TA KƏLA 13 - Bibəl ta Sar̄

¹ Abəram ḭḭ Ejiptə aw̄ gogə́ gō nang kə́ Negeb tə́ kə nə̄yá̰neé ō, kə yá̰a̰ kənge yān gēé malang ō. Lot i seneé.

Abəram nin̄ kə Lot əya̰n̄ naā

² Abəram ənge yá̰á̰ ngá̰ý. Yá̰a̰ kul̄ yān gə̄ ō, gində̄ arjā̰a̰ yān ō, lɔ́r yān ō, i ngá̰ý.

³ Ni-ḭḭ gō nang kə́ Negeb tə́ njə̄rā bátə́ ugə̄ Betel, loo ń udə kújə tandā yān tū tə́ kété tə́ ní, i dɔ dán Betel nin̄ kə Ai tə́.

⁴ I loo ń ni-rāā loo tun̄ yá̰a̰ ba ɓāŕ Nə́ɓā na i Kɔ́ɔ̄ɓē kem ndɔ̄ȳ yān tə́ tū tə́ kété ní.

⁵ Lot ń i seneé ní aw̄ kə batə̄ gə̄ ō, bə̄yā̰ gə̄ ō, man̄g gə̄ ō, kújə tandā gə̄ ō.

⁶ Yá̰a̰ kənge yādə́ i ngá̰ý, adə̄ loo asə kadə̄ ndinə̄ń mbak alé, tɔdɔ̄ Kanaan gə̄ kə Periji gə̄ ndin̄ dɔ nang ní tə́ ō.

⁷ Ngé kul̄ yá̰a̰ yā Abəram gə̄ ō, ngé kul̄ yá̰a̰ yā Lot gə̄ ō, kɔ̄lə̄n̄ naā.

⁸ Anī Abəram əda Lot na: Majə kadə̄ kɔ̄l̄ naā to dɔ dáńjí tə́ aĺ ō, to dɔ dáń ngé kul̄ yá̰a̰ yājí gə̄ tə́ aĺ ō, tɔdɔ̄ jḭḭ seí i ngákó̰o̰ naā gə̄.

⁹ Dɔ nang n to kə̄ noí tə́ malang noó aĺ a? Ī-ndi seḿ to̰ alé. Ré āw̄ dām̄ kə́ ko̰ó̰ tə́ anī, m-ā m-āw̄ dām̄ kə́ geleé tə́. Ré āw̄ dām̄ kə́ geleé tə́ anī, m-ā m-āw̄ dām̄ kə́ ko̰ó̰ tə́.

¹⁰ Lot un kumən kə́ dɔɔ́ anī a̰a̰ ndágə loo kə́ Jurdḛ tə́ ń man̄ aw̄ tū tə́ majə ní. Kété tá kadə̄ Kɔ́ɔ̄ɓē nujə Sodom ō, Gomor ō ní, ndágə loo kə́ Jurdḛ tə́ ní to i tītə̄ loo kə́ kem ndɔr̄ yā Kɔ́ɔ̄ɓē tə́ ō, to i tītə̄ dɔ nang kə́ Ejiptə tə́ ō, bátə́ ugə̄ń Soar.

¹¹ I nang kə́ Jurdḛ tə́ n Lot gə̄rā tām̄ yān nəkɔ́ tə́ malang ní, adə̄ ni-aw̄ kumən kə́ gír ɓē tə́. Nin̄ əya̰n̄ naā i beé.

¹² Abəram ndi i nang kə́ Kanaan tə́, ba Lot ndi i gidə ɓē gə̄ kə́ gō nang kə́ Jurdḛ tə́. Ni-aw̄ bátə́ udə kújə tandā yān Sodom.

¹³ De kə́ Sodom gə̄ i de kə́ kemdə́ ndul ngá̰ý gə̄. Nin̄-rāān̄ yá̰á̰ kə́ majaĺ ngá̰ý gə̄ ta kum Kɔ́ɔ̄ɓē tə́.

¹⁴ Dan ń Lot əya̰n̄ naā kə Abəram ní, Kɔ́ɔ̄ɓē əda Abəram na: Ún kumií kə̄ dɔɔ́ loo ń ī-ra tū tə́ noō, ba á̰a̰ loo kə̄ mbɔ́r ɓē kə́ ko̰ó̰ tə́ ō, mbɔ́r ɓē kə́ geleé tə́ ō, kum kə̄ gír ɓē tə́ ō, no ɓē tə́ ō.

¹⁵ Dɔ nang malang ń á̰a̰ā̰ noó, m-ā m-ādə̄sí sḭḭ̄ kə ngán kaaí gēé, kadə̄ i yá̰a̰ yāsí njɔ́ḿ.

¹⁶ M-ā m̄-rāā kadə̄ ngán kaaí gə̄ i ngá̰ý tītə̄ nán̄g ngárə̄ḿnjēý, kadə̄ ré deē asə tə́dá nán̄g ngárə̄ḿnjēý təgā anī, kɔ́ɔ̄ a asə tə́dá ngán kaaí gə̄ təgā ō.

¹⁷ Ḭ́ḭ dɔɔ́, ī-njə̄rā á̰a̰ loo, á̰a̰ ngālən ō, laan ō, tɔdɔ̄ m-ā m-ādī loo ní.

¹⁸ Abəram ndɔ́tə̄ kə kújə tandā yān gēé, aw̄ ndi ɓē mbo̰ō̰ kāgə̄ sén gə̄ kə́ Mamre tə́ kadə Hebron tə́ ngɔr. Ni-ɔy kūbə̄rū mbal̄ gə̄ tə́ndā dɔ naā tə́ loo ń noō tə́, rāań loo tun̄ yá̰a̰ tām̄ yā Kɔ́ɔ̄ɓē tə́.