TƏ́DA 32 - Bibəl ta Sar̄

Gír kaa gə̄ mətá gḛyn̄ ndi gidə bā Jurdḛ kə́ dām̄ kə́ gír ɓē tə́

¹ Yá̰a̰ kul̄ yā de gə̄ kə́ gír ɓē yā Ruben tə́ ō, kə́ gír ɓē yā Gad tə́ ō i ngá̰ý. Nin̄ a̰a̰n̄ kadə̄ dɔ nang kə́ Yajer ō, kə́ Galaad ō, majə tām̄ yā yá̰a̰ kul̄ gə̄ tə́,

² anī aw̄ əngen̄ Moijə ō, Eleajar ō, ngār gə̄ yā ngán Israel gə̄ ō, ba ədan̄də́ na:

³ Atarot ō, Dibon ō, Yajer ō, Nimra ō, Hesəbon ō, Elale ō, Sebam ō, Nebo ō, Beon ō,

⁴ i ɓē gə̄ kə́ rāān̄də́ i dɔ nang ń Kɔ́ɔ̄ɓē taā adə̄ ngán Israel gə̄ tə́ ní. Dɔ nang ní majə tām̄ yā yá̰a̰ kul̄ gə̄ tə́, tá jḭḭ ń i ngé kəla yāí gə̄ ní yá̰a̰ kul̄ yāsí gə̄ i ngá̰ý.

⁵ Ré yá̰á̰ ń j-ɔ̄jə ní ī-ndigə gōjí tə́ anī adə̄ adə̄n̄jí dɔ nang ní yá̰a̰ kənge yājí tə́, ī-lōō kaw̄ sejí gidə bā Jurdḛ tə́.

⁶ Banī Moijə tél ədadə́ na: Ədaī na i rí? Kə ngákó̰ó̰sí gə̄ aw̄n̄ ta rɔ̄ɔ̄ tə́ ba sḭḭ̄ kə ī-ndiī laā jəke a?

⁷ I tām̄ rí tə́ á ī-gḛyiī kɔr̄ tɔ́gə́ ngán Israel gə̄ yā kogə̄ńdə́ kaw̄ dɔ nang ń Kɔ́ɔ̄ɓē adə̄də́ tə́ ní?

⁸ Dan ń jə-ndiī Kades Barnea á m-ə́la bɔbə̄sí gə̄ kəndā ma̰ȳ dɔ nang kə́ Kanaan tə́ ní, i yá̰á̰ ń noō n nin̄ rāān̄ ní.

⁹ Nin̄ aw̄n̄ bátə́ teēn̄ wól loo kə́ Esəkol tə́. Dan ń əndān̄ ma̰ȳ dɔ nang kə́ Kanaan oy ba tél reēn̄ anī ɔrə̄n̄ tɔ́gə́ ngán Israel gə̄ kɔ̄ɔ́. Nin̄ sə̄lān̄də́ kadə̄ aw̄n̄ dɔ nang ń Kɔ́ɔ̄ɓē adə̄də́ tə́ ní alé.

¹⁰ Ndɔ̄ ń noō tə́ wōn̄g rāā Kɔ́ɔ̄ɓē adə̄ túbə əda na:

¹¹ Bátə́ gə̄gē de kə́ ɓāl̄ kutə jōó gə̄ ō, kə́ ɓāl̄də́ tɔȳ kutə jōó gə̄ ō ń teēn̄ kɔ̄ɔ́ kem ɓē kə́ Ejiptə tə́ ní, kógə̄ḿ dandə́ tə́ kə́ yā ka̰a̰ dɔ nang ń m-ə̄nī ndūḿ dɔ tə́ m-ādə̄ Abəraham ō, Isaak ō, Jakob ō ní a gətóo, tām̄ kemdə́ tɔ́sə̄də́ loo kun gōḿ tə́.

¹² I Kaleb ngōn̄ Yepune ń i de kə́ gír kaa yā Keniji gə̄ tə́ ní ō, Jojue ngōn̄ Nun ō, ngóy n ugə̄n̄ dɔ nang ní tə́, tɔdɔ̄ nin̄ unən̄ gō Kɔ́ɔ̄ɓē kanjə̄ kadə̄ kemdə́ tɔ́sə̄də́.

¹³ Wōn̄g rāā Kɔ́ɔ̄ɓē kə ngán Israel gēé adə̄ rāādə́ adə̄ dáȳn̄ kem dəla loo tə́ bátə́ ɓāl̄ kutə sɔ́, adə̄ de gə̄ ń rāān̄ yá̰á̰ kə nel̄ Kɔ́ɔ̄ɓē aĺ ní gətóon̄ kɔ̄ɔ́ malang.

¹⁴ Ba sḭḭ̄ gír de kə́ ngé rāā majaĺ gə̄, ī-ndigiī kun gō bɔbə̄sí gə̄ yā rāā Kɔ́ɔ̄ɓē kadə̄ wōn̄g rāān kə ngán Israel gēé a?

¹⁵ Tɔdɔ̄ ré sḭḭ̄ ī-rāāī háĺ kə́ sew aĺ kə Kɔ́ɔ̄ɓēé anī ni a rāā kadə̄ ndɔ̄ ń ngán Israel gə̄ a rāān̄ kem dəla loo tə́ ní a ngāl̄ ɓáý to̰ yā kadə̄ ta kósə de gə̄ ń toō malang a tḭ̄ḭ̄ sɔɔ̄ńsí.

¹⁶ De gə̄ ní ndɔ́tə̄n̄ kə̄ rɔ̄ Moijə tə́ ngɔr ba ədan̄ na: J-a j-ɔr gong loo ń toō tə́ laā tām̄ yā yá̰a̰ kul̄ yājí gə̄ tə́ ō, j-a jə-rāā ɓē bo gə̄ tām̄ yā ngánjí gə̄ tə́ ō.

¹⁷ Gō tə́ anī j-a j-ɔy yá̰a̰ rɔ̄ɔ̄ gə̄ láẃ yā njə̄rań kété no ngán Israel gə̄ tə́ yā kaw̄ń sedə́ bátə́ kaw̄ kəndādə́ ɓē yādə́ gə̄ tə́. Ba ngáńjí gə̄ a ndin̄ laā kem ɓē bo gə̄ kə́ ndogə̄ mbal̄ kə́ ngan̄g gə̄ gīrə̄n̄ gidə tə́ najə̄ yā de kə́ dɔ nang ń toō gə̄ tə́ tə́.

¹⁸ Ngán Israel gə̄ a ndin̄ dɔ nang yādə́ gə̄ tə́ kógə̄ḿ kógə̄ḿ pá tá j-a jə-tél yā kaw̄ ɓēé loojí ɓáý.

¹⁹ Ré j-ənge dɔ nang yājí gidə bā Jurdḛ kə́ dām̄ kə́ gír ɓē tə́ laā anī, j-a j-əya̰ dɔ nang kə́ gidə bā Jurdḛ kə́ dām̄ kə́ nú tə́ yā kadə̄də́ nin̄.

²⁰ Moijə ədadə́ na: Mində́sí ń ə̄nīī nuú ī-raī dɔ tə́. Ré ɔ́yiī yá̰a̰ rɔ̄ɔ̄ gə̄ ta kum Kɔ́ɔ̄ɓē tə́ yā kaw̄ń rɔ̄ɔ̄ tə́,

²¹ ré ngé rɔ̄ɔ̄ yāsí gə̄ malang teēn̄ bā Jurdḛ kété no Kɔ́ɔ̄ɓē tə́ bátə́ kadə̄ ni tə̄ɓań madə̄ ba̰ā̰n gə̄ malang kɔ̄ɔ́ non tə́,

²² ré dɔ nang i gíŕ tɔ́gə yā Kɔ́ɔ̄ɓē tə́ pá tá ī-tél āwī ɓēé anī, najə̄ a gətóo dɔsí tə́ ta kum Kɔ́ɔ̄ɓē tə́ ō, ta kum ngán Israel gə̄ tə́ ō, dɔ nang kə́ gidə bā Jurdḛ kə́ dām̄ kə́ laā tə́ a tél yá̰a̰ kənge yāsí ta kum Kɔ́ɔ̄ɓē tə́ ō.

²³ Ba ré ī-rāāī tītə̄ ń noō aĺ anī ī-rāāī i yá̰á̰ kə́ majaĺ kə Kɔ́ɔ̄ɓē, ba majə kadə̄ ī-gerī majə na najə̄ a əsō dɔsí tə́.

²⁴ Ī-rāāī ɓē bo gə̄ tām̄ yā ngánsí gə̄ tə́ ō, ɔ́riī gong gə̄ tām̄ yā batə̄ yāsí gə̄ tə́ ō, ba ādī dɔsí ndígə̄nal dɔ míndə́sí ń ə̄nīī tə́ ní alé.

²⁵ De gə̄ kə́ gír ɓē yā Ruben tə́ ō, yā Gad tə́ ō, tél ədan̄ Moijə na: J-a jə-rāā yá̰á̰ ń ḭ kɔ́ɔ̄jí ī-mēr̄jí rāā ní.

²⁶ Nə̄yá̰jí gə̄ ō, ngáńjí gə̄ ō, yá̰a̰ kul̄ yājí gə̄ ō, dā̰ yājí gə̄ malang ō, a na̰yn̄ gogə́ laā kem ɓē gə̄ kə́ Galaad tə́.

²⁷ Banī jḭḭ ngé kəla yāí gə̄ malang j-a j-ɔy yá̰a̰ rɔ̄ɔ̄ gə̄ yā mānəń kété no Kɔ́ɔ̄ɓē tə́ yā kaw̄ rɔ̄ɔń tītə̄ ń ḭ kɔ́ɔ̄jí ə́dań ní.

²⁸ Moijə adə̄ Eleajar nge tun̄ yá̰a̰ ō, Jojue ngōn̄ Nun ō, ngār gə̄ kə́ dɔ gír ɓē gə̄ yā ngán Israel gə̄ tə́ ō, gō míndən gə̄ kə́ tām̄ yā de gə̄ kə́ gír ɓē yā Ruben tə́ ō, Gad tə́ ō.

²⁹ Ni-ədadə́ na: Ré de gə̄ kə́ gír ɓē yā Gad tə́ ō, yā Ruben tə́ ō, ɔyn̄ yá̰a̰ rɔ̄ɔ̄ yādə́ gə̄ ba teēn̄ bā Jurdḛ sesí ō, mānə̄n̄ kété no Kɔ́ɔ̄ɓē tə́ aw̄n̄ rɔ̄ɔ̄ tə́ ō, rāān̄ sesí adə̄ ə́laī ɓē gír tɔ́gə yāsí tə́ ō anī, ādīdə́ dɔ nang kə́ Galaad kə́ yādə́ tə́.

³⁰ Ba ré ɔyn̄ yá̰a̰ rɔ̄ɔ̄ yādə́ gə̄ teēnəń bā Jurdḛ sesí aĺ anī a əngen̄ loo i dɔ dáńsí tə́ dɔ nang kə́ Kanaan tə́.

³¹ De gə̄ kə́ gír ɓē yā Gad tə́ ō, yā Ruben tə́ ō, tél ədan̄ ɓáý to̰ na: J-a jə-rāā yá̰á̰ ń Kɔ́ɔ̄ɓē ədají ní.

³² Jə kɔ́ j-a jə-mān̄ kété no Kɔ́ɔ̄ɓē tə́ kə yá̰a̰ rɔ̄ɔ̄ gēé yā kudəń dɔ nang kə́ Kanaan tə́. Ba loo yājí i gidə bā Jurdḛ kə́ dām̄ kə́ laā tə́.

³³ Moijə adə̄ de gə̄ kə́ gír ɓē yā Gad tə́ ō, yā Ruben tə́ ō, núsə de gə̄ kə́ gír ɓē yā Manase ngōn̄ Jəjep tə́ ō, dɔ nang yā mban̄g Sihon ń i mban̄g yā Amor gə̄ ní ō, dɔ nang yā mban̄g kə́ Basan ń rīn na i Og ní ō. Ni-adə̄də́ dɔ nang gə̄ ní kə ɓē bo gə̄ kə́ tū tə́ ō, kə dɔ nang gə̄ kə́ kadə ɓē bo gə̄ ní tə́ ō.

³⁴ De gə̄ kə́ gír ɓē yā Gad tə́ tél rāān̄ ɓē kə́ Dibon ō, Atarot ō, Aroer ō,

³⁵ Atarot Sopan ō, Yajer ō, Yogəboha ō,

³⁶ Bet Nimra ō, Bet Haran ō gogə́ rang. Nin̄ ənīn̄ ndogə̄ mbal̄ kə́ ngāl̄ gə̄ gidə ɓē gə̄ ní tə́. Nin̄ ɔrən̄ gong gə̄ tām̄ yā yá̰a̰ kul̄ yādə́ gə̄ tə́ ō.

³⁷ De gə̄ kə́ gír ɓē yā Ruben tə́ tél rāān̄ ɓē kə́ Hesəbon ō, Elale ō, Kiryataim ō,

³⁸ Nebo ō, Baal Meon ō, Sibəma ō gogə́ rang, ba tə́ndān̄ rī kə́ kijə gə̄ dɔ tə́.

³⁹ De gə̄ kə́ gír kaa yā Makir ngōn̄ Manase tə́ aw̄ taān̄ dɔ nang kə́ Galaad ba tə̄ɓān̄ ngán Amor gə̄ ń ndin̄ tū tə́ kété ní kɔ̄ɔ́.

⁴⁰ Tā anī Moijə adə̄də́ dɔ nang kə́ Galaad ní adə̄ ndin̄ tū tə́.

⁴¹ De gə̄ kə́ gír kaa yā Yair ń i ngōn̄ Manase kə́rēý ní, aw̄ taān̄ ngán ɓē gə̄ yā ngán Amor gə̄ ba əndān̄ rī dɔ ngán ɓē gə̄ ní tə́ na i ngán ɓē gə̄ yā Yair.

⁴² Noba aw̄ taā ɓē kə́ Kenat kə ngán ɓē kə́ kadə tə́ gə̄ ba əndā rīn nəkɔ́ dɔ tə́ na i Noba.