TƏ́DA 36 - Bibəl ta Sar̄

Loo taā ngaa yā dəyá̰ gə̄ ń əngen̄ dɔ nang yá̰a̰ ndəbā tə́ ní

¹ Ngán kaa Jəjep gə̄ ń i ngār gə̄ kə́ dɔ de gə̄ kə́ gír kaa yā Galaad kə́ ngōn̄ Makir kə́ ngōn̄ Manase ní, reē əngen̄ Moijə ō, ngār gə̄ kə́ dɔ gír ɓē yā ngán Israel gə̄ tə́ ō,

² ba ədan̄də́ na: Kɔ́ɔ̄jí Moijə, dan ń Kɔ́ɔ̄ɓē mērī túgə̄ wə̄lā kadə̄ ī-nə̄ɓoń ngán Israel gə̄ dɔ nang kə́ Kanaan ní, mērī i kadə̄ ngán Selopad kə́ dəyá̰ gə̄ dɔ nang ngōkó̰ó̰jí Selopad ō.

³ Ba ré nin̄ taān̄ ngaan gír ɓē kə́ rang yā ngán Israel gə̄ tə́ anī, a ɔrə̄n̄ dɔ nang yādə́ kɔ̄ɔ́ mbo̰ō̰ yā bɔbə̄jí gə̄ tə́ yā kərōń yā gír ɓē kə́ rang ń a aw̄n̄ tū tə́ ní. Adə̄ ta dɔ nang ń wə̄lā əhɔ adə̄jí ni a gá̰a̰.

⁴ Adə̄ ré ɓāl̄ Jubile yā ngán Israel gə̄ ugə̄ anī, dɔ nang yādə́ kə́ gír ɓē yā bɔbə̄jí gə̄ tə́ a tél i dɔ nang kə́ gír ɓē kə́ rang tə́ ń nin̄ taān̄ ngaa tū tə́ ní ɗer.

⁵ Moijə adə̄ ngán Israel gə̄ ndū najə̄ gə̄ ń toō kə gō ndū Kɔ́ɔ̄ɓēé əda na: Najə̄ ń de kə́ gír ɓē yā Jəjep tə́ gə̄ ədan̄ ní i najə̄ kə́ rɔ̄kum.

⁶ Adə̄ yá̰á̰ kə́ dɔ ngán kə́ dəyá̰ gə̄ yā Selopad tə́ ń Kɔ́ɔ̄ɓē əda ní n toó: Nin̄ asən̄ taā dəngam ń kemdə́ ndigə ní, ba kadə̄ i dəngam kə́ gír ɓē yā bɔbə̄də́ tə́ tá.

⁷ I beē tá ngán Israel gə̄ a dáyə̄n̄ kə dɔ nangaá dɔ dáń gír ɓē yādə́ gə̄ tə́ kə̄ yóō kə̄ laā alé. ngán Israel gə̄ kógə̄ḿ kógə̄ḿ malang a əhɔn̄ dɔ nang ń i yá̰a̰ ndəbā kə́ gír ɓē yā bɔbə̄də́ gə̄ tə́ ní jīdə́ jōó.

⁸ Ré ngōn̄ Israel kə́ dəyá̰ ənge dɔ nang yā bɔbə̄n yá̰a̰ ndəbā tə́ anī, a taā i dəngam kə́ dan gír kaa gə̄ kə́ ɓē yā bɔbə̄n tə́. I beé n ngán Israel gə̄ kógə̄ḿ kógə̄ḿ a əngenə̄n̄ dɔ nang yā bɔbə̄də́ gə̄ yá̰a̰ ndəbā tə́ ní.

⁹ Ngán Israel gə̄ a dáyə̄n̄ kə dɔ nangaá dɔ dáń gír ɓē yādə́ gə̄ tə́ kə̄ yōó kə̄ laā alé. gír ɓē gə̄ yā ngán Israel gə̄ kógə̄ḿ kógə̄ḿ a əhɔn̄ dɔ nang yādə́ gə̄ ń əngen̄ yá̰a̰ ndəbā tə́ ní jīdə́ jōó.

^10-11 Ngán Selopad kə́ dəyá̰ gə̄ ń rīdə́ na i Mala ō, Tirsa ō, Hogəla ō, Milka ō Noa ō ní, rāān̄ tītə̄ ń Kɔ́ɔ̄ɓē ədań Moijə ní: Nin̄ táān̄ ngáń ngákó̰o̰ bɔbə̄də́ gə̄.

¹² Adə̄ i dəngam gə̄ kə́ gír kojə gə̄ yā Manase ngōn̄ Jəjep tə́. I beé ń dɔ nang yādə́ gə̄ ń əngen̄ yá̰a̰ ndəbā tə́ ní na̰yn̄ kə́ gír ɓē ń gír kaa yā bɔbə̄də́ i tīī tə́ ní.

¹³ Gō míndə gə̄ ō, ndū najə̄ gə̄ ō ń Kɔ́ɔ̄ɓē ndang adə̄ ngán Israel gə̄ kə ta kūl̄ Moijə ndágə loo kə́ Moab tə́, kadə̄ bā Jurdḛ tə́, loo ń sɔɔ̄n̄ ta naā kə ɓē kə́ Jeriko ní n noó.