TA KƏLA 23 - Bibəl ta Sar̄

Abəraham mang loo dubə̄ń Sara

¹ Sara rāā ɓāl̄ ɓú kə kutə jōó kə kalən kə́ sīrí.

² Ni-oy i Kiryat Arba ń i Hebron ní, dɔ nang kə́ Kanaan tə́. Abəraham nōō nə̄yá̰n.

³ Ni-ḭḭ dɔ nīń nə̄yá̰n tə́ aw̄ ɔr̄ najə̄ kə Het gēé, ədadə́ na:

⁴ Mā i nge nam̄ dɔ dáńsí tə́, adə̄ ādə̄mī bāá yāsí kógə̄ḿ tə́ ādə̄ m̄-dubə̄ń nīń nə̄yá̰ḿ.

⁵ Het gə̄ tél ədan̄ Abəraham na:

⁶ Kɔ́ɔ̄jí, ōō najə̄ yājí. Ḭ̄ i ngār kə́ Nə́ɓā rāā majə seí dɔ dáńjí tə́. Ī-gə̄rā bāá kə́ nelī dan yājí gə̄ tə́ ī-dubə̄ń nə̄yá̰í. Deē kógə̄ḿ kə́ a ɔgī dubə̄ nə̄yá̰í kem bāá yān tə́ danjí tə́ laā gətóo.

⁷ Abəraham ḭḭ ɔsə non nang tə́ ta kum kósə de kə́ kem ɓēé gə̄ tə́ ń i Het gə̄ ní,

⁸ ba ədadə́ na: Ré ī-ndigiī kadə̄ m̄-dubə̄ nə̄yá̰ḿ laā anī, ī-rāāī Epəron ngōn̄ Sohar ɓɔ́ ādə̄mī tə́,

⁹ ādə̄ adə̄m̄ bəlo mbal̄ kə́ Makəpela ń i ta tɔ̄l̄ ta ndɔr̄ yān tə́ ní, ta kumsí tə́ laā, kə gātə̄ kə́ asə loon tə́, kadə̄ tél loo dubə̄ deē yāḿ dɔ dáńsí tə́.

¹⁰ Epəron ń i Het ní ndi dan madə̄n gə̄ tə́. Ni-tél əda Abəraham ta kum Het gə̄ tə́ ō, ta kum de gə̄ ń reēn̄ loo sarya tə́ malang ní ō, na:

¹¹ I beé alé, kɔ́ɔ̄ḿ. Ī-nēl̄ mbīí ōoń najə̄ yāḿ. M-ādī ndɔr̄ ō, m-ādī bəlo mbal̄ kə́ kemeé ō, karī ta kum gír deē yāḿ gə̄ tə́. Ī-dubə̄ nə̄yá̰í kemeé.

¹² Abəraham ɔsə non nang tə́ ta kum kósə de gə̄ tə́ ɓáý to̰,

¹³ ba ɔr̄ najə̄ kə Epəron ta kum de gə̄ tə́ malang əda na: m̄-rāāī ɓɔ́, ba ī-nēl̄ mbīí ōoń najə̄ yāḿ! Ī-taā nar gír ndɔr̄ ní jīḿ tə́ ba ādə̄ m̄-dubə̄ nə̄yá̰ḿ.

¹⁴ Ba Epəron tél əda Abəraham na:

¹⁵ Kɔ́ɔ̄ḿ, ī-nēl̄ mbīí ōoń najə̄ ń m-ā m-ə́daī ní. Dɔ nang kə́ gātə̄n i njáŕ sə́lē kə́ rāā kə gində̄ arjā̰a̰á̰ ɓú sɔ́ i yá̰á̰ kə́ karī dɔ dáńjí tə́ seí. Ī-dubə̄ nə̄yá̰í.

¹⁶ Abəraham ger̄ kum najə̄ ń Epəron ɔr̄ ní, adə̄ tə́da kutə nar ń Epəron gān̄g ní adə̄n ta kum Het gə̄ tə́. I njáŕ sə́lē kə́ rāā kə gində̄ arjā̰a̰á̰ ɓú sɔ́. I sə́lē gə̄ ń de gə̄ a əsan̄ kem ɓēé ní.

¹⁷ Adə̄ ndɔr̄ yā Epəron kə́ Makəpela ń sɔɔ̄ń ta naā kə Mamre ní, ndɔr̄ ō, bəlo mbal̄ ń i tū tə́ ní ō, kāgə̄ gə̄ malang ń ran̄ kem ndɔrɔ́ ní ō,

¹⁸ télən̄ yá̰a̰ yā Abəraham. Het gə̄ ń reēn̄ loo sarya tə́ malang ní, nin̄ i kum tə́.

¹⁹ Gō tə́ anī Abəraham dubə̄ nə̄yá̰n Sara bəlo mbal̄ kə́ kem ndɔr̄ kə́ Makəpela tə́ ń sɔɔ̄n̄ ta naā kə Mamre ń i Hebron ní, dɔ nang kə́ Kanaan tə́.

²⁰ Adə̄ ndɔr̄ ō, bəlo mbal̄ kə́ kemeé ō, télən̄ loo dubə̄ de gə̄ yā Abəraham kə́ mang jī Het gə̄ tə́ ta kumdə́ tə́ malang.