TƏ́DA 7 - Bibəl ta Sar̄

Púsə man̄g gə̄ kə́ ngār gə̄ adə̄n̄

¹ Ndɔ̄ ń Moijə tɔ̄ləń ta kújə yā Nə́ɓā tə́ ní, ur yibə̄ kə́ táĺ dɔ tə́ ɔrə̄ń kamən ō, ɔrə̄ń kam̄ yá̰a̰ malang kə́ kemeé ō tām̄ yā Nə́ɓā tə́. Ur yibə̄ dɔ loo tun̄ yá̰á̰ tə́ ɔrə̄ń kamən ō, ɔrə̄ń kam̄ yá̰a̰ rāā kəla gə̄ kə́ dɔ tə́ ō tām̄ yā Nə́ɓā tə́.

² Gō tə́ anī ngār gə̄ kə́ dɔ gír ɓē gə̄ yā ngán Israel gə̄ tə́ ń tə́dan̄ kutə de gə̄ ní ndɔ́tə̄n̄ kə̄ kété reē adə̄n̄ kadə̄ karī yādə́ gə̄.

³ Nin̄ adə̄n̄ Kɔ́ɔ̄ɓē púsə man̄g gə̄ mehḛ́ kə́ lábə̄n̄ yá̰a̰ dɔ tə́ ō, man̄g kutə gidə i jōó ō. Púsə gə̄ ní ngār gə̄ əhɔn̄ naā i jōó jōó n a adə̄nəń ní, ba man̄g gə̄ tá i kə dɔdə́ gēé. Nin̄ aw̄nəń ta kújə yā Nə́ɓā tə́.

⁴ Kɔ́ɔ̄ɓē əda Moijə na:

⁵ Ī-taā kadə̄ karī gə̄ ń reēnəń ní. Púsə gə̄ kə man̄g gə̄ ń noō i yā rāań kəla kújə kənge naā. Ādə̄ ngán Lebi gə̄ kə gō kəla yādə́ gēé.

⁶ Moijə taā púsə gə̄ kə man̄g gə̄ ní nə̄ɓō ngán Lebi gə̄.

⁷ Ni-adə̄ ngán Gerson gə̄ púsə jōó ō, man̄g sɔ́ ō, kə gō kəla yādə́ gēé.

⁸ Adə̄ ngán Merari gə̄ púsə sɔ́ ō, man̄g sɔ́sɔ́ ō, kə gō kəla yādə́ gēé. I Itamar ngōn̄ Aaro̰ nge tun̄ yá̰a̰ n i dɔ ngán Merari tə́ yā rāań kəla ní.

⁹ Ni-adə̄ ngán Kehat alé, tām̄ kəla yādə́ i kəla kətō yá̰á̰ kə́ yā ɓōĺ gidə gə̄ dɔ bɔ̄gə̄də́ tə́.

Kadə̄ karī kə́ yā kɔrə̄ń kam̄ loo tun̄ yá̰a̰

¹⁰ Ndɔ̄ ń urnə̄ń yibə̄ dɔ loo tun̄ yá̰á̰ tə́ yā kɔrə̄ń kamən ní, ngār gə̄ reēn̄ kə kadə̄ karī gə̄ ta loo tun̄ yá̰á̰ tə́ yā rāań pétən.

¹¹ Kɔ́ɔ̄ɓē əda Moijə na: Ādə̄ ngār gə̄ reēn̄ ndɔ̄ kógə̄ḿ kógə̄ḿ kə dɔdə́ gēé ndējə̄n̄ kadə̄ karī yādə́ gə̄ kə́ yā rāań pétə loo tun̄ yá̰a̰.

^12-83 Ndɔ̄ kə́ ta kəga dɔ i ndɔ̄ yā Nason ngōn̄ Aminadab kə́ gír ɓē yā Juda tə́. Ndɔ̄ kə́ nge ko̰ jōó i ndɔ̄ yā Netanel ngōn̄ Suar kə́ gír ɓē yā Isakar tə́. Ndɔ̄ kə́ nge ko̰ mətá i ndɔ̄ yā Eliab ngōn̄ Helon kə́ gír ɓē yā Jabulo̰ tə́. Ndɔ̄ kə́ nge ko̰ sɔ́ i ndɔ̄ yā Elisur ngōn̄ Sedeur kə́ gír ɓē yā Ruben tə́. Ndɔ̄ kə́ nge ko̰ mí i ndɔ̄ yā Selumiel ngōn̄ Surisaday kə́ gír ɓē yā Simeo̰ tə́. Ndɔ̄ kə́ nge ko̰ mehḛ́ i ndɔ̄ yā Eliasap ngōn̄ Dewel kə́ gír ɓē yā Gad tə́. Ndɔ̄ kə́ nge ko̰ sīrí i ndɔ̄ yā Elisama ngōn̄ Amihud kə́ gír ɓē yā Epəraim tə́. Ndɔ̄ kə́ nge ko̰ sɔ́sɔ́ i ndɔ̄ yā Gamliel ngōn̄ Pedasur kə́ gír ɓē yā Manase tə́. Ndɔ̄ kə́ nge ko̰ ndōhó i ndɔ̄ yā Abidan ngōn̄ Gidoni kə́ gír ɓē yā Benjamḛ tə́. Ndɔ̄ kə́ nge ko̰ kutə i ndɔ̄ yā Ahiejer ngōn̄ Amisaday kə́ gír ɓē yā Dan tə́. Ndɔ̄ kə́ nge ko̰ kutə gidə i kógə̄ḿ i ndɔ̄ yā Pagiel ngōn̄ Okəran kə́ gír ɓē yā Aser tə́. Ndɔ̄ kə́ nge ko̰ kutə gidə i jōó i ndɔ̄ yā Ahira ngōn̄ Enan kə́ gír ɓē yā Nepətali tə́. Kadə̄ karī gə̄ ń reēnəń kógə̄ḿ kógə̄ḿ kə dɔdə́ gēé ní n toó: Səmbē kə́ laa kə́ rāān̄ kə gində̄ arjā̰a̰ kə́ kɔȳn i ngán kəlōo gə̄ 1 300 ō, səmbē kə́ lú kə́ rāān̄ kə gində̄ arjā̰a̰ kə́ kɔȳn i ngán kəlōo gə̄ 700 ō, kə gō yá̰a̰ mbɔ̄jə́ kɔȳ yá̰á̰ kə́ kem loo kə́ táĺ tə́. Səmbē gə̄ ní ndujə̄ kə́ yā ndējə̄ kə́ ló̰ȳ kə yibīí rosə kemdə́ jōó mbak. Nin̄ reēn̄ kə kópə lɔ́r kə́ kɔȳn i ngán kəlōo gə̄ ɓú kə́ ndujə̄ yá̰á̰ kə́ kotə majə rosə kem ō, man̄g kə́ bəra kógə̄ḿ ō, bal batə̄ kógə̄ḿ ō, ngōn̄ batə̄ kógə̄ḿ kə́ ɓāl̄ kógə̄ḿ ō, kadə̄ i yá̰a̰ tun̄ kə́ yā róō horoó, bal bə̄yā̰ kə́ yā tun̄ tām̄ yā majaĺ tə́ ō, man̄g gə̄ jōó ō, bal batə̄ gə̄ mí ō, bal bə̄yā̰ gə̄ mí ō, ngán batə̄ kə́ ɓāl̄ kógə̄ḿ gə̄ mí ō, kadə̄ i yá̰a̰ tun̄ gə̄ kə́ tām̄ yā kem kógə̄ḿ tə́.

⁸⁴ Kutə kadə̄ karī gə̄ malang ń ngār gə̄ yā ngán Israel gə̄ adə̄n̄ tām̄ yā loo tun̄ yá̰á̰ tə́ ndɔ̄ ń urnə̄ń yibə̄ dɔ tə́ ní n toó: Səmbē kə́ laa gə̄ kə́ rāān̄ kə gində̄ arjā̰a̰ i kutə gidə i jōó ō, səmbē kə́ rúu gə̄ kə́ rāān̄ kə gində̄ arjā̰a̰ i kutə gidə i jōó ō, kópə lɔ́r gə̄ i kutə gidə i jōó ō.

⁸⁵ Səmbē kə́ laa kógə̄ḿ kɔȳn i ngán kəlōo 1 300 ō, səmbē kə́ ɗúú kógə̄ḿ kɔȳn i ngán kəlōo gə̄ 700 ō. Kɔȳ gində̄ arjā̰a̰ malang ń rāānəń səmbē gə̄ ń noō ní i kəlōo 24, i kə gō yá̰a̰ mbɔ̄jə́ kɔȳ yá̰á̰ kə́ kem loo kə́ táĺ tə́.

⁸⁶ Kopə lɔ́r gə̄ ní kógə̄ḿ kɔȳn i ngán kəlōo 100, adə̄ kutə gidə i jōó mbak ní kɔȳdə́ i ngán kəlōo 1 200. Ndujə̄ yá̰á̰ kə́ kotə majə rosə kemdə́ malang.

⁸⁷ Kutə dā̰ gə̄ kə́ róō horoó kadə̄ Nə́ɓā ní n toó: Man̄g kə́ bəra gə̄ i kutə gidə i jōó ō, bal batə̄ gə̄ i kutə gidə i jōó ō, ngán batə̄ kə́ ɓāl̄ kógə̄ḿ gə̄ i kutə gidə i jōó ō, naā tə́ kə ndujə̄ kə́ yā ndējə̄ dɔdə́ gə̄ tə́. Bal bə̄yā̰ gə̄ kə́ yā tun̄ tām̄ yā majaĺ tə́ i kutə gidə i jōó.

⁸⁸ Dā̰ gə̄ kə́ yā tun̄ tām̄ yā kem kógə̄ḿ tə́ n toó: Man̄g kə́ bəra gə̄ i kutə jōó gidə i sɔ́ ō, bal batə̄ gə̄ i kutə mehḛ́ ō, bal bə̄yā̰ gə̄ i kutə mehḛ́ ō, ngán batə̄ kə́ ɓāl̄ kógə̄ḿ gə̄ i kutə mehḛ́ ō, kadə̄ karī gə̄ ń urən̄ yibə̄ dɔ loo tun̄ yá̰á̰ tə́ oy anī adə̄n̄ tām̄ yā rāań pétən ní n noó.

⁸⁹ Dan ń Moijə udə kem kújə kənge naā tə́ yā kɔr̄ najə̄ kə Kɔ́ɔ̄ɓēé anī, ni oō ndū Kɔ́ɔ̄ɓē loo kɔr̄ najə̄ tə́ seneé. Ndūn ní ɓār̄ i mbo̰ō̰ ngé ngɔ̄m̄ loo kə́ dɔ rā̰ tə́ gə̄ ń ran̄ dɔ ta sandúkə madə̄ naā tə́ ní. Loo ń noō tə́ ni-ɔr̄ najə̄ seneé.