TA KƏLA 12 - Bibəl ta Sar̄

Najə̄ yā Abəraham ( 12—25 ) Kɔ́ɔ̄ɓē ɔr̄ najə̄ kə Abəram kadə̄ əya̰ nang yān ō, ngéén gə̄ ō

¹ Kɔ́ɔ̄ɓē əda Abəram na: Ə́ya̰ nang yāí ō, ngééí gə̄ ō, ɓē yā bɔbí ō, ba āw̄ dɔ nang ń m-ā m-ɔ́jiī tə́ ní.

² M-ā m̄-rāā kadə̄ ā ī-tél kaa nápar de kə́ ngá̰ý gə̄. M-ā m̄-rāā majə seí ō, m-ā m̄-rāā kadə̄ rīí ɓār̄ ngá̰ý ō. De gə̄ a tɔ́rə̄n̄ tadə́ dɔ naā tə́ i kə rīí ō.

³ M-ā m̄-rāā majə kə de gə̄ ń a tɔ́rə̄n̄ tadə́ dɔí tə́ ní ō, m-ā m̄-ndɔ̄ĺ deē ń a tájī ní ō. M-ā m̄-rāā majə kə gír kojə yā de gə̄ malang kə́ dɔ nang tə́ sɔɔ̄iń ḭ̄.

⁴ Abəram aw̄ tītə̄ ń Kɔ́ɔ̄ɓē ədanəń ní, ba Lot aw̄ seneé. Dan ń Abəram ḭḭ Haran ní, ɓālə̄n i kutə sīrí gidə i mí.

⁵ Abəram un nə̄yá̰n Sarai ō, Lot ngōn̄ ngōkó̰o̰n ō. Ɔyn̄ yá̰a̰ kənge yādə́ gə̄ malang ō, ɓəlo yādə́ gə̄ ń mangən̄də́ Haran ní ō, ba aw̄n̄ kumdə́ kə̄ Kanaan. Dan ń ɔtə̄n̄ nang kə́ Kanaan tə́ ní,

Abəram ndi dɔ nang kə́ Kanaan tə́ ō, kə́ Ejiptə tə́ ō

⁶ njə̄rān̄ bátə́ ugə̄n̄ kāgə̄ sén kə́ More tə́, loo ń a ɓārə́n̄ na i Sisem ní tə́. Dan ń noō tə́ ní, Kanaan gə̄ ndin̄ dɔ nang ní tə́.

⁷ Kɔ́ɔ̄ɓē ndɔ̄bə̄ Abəram ədan na i nang ń toō n na n-a n-adə̄ ngán kaan gə̄ ní. Abəram ɔy kūbə̄rū mbal̄ gə̄ tə́ndā dɔ naā tə́, rāań loo tun̄ yá̰a̰ tām̄ yā Kɔ́ɔ̄ɓē tə́ loo ń ni ndɔ̄bə̄n tū tə́ ní.

⁸ Ni-ḭḭ loo ń noō tə́, ənda dām̄ loo kə́ mbalá kə́ Betel gān̄g, ba aw̄ udə kújə tandā yān dɔ dán Betel nin̄ kə Ai tə́. Betel i kə̄ no ɓē tə́ ō, Ai i kə̄ dūn̄ ɓē tə́ ō. Ni-rāā loo tun̄ yá̰á̰ kə́ rang ō, ɓāŕ Nə́ɓā na i Kɔ́ɔ̄ɓē kem ndɔ̄ȳ yān tə́ ō.

⁹ Abəram ndi ɓáa ndɔ́təń sḛ́ý sḛ́ý kum kə̄ gō nang kə́ Negeb tə́.

¹⁰ Ɓō əsō kem ɓēé, adə̄ Abəram ḭḭ a aw̄ kə̄ Ejiptə tə́ yā kaw̄ ndi sḛ́ý, tɔdɔ̄ ɓō ní i ngá̰ý dɔ nang kə́ Kanaan tə́.

¹¹ Dan ń a rāān̄ yā kudə kə̄ kem ɓē kə́ Ejiptə tə́ anī, ni-əda nə̄yá̰n Sarai na: Ōō majə! m̄-ger̄ kadə̄ ḭ̄ i dəyá̰ kə́ mandə ngá̰ý.

¹² Ré de kə́ Ejiptə tə́ gə̄ a a̰a̰īn̄ anī, a ədan̄ na ḭ̄ na i nə̄yá̰ḿ, adə̄ a tɔ̄l̄mə̄n̄ kɔ̄ɔ́ ba a ngɔ̄mīn̄ kadə̄ ā ī-ndi kə kumií.

¹³ Ní, m̄-rāāī ɓɔ́ ba ə́dádə́ na ḭ̄ na i ngōkó̰ó̰ḿ kə́ dəyá̰, ādə̄ rāānəń majə seḿ kə kūlīí ō, ādə̄ m̄-ndiń kə kumḿ kə ta kūlīí ō.

¹⁴ Dan ń Abəram ugə̄ Ejiptə tə́ anī, de kə́ Ejiptə tə́ gə̄ a̰a̰n̄ kadə̄ nə̄yá̰n mandə ngá̰ý.

¹⁵ Ngol áskar yā mban̄g Parao̰ gə̄ a̰a̰nən̄ anī, aw̄ wálə̄n̄ najə̄ mandən rɔ̄ kɔ́ɔ̄də́ tə́. Adə̄ aw̄n̄ kə dəyá̰ ní ɓē Parao̰ó̰.

¹⁶ Parao̰ rāā majə kə Abəram najə̄ yā dəyá̰ ní tə́. Ni-adə̄ Abəram batə̄ gə̄ ō, man̄g gə̄ ō, ngé rāā kəla kə́ dəngam gə̄ ō, kə́ dəyá̰ gə̄ ō, kərō kə́ dəngam gə̄ ō, kó̰o̰ kərō gə̄ ō, jámbal gə̄ ō.

¹⁷ Banī Kɔ́ɔ̄ɓē ənda Parao̰ ō, de gə̄ kə́ kem kújə yān tə́ gə̄ ō, kə yá̰á̰ kə́ to wur kɔl gēé najə̄ yā Sarai nə̄yá̰ Abəram tə́.

¹⁸ Anī Parao̰ ɓāŕ Abəram ədan na: Ī-rāā i rí kə́ beé seḿ? Ə́dam̄ na i nə̄yá̰í alé i tām̄ rí tə́?

¹⁹ I tām̄ rí tə́ á ə́da na i ngōkó̰ó̰í kə́ dəyá̰ adə̄ m̄-taān kə́ dəyá̰ tə́ ní? Ń toō ní á̰a̰ nə̄yá̰í n toó, ī-taān ba āw̄ kɔ̄ɔ́.

²⁰ Parao̰ əda de gə̄ yān gə̄ na kə tə̄ɓānən̄ kadə̄ aw̄ kə nə̄yá̰neé ō, kə yá̰a̰ kənge yān gēé malang ō.