TA KƏLA 19 - Bibəl ta Sar̄

Lot teē ta hor kə́ əsō dɔ ɓē kə́ Sodom tə́

¹ De kə́ dɔ rā̰ tə́ kə́ jōó gə̄ ní ugə̄n̄ Sodom ta jī loo tíbə́ tə́. Lot ndi ta róbə́ kə́ yā kudəń kə̄ kem ɓē kə́ Sodom tə́. Dan ń ni a̰a̰də́ anī, ḭḭ aw̄ tə́nī tadə́. Aw̄ ɔsə non nang tə́ nodə́ tə́,

² ədadə́ na: Kɔ́ɔ̄ḿ gə̄, m̄-rāāsí ɓɔ́, ī-reēī ɓēé looḿ ī-tə́goī njasí ō, ī-to ī-ɓīī ō. Bírí dəloí tá úniī ta njə̄rā yāsí. Nin̄ tél ədanən̄ na: ḿm, j-a jə-ɓīī i ndágə̄ loó.

³ Banī Lot ra sedə́ gagar adə̄ aw̄n̄ ɓēé looneé. Ni-rāā yá̰a̰ kəsa ō, rāā mápá kə́ kanjə̄ kaan ō, adə̄ əsan̄.

⁴ Nin̄ ton̄ nang tə́ aĺ ɓáý anī, de kə́ Sodom gə̄ reē gīrə̄n̄ gidə kújə yā Lot. I de kə́ kem ɓēé gə̄ malang n a̰ȳ reēn̄ ní, əla gír dɔ balsáa gə̄ tə́ bátə́ ugə̄ń dɔ de kə́ tɔgə ɓə́ga gə̄ tə́. Deē kógə̄ḿ kə́ na̰y gogə́ gətóo.

⁵ Nin̄ ɓārə́n̄ Lot ədanən̄ na: De gə̄ ń reēn̄ looí ndɔ̄ɔ́ laā ní, nin̄ i rá? Ī-teē sedə́ kə̄ rɔ̄jí tə́ ādə̄ jə-ɓīī sedə́ kə́ dəyá̰ tə́.

⁶ Lot teē kə̄ rɔ̄də́ tə́ ndágá, utə̄ ta kújə gāngəń gírən,

⁷ ba ədadə́ na: Madə́ḿ gə̄, m̄-rāāsí ɓɔ́, ī-lōōī rāā yá̰á̰ kə́ to kum kaȳ aĺ.

⁸ Ngánə́ḿ kə́ dəyá̰ gə̄ kə́ gerə̄n̄ dəngam aĺ ɓáý gə̄ i jōó. M-ā m̄-reē sedə́ yā kadə̄sí kadə̄ ī-rāāī yá̰á̰ ń kemsí ndigə ní sedə́. Banī ī-rāāī yá̰á̰ kógə̄ḿ kə de gə̄ ń toō alé, tɔdɔ̄ nin̄ i mbā yāḿ gə̄.

⁹ Nin̄ tél ədanən̄ na: Ī-tél kə̄ gogə́. Ḭ̄ ń i tə̄rā ní, ī-sāā gān̄g sarya ɓēé loojí a? Beé ɓáa j-a jə-rāāī īkɔ́ majaĺ kadə̄ tɔȳ yādə́ nin̄. Nin̄ mbəren̄ Lot kə gogə́ ba mān̄ aw̄n̄ yā tetə ta kújə.

¹⁰ Anī ngé kəla kə́ dɔ rā̰ tə́ kə́ jōó gə̄ ní əlan̄ jīdə́ ndɔ́rə̄nəń Lot kum kə̄ gōdə́ tə́ kemeé ba utə̄n̄ ta kújə.

¹¹ Ba rāān̄ adə̄ kum de gə̄ ń ran̄ ta kújə́ tə́ ní a̰a̰ loo alé, əla gír dɔ ngé kə́ dūú gə̄ tə́ bátə́ ugə̄ń dɔ ngé kə́ tɔgə gə̄ tə́, adə̄ nin̄ sāān̄ ta kújə́ sétə́, əngen̄ alé.

¹² Ngé kəla kə́ dɔ rā̰ tə́ kə́ jōó gə̄ ní ədan̄ Lot na: I náā yāí n i laā ɓáý ní? I umií aké i ngání kə́ dəngam gə̄, aké i ngání kə́ dəyá̰ gə̄? Ngééí gə̄ malang ń kem ɓē ń toō tə́ ní, ī-teē sedə́ kɔ̄ɔ́.

¹³ Sekə́n̄ de kə́ kemeé gə̄ ngá̰ý rɔ̄ Kɔ́ɔ̄ɓē tə́, adə̄ ni əlají kadə̄ jə-nujəń kɔ̄ɔ́.

¹⁴ Lot aw̄ ənge umən gə̄ ń nongən̄ ngánən kə́ dəyá̰ gə̄ ní, ədadə́ na kə ḭḭn̄ dɔɔ́ kə teēn̄ kɔ̄ɔ́ kem ɓē ń toō tə́, na Kɔ́ɔ̄ɓē na a nujəń kɔ̄ɔ́. Ba umən gə̄ ndin̄ tītə̄ kə́ ni a ɔr̄ i najə̄ kɔsə kum beé.

¹⁵ Ta gír loo tə́ anī, de kə́ dɔ rā̰ tə́ gə̄ ní ran̄ kə Lotó ta teē kɔ̄ɔ́ kem ɓēé, ədanən̄ na kə un nə̄yá̰n ō, kə ɔy ngánən kə́ dəyá̰ kə́ jōó gə̄ ō, ba kə aw̄n̄ na sōgə́ oyn̄ kem ɓē ń a nujə tə́ ní.

¹⁶ Lot a ɔr̄ bā̰ā̰ ɓáý anī, ngé kəla kə́ dɔ rā̰ tə́ kə́ jōó gə̄ ní əhɔn̄ ta jīn ō, ta jī nə̄yá̰n ō, ta jī ngánən kə́ dəyá̰ kə́ jōó gə̄ ní ō, teēn̄ sedə́ ndágá gidə ɓēé, tɔdɔ̄ Kɔ́ɔ̄ɓē ndigə kajən.

¹⁷ Dan ń teēn̄ sedə́ ndágá oy anī, de kə́ dɔ rā̰ tə́ kógə̄ḿ əda Lot na: Ā̰ȳ ájəń rɔ̄í. Ī-lōō mbel ka̰a̰ loo kə̄ gogə́ ō, ī-lōō dəba kum ndágə mdō tə́ ō, ba ā̰ȳ kum kə̄ mbalá na sōgə́ óy.

¹⁸ Lot tél ədan na: Kɔ́ɔ̄ḿ, m-ásə alé.

¹⁹ Ḭ̄ ī-rāā kem majə seḿ rɔ̄kum, ɔ́jə́ tár yāí kə́ ngá̰ý tām̄ yāḿ tə́ tɔdɔ̄ ī-rāā adə̄ m̄-ndi kə kumḿ. Tā ba m-ásə ka̰ȳ kugə̄ mbalá kanjə̄ kadə̄ yá̰á̰ kə́ tōr̄ əngem̄ róbó alé, adə̄ m-ā m-óý róbó.

²⁰ Á̰a̰ ngōn̄ ɓē kə́ dūú ń noō a? M-ásə ka̰ȳ kugə̄ tū tə́ tɔdɔ̄ i ngɔr. Ə́ya̰m̄ ādə̄ m̄-ɓɔ̄ɔ̄ rɔ̄ḿ tū tə́ m̄-ndiń kə kumḿ, tɔdɔ̄ i ngōn̄ ɓē kə́ dūú.

²¹ De kə́ dɔ rā̰ tə́ ədan na: m̄-rāā kem majə seí ɓáý to̰, adə̄ m-ā m̄-nujə ɓē ń ə́da najə̄n noó alé.

²² Āw̄ láẃ ī-ɓɔ̄ɔ̄ rɔ̄í kemeé. M-ā m̄-rāā yá̰á̰ kógə̄ḿ alé bátə́ kadə̄ ré údə kemeé pá tá. I tām̄ najə̄ ń noō tə́ n əndānəń rī ɓē ní na i Soar ní.

²³ Dan ń Lot udə kem ɓē kə́ Soar tə́ anī, mbang əɓa.

²⁴ Loo ń noō tə́ Kɔ́ɔ̄ɓē rāā adə̄ hor bursu ḭḭ dɔ rā̰ tə́ edə tītə̄ man̄ dɔ ɓē kə́ Sodom tə́ ō, Gomor tə́ ō.

²⁵ Ni-nujə ɓē kə́ jōó gə̄ ń noō kə de kə́ kemeé gə̄ malang ō, nujə ndágə loo malang ō, yá̰a̰ malang kə́ kəɓa dɔ nang tə́ ō.

²⁶ Nə̄yá̰ Lot mbel a̰a̰ loo kum kə̄ gogə́ anī, ni-tél hīl̄ katə̄.

²⁷ Abəraham teē dəloí ɓatə, aw̄ loo ń ra ta kum Kɔ́ɔ̄ɓē tə́ tū tə́ kété ní.

²⁸ Ni-a̰a̰ loo kum kə̄ Sodom ō, Gomor ō, dām̄ kə́ ndágə loo tə́ ō anī, a̰a̰ sa hor kə́ tītə̄ sa hor mbō beé, əɓa tū tə́ luk luk.

²⁹ Dan ń Nə́ɓā a nujə ɓē kə́ kum ndágə loo tə́ gə̄ ní, əga kemən dɔ Abəraham tə́, adə̄ ni-adə̄ Lot teē kɔ̄ɔ́ kum yá̰á̰ kə́ tōr̄ tə́.

Lot nin̄ kə ngánən kə́ dəyá̰ gēé

³⁰ Lot ɓōĺ ndi Soar adə̄ teē kɔ̄ɔ́ kem ɓēé, aw̄ ndi dɔ mbalá kə ngánən kə́ dəyá̰ kə́ jōó gēé. Aw̄ ndi sedə́ bəlo mbal̄ kógə̄ḿ tə́.

³¹ Ndɔ̄ kógə̄ḿ tə́ anī, nge kə́ nga tɔ́gə əda gidən na: Bɔbə̄jí ɓə́ga kɔ̄ɔ́, tá de kə́ dəngam kə́ loo ń toō tə́ kə́ yā taājí tītə̄ ń de gə̄ a rāānəń kə̄ kem ɓē gə̄ tə́ malang ní gətóo.

³² Ī-reē, j-adə̄ bɔbə̄jí kasə nduú adə̄ a̰ȳ, ba jə-to seneé j-ojəń ngán kaan gə̄ j-adə̄n, ādə̄ kojə yā bɔbə̄jí toń ta kaw̄ kə̄ kété.

³³ Adə̄ ndɔ̄ ń noō tə́ ndɔ̄ɔ́ adə̄n̄ bɔbə̄də́ kasə nduú adə̄ a̰ȳ, ba nga tɔ́gə aw̄ to kə bɔbə̄neé. Bɔbə̄n ger̄ ta ton aĺ ō, ta kḭḭn aĺ ō.

³⁴ Teē kə ndɔ̄ kə́ noō anī, nge kə́ nga tɔ́gə əda nge kə́ dūú na: Ndɔ̄ɔ́ laā m̄-to kə bɔbə̄jí kɔ̄ɔ́ ɓá. J-adə̄n kasə nduú ādə̄ a̰ȳ ɓáý to̰ na ta to seneé i dɔí tə́ ɓōólaā. Jə-rāā beé ādə̄ gír kaají toń ta kaw̄ kə̄ kété.

³⁵ Adə̄n̄ bɔbə̄də́ kasə nduú ndɔ̄ ń noō tə́ ɓáý to̰, ba nge kə́ dūú aw̄ to seneé. Bɔbə̄n ger̄ ta ton aĺ ō, ta kḭḭn aĺ ō.

³⁶ Ngán Lot kə́ dəyá̰ kə́ jōó gə̄ ndānə̄n̄ ngán gə̄ kə bɔbə̄də́.

³⁷ Nga tɔ́gə ojə ngōn̄ kə́ dəngam. Ni-əndā rīn na i Moab. Ni i kaa Moab gə̄ ń ndin̄ noó ɓōólaā ní.

³⁸ Nge kə́ dūú ojə ngōn̄ kə́ dəngam ō. Ni-əndā rīn na i Ben Ami. Ni i kaa Amon gə̄ n ndiń noó ɓōólaā ní.