TƏ́DA 34 - Bibəl ta Sar̄

Dɔ nin̄ dɔ nang kə́ Kanaan

^1-2 Kɔ́ɔ̄ɓē mēr̄ Moijə kəda ngán Israel gə̄ gō míndən gə̄ ń toō: Ré ā ūgī dɔ nang kə́ Kanaan tə́ anī, dɔ nang ń a tél dɔ nang yāsí ní i dɔ nang kə́ Kanaan ń dɔ ninə̄n gə̄ ton̄ toó:

³ Loo kə́ mángá kə́ Təsin ō, dɔ nang kə́ Edom ō n i dɔ nin̄ dɔ nang yāsí kə́ dām̄ mbɔ́r ɓē kə́ geleé tə́ ní. Dɔ nin̄ dɔ nang yāsí kə́ dām̄ kə́ gír ɓē tə́ a əla gír i ta ngóy bā katə̄ tə́, a əla gír i ta ngóyn kə́ dām̄ mbɔ́r ɓē kə́ geleé tə́.

⁴ A əya̰ loo kə́ kḭḭ kə̄ dɔɔ́ kə́ Akrabim kə̄ dām̄ mbɔ́r ɓē kə́ geleé tə́ ba a aw̄ bátə́ yā kugə̄ Təsin. A əya̰ Kades Barnea kə̄ dām̄ mbɔ́r ɓē kə́ geleé tə́, ba a teē Hasar Adar yā kaw̄ Asmon.

⁵ A ra Asmon noó yā tetə rɔ̄n kaw̄ bā ń rīn na i man̄ kə́ Ejiptə tə́ ní. Ba a un gō man̄ kə́ Ejiptə tə́ yā gāngəń kum bā bo tə́.

⁶ Dɔ nin̄ dɔ nang yāsí kə́ dām̄ kə́ no ɓē tə́ i bā bo.

⁷ Ā ə́laī gír kəndā dɔ nin̄ dɔ nang yāsí kə́ dām̄ mbɔ́r ɓē kə́ ko̰ó̰ tə́ i bā bo tə́ bátə́ kadə̄ ūgīiń mbal̄ Hor tə́.

⁸ Ā ī-raī mbal̄ Hor tə́ yā njar dɔ nin̄ ní kadə̄ teē Lebo Hamat bátə́ kadə̄ ugə̄ Sedad.

⁹ Tá a ḭḭ noó yā kaw̄ kum kə̄ Jipəron bátə́ kadə̄ ugə̄ Hasar Enan. Dɔ nin̄ dɔ nang yāsí kə́ dām̄ mbɔ́r ɓē kə́ ko̰ó̰ tə́ n noó.

¹⁰ Dɔ nin̄ dɔ nang yāsí kə́ dām̄ kə́ gír ɓē tə́ a ḭḭ Hasar Enan yā gān̄g Sepam.

¹¹ A ḭḭ Sepam yā kaw̄ Ribəla ba a əya̰ Ain kə̄ dām̄ kə́ no ɓē tə́. A aw̄ bátə́ yā kɔsə kílən tū mbal̄ gə̄ kə́ gidə bā bo kə́ Kineret tə́ dām̄ kə́ gír ɓē tə́.

¹² A ra noó yā kaw̄ bátə́ kugə̄ bā Jurdḛ tə́ ba kun gō bā Jurdḛ yā gāngəń kum bā katə̄ tə́. Dɔ nang yāsí n noó ō, dɔ ninə́n̄ gə̄ n noó ō.

¹³ Moijə əda ngán Israel gə̄ yá̰á̰ ń Kɔ́ɔ̄ɓē mēr̄də́ rāā ní. Ba gō tə́ anī ədadə́ na: Dɔ nang ń Kɔ́ɔ̄ɓē mēr̄ túgə̄ wə̄lā yā gángəń naā tə́ kadə̄ gír ɓē kə́ ndōhó kə núsə gə̄ ní n noó.

¹⁴ Tɔdɔ̄ de gə̄ kə́ gír ɓē yā Ruben tə́ ō, yā Gad tə́ ō, núsə de gə̄ kə́ gír ɓē yā Manase tə́ ō, əngen̄ dɔ nang yādə́ kɔ̄ɔ́ ɓá.

¹⁵ Dɔ nang ń nin̄ əngen̄ ní i dɔ nang ń sɔɔ̄n̄ ta naā kə ɓē kə́ Jeriko gidə bā Jurdḛ tə́, dām̄ kə́ gír ɓē tə́ ní.

Rī ngé nə̄ɓō dɔ nang kə́ Kanaan gə̄

¹⁶ Kɔ́ɔ̄ɓē əda Moijə na:

¹⁷ De gə̄ ń a gángə̄n̄ dɔ nang kə́ Kanaan naā tə́ yā nə̄ɓōsí ní i Eleajar nge tun̄ yá̰a̰ ō, Jojue ngōn̄ Nun ō.

¹⁸ Tá ā ɔ́yiī ngār gə̄ kógə̄ḿ kógə̄ḿ kə dɔ gír ɓē gēé kadə̄ a ərōn̄də́ tə́.

¹⁹ Rī de gə̄ ní n toó: De kə́ gír ɓē yā Juda tə́ i Kaleb ngōn̄ Yepune.

²⁰ De kə́ gír ɓē yā Simeo̰ tə́ i Semuel ngōn̄ Amihud.

²¹ De kə́ gír ɓē yā Benjamḛ tə́ i Elidad ngōn̄ Kislon.

²² De kə́ gír ɓē yā Dan tə́ i Buki ngōn̄ Yogəli.

²³ De kə́ gír ɓē yā Manase ngōn̄ Jəjep tə́ i Haniyel ngōn̄ Epod.

²⁴ De kə́ gír ɓē yā Epəraim ngōn̄ Jəjep tə́ i Kemuel ngōn̄ Sipətan.

²⁵ De kə́ gír ɓē yā Jabulo̰ tə́ i Elisapan ngōn̄ Parnak.

²⁶ De kə́ gír ɓē yā Isakar tə́ i Paltiel ngōn̄ Ajan.

²⁷ De kə́ gír ɓē yā Aser tə́ i Ahihud ngōn̄ Selomi.

²⁸ De kə́ gír ɓē yā Nepətali tə́ i Pedahel ngōn̄ Amihud.

²⁹ De gə̄ ń Kɔ́ɔ̄ɓē ɔjə dɔdə́ kadə̄ gángə̄n̄ dɔ nang kə́ Kanaan naā tə́ ba nə̄ɓōn̄ ngán Israel gə̄ ní n noó.