngán kəlōo ɓú ō, adə̄ ngōmandə ní

²³ ba ədan na: Ḭ̄ i ngōn̄ náā? m̄-rāāī ɓɔ́, ə́dam̄. Loo to ɓē bɔbí noō kadə̄ m̄-toń ndɔ̄ɔ́ ɓōólaā kə de gə̄ ń seḿ ní a?

²⁴ Rebeka tél ədan na: Mā i ngōn̄ Betuel, kə́ ngōn̄ Milka nin̄ kə Nahor.

²⁵ Ni-əda ɓáý to̰ na: Mu ō, mə́ro ō, i ngá̰ý loojí, tá loo to to noó ō.

²⁶ Anī dəngam ní tétə̄ kejən, ɔsə non nang tə́ no Kɔ́ɔ̄ɓē tə́,

²⁷ əda na: m̄-tɔ̄ȳ Kɔ́ɔ̄ɓē Nə́ɓā yā kɔ́ɔ̄ḿ Abəraham ń ɔjə kɔ́ɔ̄ḿ kem majə yān kə́ rɔ̄kum kə̄ ndágá ní. Kɔ́ɔ̄ɓē ndɔ́rə̄m̄ ta róbə bátə́ aw̄ seḿ ɓē ngé kɔ́ɔ̄ḿ gēé.

²⁸ Ngōn̄ kə́ dəyá̰ ní a̰ȳ ngɔ̄də̄ aw̄ ɓē kó̰o̰neé, aw̄ ɔjə gotə yá̰a̰ gə̄ ń toō.

²⁹ Ngōkó̰o̰ Rebeka kógə̄ḿ kə́ dəngam i noó, rīn na i Laban. Ni-teē kə ngɔ̄dɔ̄ɔ́, aw̄ kə̄ gō dəngam ní tə́ dɔ bəlo maná,

³⁰ tɔdɔ̄ a̰a̰ nə̄ngá kə́ kón ngōkó̰o̰n tə́ ō, nə̄ngá gə̄ kə́ jīn tə́ ō. Tá ngōkó̰o̰n ənī gotə yá̰a̰ gə̄ ń dəngam ədan ní adə̄ oō ō. Ni-reē ənge dəngam ní dɔ bəlo maná kə jámbal yān gēé,

³¹ anī ədan na: Ī-reē ɓēé loojí, ḭ̄ ń Kɔ́ɔ̄ɓē rāā majə seí ní. Ī-ndi ndágá i tām̄ yā rí tə́? Mə̄kɔ́ m̄-rāā kem kújə ō, m̄-rāā loo yā jámbal yāí gə̄ ō kɔ̄ɔ́ ɓá.

³² Adə̄ nge kəla yā Abəraham aw̄ ɓē Labaná. Laban adə̄ tútən̄ yá̰á̰ kə́ gidə jámbal gə̄ tə́, ba adə̄n̄də́ mu ō, mə́ro ō, adə̄ reēn̄ kə man̄ tə́go njaá adə̄n̄ dəngam ní ō, de gə̄ ń i seneé ní ō. Gō tə́ anī ni-adə̄n yá̰a̰ kəsa.

³³ Banī nge kəla yā Abəraham əda na: M-ā m-ə́sá yá̰á̰ kété no najə̄ ń kadə̄ m-ə́dá tə́ ní alé. Anī Laban əda na: Əda tā.

³⁴ Dəngam ní əda na: Mā i nge kəla yā Abəraham.

³⁵ Kɔ́ɔ̄ɓē rāā majə kə kɔ́ɔ̄ḿ adə̄ ni-ənge yá̰á̰ ngá̰ý. Ənge batə̄ gə̄ kə bə̄yā̰ gə̄ kə man̄g gə̄. Ni-ənge gində̄ arjā̰a̰ ō, lɔ́r ō, ngé kəla kə́ dəngam gə̄ ō, kə́ dəyá̰ gə̄ ō, jámbal gə̄ ō, kərō gə̄ ō.

³⁶ Nə̄yá̰n Sara ojə ngōn̄ seneé dɔ ɓə́gan tə́, adə̄ ni-tél kə yá̰a̰ kənge yān gēé malang adə̄ ngōnə̄n ní.

³⁷ Kɔ́ɔ̄ḿ adə̄ m-ə̄nī míndə́ḿ na kə m̄-taā dəyá̰ dan de kə́ Kanaan tə́ gə̄ ń n-ndi dɔ dáńdə́ tə́ ní tām̄ yā ngōnə̄n tə́ alé,

³⁸ banī kə m-āw̄ dan de gə̄ kə́ gír kojə yā bɔbə̄n tə́, ɓē ngéén gēé, kə m̄-taā dəyá̰ kə m̄-reēń m-ādə̄ ngōnə̄n.

³⁹ Anī m̄-dəjen m-ə́da na: Ba ré dəyá̰ ní mbātə́ reē seḿ ní?

⁴⁰ Anī ni-tél ədam̄ na Kɔ́ɔ̄ɓē ń na n-ndi ta kumən tə́ kə ndɔ̄ gə̄ ní na a əla deē yān kə́ dɔ rā̰ tə́ kadə̄ aw̄ seḿ ō, ni a rāā kadə̄ mbā yāḿ a majə ō, kadə̄ m-ā m̄-taā dəyá̰ kə́ dan ngéén gə̄ tə́ ɓē bɔbə̄neé yā reēń kadə̄ ngōnə̄n.

⁴¹ Ré m-āw̄ ɓē ngéén gēé ba m-ə́nge dəyá̰ aĺ anī, míndə́ḿ ń m-ə̄nī m-ādə̄n ní, na m-ā m̄-teē kɔ̄ɔ́ kum tə́ ō, na ndɔ̄ĺ yān na a əsō dɔḿ tə́ aĺ ō.

⁴² Ɓōólaā, loo ń m-ūgə̄ dɔ bəlo maná ní, m̄-ndɔ̄ȳ Nə́ɓā m-ə́da na: Kɔ́ɔ̄ɓē, Nə́ɓā yā kɔ́ɔ̄ḿ Abəraham, ī-rāā ādə̄ mbā yāḿ ń toō majə.

⁴³ m̄-ra i dɔ bəlo maná n toó, ba ngōn̄ kə́ dəyá̰ ń a teē yā reē kuȳ maná ní, m-ā m̄-gəden man̄, m-ā m-ə́da na: m̄-rāāī ɓɔ́, ādə̄m̄ man̄ kə́ kem jóo yāí tə́ sḛ́ý.

⁴⁴ Ba ré a tél ədam̄ na kə m-ā̰ȳ ō, n-a n-ɔdə tām̄ yā jámbal yāḿ gə̄ tə́ ō anī, m-ā m̄-ger̄ kadə̄ i dəyá̰ ń ə̄ndān tām̄ yā ngōn̄ kɔ́ɔ̄ḿ tə́ ní.

⁴⁵ M-ə̄nā taḿ kə̄ nang tə́ aĺ ɓáý anī, Rebeka teē tū tə́ noō, reē kə jóo yānneé dɔ bɔ̄gə̄n tə́. Aw̄ uȳ man̄ bəloó. m̄-gəden man̄ m-ə́da na: m̄-rāāī ɓɔ́, ādə̄m̄ man̄ tə́ sḛ́ý m-ā̰ȳ.

⁴⁶ Anī ni usə̄ jóo man̄ yān kə́ dɔ bɔ̄gə̄n tə́ láẃ, ba əda na kə m-ā̰ȳ ō, n-a n-adə̄ jámbal yāḿ gə̄ kadə̄ a̰ȳn̄ ō. M-ā̰ȳ man̄ ní ō, ɔdə man̄ adə̄ jámbal gə̄ a̰ȳn̄ ō.

⁴⁷ m̄-dəjen m-ə́da na ké ni i ngōn̄ náā wa. Anī ni-tél əda na ni na i ngōn̄ Betuel kə́ ngōn̄ Nahor nin̄ kə Milkaá. Loo ń noō tə́ m-ə́la nə̄ngá kógə̄ḿ kónən tə́ ō, m̄-tə́la jōó jīn tə́ ō.

⁴⁸ Gō tə́ anī m-ɔ́sə noḿ nang tə́, m̄-tɔ̄ȳ Kɔ́ɔ̄ɓē, Nə́ɓā yā kɔ́ɔ̄ḿ Abəraham, ni ń reē seḿ kə gōó adə̄ m̄-taā ngōn̄ kaa ngōkó̰ó̰ kɔ́ɔ̄ḿ tām̄ yā ngōnə̄n tə́ ní.

⁴⁹ Ń toō ní, ré ī-ndigiī rāā kem majə ō, ra dɔ ndūsí tə́ ō kə kɔ́ɔ̄ḿ anī, ə́damī. Ba ré ɔ́diī aĺ anī, ə́damī ādə̄ m-āw̄ kə̄ loo kə́ rang tə́.

⁵⁰ Laban nin̄ kə Betuel tél ədan̄ na: I Kɔ́ɔ̄ɓē n rāā yá̰a̰ gə̄ ń toō ní, adə̄ najə̄ kə́ kadə̄ jḭḭ j-əda dɔ tə́ gətóo.

⁵¹ Rebeka n ndi noí tə́ noō, āw̄ seneé ādə̄n kə ngōn̄ kɔ́ɔ̄í tītə̄ ń Kɔ́ɔ̄ɓē ədań ní.

⁵² Dan ń nge kəla yā Abəraham oō najə̄ gə̄ ń noō anī, ɔsə non nang tə́ no Kɔ́ɔ̄ɓē tə́.

⁵³ Ni-tḛḛ̄ ta ngɔng mbā yān, ɔy yá̰á̰ súū rɔ̄ kə́ rāā kə gində̄ arjā̰a̰á̰ ō, kə lɔ́rɔ́ ō, kūbə̄ gə̄ ō, adə̄ Rebeka. Ni-adə̄ ngōkó̰o̰n ō, kó̰o̰n ō, yá̰á̰ kə́ gātə̄də́ i ngá̰ý gə̄.

⁵⁴ Gō tə́ anī nge kəla yā Abəraham nin̄ kə de gə̄ ń seneé ní əsan̄ yá̰a̰ ō, a̰ȳn̄ ō, ba to ɓīīn̄. Teē dəloí, dan ń ḭḭn̄ dɔɔ́ anī, nge kəla yā Abəraham əda ngōkó̰o̰ Rebeka nin̄ kə kó̰o̰neé na: Ə́ya̰mī ādə̄ m̄-tél m-āw̄ gogə́ ɓē kɔ́ɔ̄ḿ.

⁵⁵ Ngōkó̰o̰ Rebeka ō, kó̰o̰n ō, tél ədanən̄ na: Ādə̄ ngōn̄ kə́ dəyá̰ ní ndi sejí ndɔ̄ kutə kógə̄ḿ sḛ́ý tá aw̄.

⁵⁶ Nge kəla yā Abəraham tél əda na: Dan ń Kɔ́ɔ̄ɓē rāā adə̄ mbā yāḿ majə ɓá ní, ī-lōōī bā̰ā̰m̄, ə́ya̰mī ādə̄ m̄-tél m-āw̄ gogə́ ɓē kɔ́ɔ̄ḿ.

⁵⁷ Nin̄ ədanən̄ na: Ādə̄ jə-ɓāŕ ngōn̄ kə́ dəyá̰ j-oō yān tá.

⁵⁸ Nin̄ ɓārə́n̄ Rebeka dəjenən̄ na ké gḛy kaw̄ kə dəngam ń toō wa. Ni-tél əda na a̰á̰ā̰.

⁵⁹ Anī nin̄ əya̰n̄ Rebeka ō, nge kətōn kə́ dəyá̰ ō, adə̄ aw̄n̄ kə nge kəla yā Abəraham nin̄ kə de gə̄ yān gēé.

⁶⁰ Nin̄ tɔ́rə̄n̄ tadə́ dɔ Rebeka tə́ ədan̄ na: Ḭ̄, ngōkó̰ó̰jí kə́ dəyá̰, ādə̄ ī-tél nge kojə kósə de kə́ ngá̰ý gə̄ ō, ādə̄ ngán kaaí gə̄ taān̄ ɓē yā madə̄ ba̰ā̰də́ gə̄ ō.

⁶¹ Rebeka nin̄ kə ngé kəla yān kə́ dəyá̰ gə̄ alə̄n̄ gidə jámbal gə̄ tə́, aw̄n̄ kə nge kəla yā Abərahamaá.

⁶² Isaak ndɔ́tə̄ dɔ bəlo man̄ kə́ Lahai Roi tə́ kɔ̄ɔ́, aw̄ ndi dɔ nang kə́ Negeb tə́.

⁶³ Ndɔ̄ kógə̄ḿ tə́ loo sɔlí, Isaak teē aw̄ njə̄rāá kem bembeé. Ni-un kumən kə̄ dɔɔ́ anī a̰a̰ jámbal gə̄ a reēn̄.

⁶⁴ Dan ń Rebeka a̰a̰ Isaak anī, risə dɔ jámbal yān tə́,

⁶⁵ ba dəje nge kəla yā Abəraham na ké deē ń a tə́nī tadə́ noō ké i náā wa. Nge kəla ní tél ədan na i kɔ́ɔ̄n. Kə̄ ta jī gə̄ tə́ noō, Rebeka un kūbə̄ seĺ ta kumən tə́ kɔ̄ɔ́.

⁶⁶ Nge kəla ní ɔjə Isaak gotə yá̰á̰ ń ni-rāā ní malang.

⁶⁷ Gō tə́ anī Isaak aw̄ kə Rebekaá kem kújə́ ń kó̰o̰n Sara ndi tū tə́ kété ní adə̄ tél nə̄yá̰n. Ni-tár Rebeka ngá̰ý adə̄ ənge kem sɔl̄ gotə kó̰o̰n ń gətóó tə́ ní.