TƏ́DA 6 - Bibəl ta Sar̄

Ndū najə̄ kə́ dɔ de kə́ ɔr̄ kam̄ rɔ̄n tām̄ yā Kɔ́ɔ̄ɓē tə́

¹ Kɔ́ɔ̄ɓē mēr̄ Moijə

² kəda ngán Israel gə̄ najə̄ ń toō: Ré de kə́ dəngam, aláa kə́ dəyá̰ ənī ndūn yā kɔr kam̄ rɔ̄n tām̄ yā Kɔ́ɔ̄ɓē tə́ anī,

³ a mbātə́ kasə kan̄ kāgə̄ nduú ō, kasə kə́ rang gə̄ ō, a a̰ȳ kasə kan̄ kāgə̄ nduú kə́ masə̄ aĺ ō, kasə kə́ rang kə́ masə̄ aĺ ō, a a̰ȳ man̄ kan̄ kāgə̄ nduú aĺ ō, a əsa kan̄ kāgə̄ nduú kə́ mbōl̄ aĺ ō, kə́ tutə aĺ ō.

⁴ Ndɔ̄ malang ń a ɔrə̄ń kam̄ rɔ̄n tām̄ yā Kɔ́ɔ̄ɓē tə́ ní, a əsa yá̰á̰ kə́ rāā kə kan̄ kāgə̄ nduú aĺ ō, kə kuməneé aĺ ō, kə gidəneé aĺ ō.

⁵ A dəsā dɔn kə nə́ngá kem ndɔ̄ gə̄ ń ɔrə̄ń kam̄ rɔ̄n tām̄ yā Kɔ́ɔ̄ɓē tə́ ní alé. A əya̰ nənga dɔn kadə̄ ngāl̄. Ni i de kə́ táĺ bátə́ kadə̄ ndɔ̄ gə̄ ń ní gān̄g ní təgānəń.

⁶ Kem ndɔ̄ gə̄ ń ɔrə̄ń kam̄ rɔ̄n tām̄ yā Kɔ́ɔ̄ɓē tə́ ní, a aw̄ rɔ̄ nīń deē tə́ alé.

⁷ Ká i nīń bɔbə̄n, aké i kó̰o̰n, aké i ngōkó̰o̰n kə́ dəngam, aké i kə́ dəyá̰ gə̄gē, ni a ɔdə alé na sōgə́ majaĺ tákə̄n, tām̄ nənga dɔn kə́ kanjə̄ kəja ní ɔjə kə ndágá kadə̄ ni i de kə́ ɔr̄ kam̄ rɔ̄n tām̄ yā Nə́ɓā yān tə́.

⁸ Kem ndɔ̄ gə̄ ń ɔrə̄ń kam̄ rɔ̄n tām̄ yā Kɔ́ɔ̄ɓē té ní, ni i de kə́ táĺ tām̄ yā Kɔ́ɔ̄ɓē tə́.

⁹ Ba ré de kə́rēý gān̄g dɔɔ́ oy kadən tə́ kem ndɔ̄ gə̄ ń noō tə́ adə̄ majaĺ tákə̄n anī, ni a dəsā dɔn ndɔ̄ ń a unənə̄ń majaĺ dɔn tə́ ní, adə̄ i kə ndɔ̄ kə́ nge ko̰ sīrí.

¹⁰ Kə ndɔ̄ kə́ nge ko̰ sɔ́sɔ́ anī ni a aw̄ kə dér gutə gə̄ jōó, aláa ngáń dér dum gə̄ jōó, ta kújə kənge naā tə́ yā kadə̄ nge tun̄ yá̰a̰.

¹¹ Nge tun̄ yá̰a̰ a tun̄ yel̄ kə́ kógə̄ḿ tām̄ yā majaĺ tə́ ō, a róō kə́ noō yā kadə̄ Kɔ́ɔ̄ɓē ō. Ni a rāā yá̰á̰ kə́ yā kutə̄ń dɔ majaĺ yā nge kɔr̄ kam̄ rɔ̄n tām̄ yā Kɔ́ɔ̄ɓē tə́ ń nīń ɔdə rɔ̄n ní. Ndɔ̄ nəkɔ́ ń noō tə́ ni a ədan na ta róbə to tām̄ yān tə́ kadə̄ tél ɔ̄r kam̄ rɔ̄n gogə́ rang tām̄ yā Kɔ́ɔ̄ɓē tə́.

¹² Loo ń noō tə́ deē ní a tɔ̄l̄ ngōn̄ batə̄ kə́ ɓāl̄ kógə̄ḿ yā tun̄ kadə̄ Nə́ɓā tām̄ yā majaĺ yān tə́, ba a tél yā kɔr̄ kam̄ rɔ̄n gogə́ rang tām̄ yā Kɔ́ɔ̄ɓē tə́. Ndɔ̄ kə́ kété gə̄ ń ni-gān̄g yā kɔrə̄ń kam̄ rɔ̄n tām̄ yā Kɔ́ɔ̄ɓē tə́ ní i kə́ yā kəya̰də́ kɔ̄ɔ́, tām̄ kɔr̄ kam̄ rɔ̄ yān i kə́ majaĺ tákə̄.

¹³ Deē ń ɔr̄ kam̄ rɔ̄n tām̄ yā Kɔ́ɔ̄ɓē tə́ ní, ndū najə̄ kə́ tām̄ yān tə́ ń toó: Ta tɔ̄l̄ ta ndɔ̄ gə̄ ń ɔrə̄ń kam̄ rɔ̄n tə́ ní, a reēn̄ seneé ta kújə kənge naā tə́.

¹⁴ Ni a reē kə yá̰a̰ ndējə̄ yānneé yā kadə̄ Kɔ́ɔ̄ɓē: Bal batə̄ kə́ ɓāl̄ kógə̄ḿ kə́ loon kógə̄ḿ nujə aĺ kadə̄ i yá̰a̰ tun̄ kə́ yā róō horoó ō, mandə̄ batə̄ kə́ ɓāl̄ kógə̄ḿ kə́ loon kógə̄ḿ nujə aĺ kadə̄ i yá̰a̰ tun̄ kə́ tām̄ yā majaĺ tə́ ō, bal batə̄ kə́ loon kógə̄ḿ nujə aĺ kadə̄ i yá̰a̰ tun̄ kə́ tām̄ yā kem kógə̄ḿ tə́ ō.

¹⁵ A adə̄ mápá kə́ rāā kə ndujə̄ kə́ lándāá kanjə̄ kaa mápa kem keē kógə̄ḿ ō, mápá kə́ rāā kə ndujə̄ kə́ ló̰ȳ kə yibīí ō, makəla gə̄ kə́ rāān̄də́ kanjə̄ kaa mápa ba tə́ten̄ yibə̄ dɔ tə́ ō, ndujə̄ ō, kasə nduú kə́ tām̄ yā yá̰á̰ kə́ yā tun̄ gə̄ tə́ ō.

¹⁶ Nge tun̄ yá̰a̰ a aw̄ kə yá̰a̰ ndējə̄ gə̄ ń noō ta kum Kɔ́ɔ̄ɓē tə́. Go tə́ anī a tun̄ dā̰ kə́ tām̄ yā majaĺ tə́ ní ō, dā̰ kə́ yā róō horoó kadə̄ Kɔ́ɔ̄ɓē ní ō.

¹⁷ Ni a tun̄ bal batə̄ kə́ tām̄ yā kem kógə̄ḿ tə́ ní ō, a ndējə̄ Kɔ́ɔ̄ɓē mápá kə́ kanjə̄ kaa mápa ń to kem keé ní ō, ndujə̄ ní ō, a tə́te kasə kan̄ kāgə̄ nduú ní ō.

¹⁸ Nge kɔr̄ kam̄ rɔ̄n tām̄ yā Kɔ́ɔ̄ɓē tə́ ní a dəsā dɔn ta kújə kənge naā tə́, ba a ɓōkə́ nənga dɔn kum hor ń a o̰o̰ gíŕ yá̰a̰ tun̄ kə́ tām̄ yā kem kógə̄ḿ tə́ ní.

¹⁹ Ré deē ń ɔr̄ kam̄ rɔ̄n tām̄ yā Kɔ́ɔ̄ɓē tə́ ní dəsā dɔn oy anī, nge tun̄ yá̰a̰ a un kɔ̄bə̄ bal batə̄ ń ndīrə̄n̄ ní ō, mápá kə́ rāā kanjə̄ kaa mápa ń to kem keé ní kógə̄ḿ ō, makəla kə́ kanjə̄ kaa mápa kógə̄ḿ ō, yā tə́nīdə́ kem jīn tə́.

²⁰ Nge tun̄ yá̰a̰ a ndējə̄də́ kə gō looneé ta kum Kɔ́ɔ̄ɓē tə́. Yá̰a̰ ndējə̄ gə̄ ń noō i yá̰á̰ kə́ a télnə̄ń yā kadə̄ nge tun̄ yá̰a̰ dɔ nganjə bal batə̄ tə́ ō, dɔ ɓúrən tə́ ō. Loo ń noō tə́ nge kɔr̄ kam̄ rɔ̄n tām̄ yā Kɔ́ɔ̄ɓē tə́ a asə ka̰ȳ kasə kan̄ kāgə̄ nduú tā.

²¹ Ndū najə̄ kə́ dɔ deē ń ənī ndūn yā kɔr̄ kam̄ rɔ̄n tām̄ yā Kɔ́ɔ̄ɓē tə́ ní n noóō, yá̰a̰ gə̄ ń ni a adə̄ Kɔ́ɔ̄ɓē tām̄ kɔr̄ kə́ ni-ɔr̄ kam̄ rɔ̄n tām̄ yān tə́ ní n noó ō. Ré tɔ́gən asə anī ni a asə kadə̄ Kɔ́ɔ̄ɓē yá̰á̰ kə́ rang dɔ tə́ kə gō kem ndigə yānneé. Yá̰á̰ ń ni-ənī ndūn dɔ tə́ yā kadə̄ ní, a adə̄ i kə gō ń ndū najə̄ kə́ dɔ nge kɔr̄ kam̄ rɔ̄n tām̄ yā Kɔ́ɔ̄ɓē tə́ əda ní.

Loo tɔ́r̄ ta dɔ ngán Israel gə̄ tə́

²² Kɔ́ɔ̄ɓē ɔr̄ najə̄ kə Moijə, ədan na:

²³ Kum najə̄ gə̄ ń kadə̄ Aaro̰ nin̄ kə ngánən gēé tɔ́r̄nəń tadə́ dɔ ngán Israel gə̄ tə́ ní n toó:

²⁴ Ādə̄ Kɔ́ɔ̄ɓē rāā majə sesí ō, ngɔ̄m̄sí ō.

²⁵ Ādə̄ Kɔ́ɔ̄ɓē a̰a̰sí kə kumən kə́ majaá ō, əhɔsí kə̄ rɔ̄n tə́ majə ō.

²⁶ Ādə̄ Kɔ́ɔ̄ɓē əndā kumən gōsí tə́ ō, sɔl̄ kemsí ō.

²⁷ I beé n a ədanə̄ń rīḿ dɔ ngán Israel gə̄ tə́ kadə̄ m̄-rāań majə sedə́ ní.