TA KƏLA 16 - Bibəl ta Sar̄

Agar ojə Ismael

¹ Sarai, nə̄yá̰ Abəram, ojə ngōn̄ adə̄n alé. Ba ni-aw̄ kə ɓəlo kə́ dəyá̰ kógə̄ḿ kə́ Ejiptə tə́, rīn na i Agar.

² Anī Sarai əda ngaan Abəram na Kɔ́ɔ̄ɓē na ɔgə̄n kənge ngōn̄ kɔ̄ɔ́ ɓá ní, n-rāān ɓɔ́ ba kə aw̄ kə ɓīī kə ɓəlo yānneé, na majanī n-a n-ənge ngōn̄ kə kūl̄neé. Abəram ndigə najə̄ ń Sarai ədan ní.

³ Sarai un Agar ń i ɓəlo yān ní, adə̄ ngaan Abəram kə́ dəyá̰ tə́, gō ɓāl̄ kə́ kutə ń Abəram ndiń dɔ nang kə́ Kanaan tə́ ní.

⁴ Abəram ɓīī kə Agar adə̄ ndān̄ ngōn̄. Dan ń Agar ger̄ gō ndānə̄n ngōn̄ anī, idə tan gíŕ kɔ́ɔ̄n Sarai tə́.

⁵ Ba Sarai əda Abəram na: Ndū ń tájə̄mə̄n̄ toó tél əsō i dɔí īkɔ́ tə́. I mə̄kɔ́ n m-ādī kə ɓəlo yāḿ, ba loo ń a̰a̰ kadə̄ ndān̄ ngōn̄ anī, idə tan gírə́ḿ tə́. Ní, ādə̄ Kɔ́ɔ̄ɓē gān̄g sarya kə́ dɔ dáńjí tə́ seí.

⁶ Abəram tél əda Sarai na: Ɓəlo yāí i jīí tə́. Ī-rāā yá̰á̰ ń kemií ndigə ní seneé. Anī Sarai rāā Agar majaĺ ngá̰ý adə̄ ni a̰ȳ aw̄ kem dəla loo tə́.

⁷ Nge kaw̄ kəla yā Kɔ́ɔ̄ɓē əngen ta kəɓa man̄ kógə̄ḿ kə́ kem dəla loo tə́. I ta kəɓa man̄ kə́ dɔ róbə́ kə́ ta kaw̄ kə̄ Sur tə́.

⁸ Ni-ədan na: Agar, ɓəlo yā Sarai, ḭ́ḭ i rá? Āw̄ i kə̄ rá? Agar tél ədan na: M-ā̰ȳ i kɔ́ɔ̄ḿ Sarai.

⁹ Anī de kə́ dɔ rā̰ tə́ ní ədan na: Ī-tél āw̄ gogə́ rɔ̄ kɔ́ɔ̄í tə́ ba ōō tan majə.

¹⁰ Kɔ́ɔ̄ɓē a adī ngán kaaí gə̄ ngá̰ý. Deē a asə tə́da kutədə́ alé.

¹¹ Ḭ̄ i kə ngōnōó kemií tə́. A ójə ngōn̄ kə́ dəngam, ba ā ə̄ndā rīn na i Ismael, tɔdɔ̄ Kɔ́ɔ̄ɓē oō nōō wur kɔl yāí.

¹² Ni a to tītə̄ kərō kə́ bembeé. Ni a rɔ̄ɔ̄ de gə̄ malang ō, de gə̄ malang a rɔ̄ɔ̄nən̄ ō. Ni a ndi rɔ̄ madə̄n gə̄ tə́ alé ba a ndi i kə kérneé.

¹³ Agar gír̄ najə̄ əda na: Ni ń a̰a̰m̄ ní, m-á̰a̰n rɔ̄kum a? Gō tə́ anī əndā rī dɔ Kɔ́ɔ̄ɓē ń ɔr̄ najə̄ seneé tə́ ní na i El Roi, kumən na i Nə́ɓā kə́ nge ka̰a̰m̄.

¹⁴ I tām̄ najə̄ ń noō tə́ n əndānəń rī bəlo man̄ ń ra dɔ dán Kades nin̄ kə Bered tə́ ní na i bəlo man̄ yā Lahai Roi ní, kumən na i bəlo man̄ yā nge ndi kə kumuú ń a̰a̰m̄ ní.

¹⁵ Agar ojə ngōn̄ kə́ dəngam kə Abəramaá, adə̄ Abəram əndā rī ngōn̄ ní na i Ismael.

¹⁶ Dan ń Agar ojə Ismael kə Abəramaá ní, ɓāl̄ Abəram i kutə sɔ́sɔ́ gidə i mehḛ́.