TƏ́DA 29 - Bibəl ta Sar̄

6. Yá̰a̰ tun̄ kə́ ndɔ̄ kəga kɔŕ rɔ̄nel̄ tə́ dɔ Kɔ́ɔ̄ɓē tə́

¹ Kə ndɔ̄ nāā kə́ ta kəga dɔ yā nāā kə́ nge ko̰ sīrí anī, ā ī-kánī naā yā rɔȳ Kɔ́ɔ̄ɓē. Ā ī-rāāī kəla kə́ kə tɔ́gɔ́ gə̄ alé, tɔdɔ̄ i ndɔ̄ kəga kɔŕ rɔ̄nel̄ dɔ Kɔ́ɔ̄ɓē tə́.

² Ā ī-róōī dā̰ horoó yā kadə̄ Kɔ́ɔ̄ɓē kadə̄ sēēn sɔl̄ kemən. Dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə bəra ō, bal batə̄ ō, ngán batə̄ kə́ ɓāl̄ kógə̄ḿ gə̄ sīrí ō.

³ Ā ī-ndējī Kɔ́ɔ̄ɓē ndujə̄ kə́ ló̰ȳ kə yibīí kə dɔ dā̰ gə̄ ń noō malang. Ndujə̄ kə́ dɔ man̄g kə́ bəra tə́ a asə lāngá ndōhó ō, ndujə̄ kə́ dɔ bal batə̄ tə́ a asə lāngá mehḛ́ ō,

⁴ ndujə̄ kə́ dɔ ngán batə̄ gə̄ tə́ a asə lāngá mətá kə dɔdə́ gēé ō.

⁵ Ā ī-tunī bal bə̄yā̰ kógə̄ḿ tām̄ yā majaĺ tə́ kadə̄ rāānəń yá̰á̰ kə́ yā kutə̄ń dɔ majaĺ yāsí.

⁶ Ā ī-róōī dā̰ gə̄ ń noō horoó yā kərōń dā̰ kə́ róō ndɔ̄ nāā kə́ ta kəga dɔ tə́ kə ndujə̄ kə́ dɔ tə́ ō, dā̰ kə́ róō kə dɔ ndɔ̄ gə̄ kə ndujə̄ kə́ dɔ tə́ ō, kasə nduú kə́ yā tə́te dɔdə́ tə́ gə̄ ō. Ā ī-rāāī i kə gō looneé. Nge ń noō i yá̰a̰ kəsa kə́ sēēn sɔl̄ kem Kɔ́ɔ̄ɓē.

7. Yá̰a̰ tun̄ kə́ ndɔ̄ mā̰ȳ rɔ̄ kə́ bo tə́

⁷ Kə ndɔ̄ kə́ nge ko̰ kutə yā nāā kə́ nge ko̰ sīrí ngeé ń noō ní, ā ī-kánī naā yā rɔȳ Kɔ́ɔ̄ɓē. Ā ī-*ndiī ɓō tām̄ yā Nə́ɓā tə́ ō, ī-rāāī kəla kógə̄ḿ aĺ ō.

⁸ Ā ī-róōī dā̰ gə̄ horoó kadə̄ sedə́ sɔl̄ kem Kɔ́ɔ̄ɓē. Dā̰ kə́ loodə́ kógə̄ḿ nujə aĺ gə̄ ń ā ī-róōīdə́ horoó ní n toó: Man̄g kə́ bəra ō, bal batə̄ ō, ngán batə̄ kə́ ɓāl̄ kógə̄ḿ gə̄ sīrí ō.

⁹ Ā ī-ndējī Kɔ́ɔ̄ɓē ndujə̄ kə́ ló̰ȳ kə yibīí kə dɔ dā̰ gə̄ ń noō malang. Ndujə̄ kə́ dɔ man̄g kə́ bəra tə́ a asə lāngá ndōhó ō, ndujə̄ kə́ dɔ bal batə̄ tə́ a asə lāngá mehḛ́ ō,

¹⁰ ndujə̄ kə́ dɔ ngán batə̄ gə̄ tə́ a asə lāngá mətá kə dɔdə́ gēé ō.

¹¹ Ā ī-tunī bal batə̄ kógə̄ḿ tām̄ yā majaĺ tə́ yā kərōń dā̰ ń ī-tunī tām̄ yā majaĺ tə́ ndɔ̄ mā̰ȳ rɔ̄ kə́ bo tə́ ní ō, dā̰ kə́ róō kə dɔ ndɔ̄ gə̄ kə ndujə̄ kə́ dɔ tə́ ō, kasə nduú kə́ yā tə́te dɔdə́ tə́ gə̄ ō.

8. Yá̰a̰ tun̄ kə́ ndɔ̄ nāā kújə́ kámbə gə̄ tə́

¹² Kə ndɔ̄ kə́ nge ko̰ kutə gidə i mí yā nāā kə́ nge ko̰ sīrí anī, ā ī-kánī naā yā rɔȳ Kɔ́ɔ̄ɓē ō, ā ī-rāāī kəla kə́ kə tɔ́gɔ́ gə̄ aĺ ō. Ā ī-rāāī nāā ndɔ̄ sīrí yā rɔȳń Kɔ́ɔ̄ɓē.

¹³ Ā ī-róōī dā̰ gə̄ horoó kadə̄ sedə́ sɔl̄ kem Kɔ́ɔ̄ɓē. Dā̰ kə́ loodə́ kógə̄ḿ nujə aĺ gə̄ ń ā ī-róōīdə́ ní n toó: Man̄g kə́ bəra gə̄ kutə gidə i mətá ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

¹⁴ Ā ī-ndējī Kɔ́ɔ̄ɓē ndujə̄ kə́ ló̰ȳ kə yibīí kə dɔ dā̰ gə̄ ń noō malang. Ndujə̄ kə́ dɔ man̄g kə́ bəra gə̄ tə́ ní a asə lāngá ndōhó kə dɔdə́ gēé ō, ndujə̄ kə́ dɔ bal batə̄ gə̄ tə́ ní a asə lāngá mehḛ́ kə dɔdə́ gēé ō,

¹⁵ ndujə̄ kə́ dɔ ngán batə̄ gə̄ tə́ ní, a asə lāngá mətá kə dɔdə́ gēé ō.

¹⁶ Ā ī-tunī bal bə̄yā̰ kógə̄ḿ tām̄ yā majaĺ tə́ ō. Ā ī-tunī dā̰ gə̄ ń noō malang yā kərōń dā̰ kə́ róō kə dɔ ndɔ̄ gə̄ kə ndujə̄ kə́ dɔ tə́ ō, kasə nduú kə́ yā tə́te dɔ tə́ ō.

¹⁷ Kə ndɔ̄ kə́ nge ko̰ jōó anī dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə́ bəra gə̄ kutə gidə i jōó ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

¹⁸ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

¹⁹ Ā ī-tunī bal bə̄yā̰ kógə̄ḿ tām̄ yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ní ō, ndujə̄ kə́ dɔ tə́ ō, kasə nduú kə́ yā tə́te gə̄ dɔdə́ tə́ gə̄ ō.

²⁰ Kə ndɔ̄ kə́ nge ko̰ mətá anī dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə́ bəra gə̄ kutə gidə i kógə̄ḿ ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

²¹ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

²² Ā ī-tunī bal bə̄yā̰ kógə̄ḿ tām̄ yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ní ō, ndujə̄ kə́ dɔ tə́ ō, kasə nduú kə́ yā tə́te dɔ tə́ ō.

²³ Kə ndɔ̄ kə́ nge ko̰ sɔ́ anī dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə́ bəra gə̄ kutə kógə̄ḿ ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

²⁴ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

²⁵ Ā ī-tunī bal bə̄yā̰ kógə̄ḿ tām̄ yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ní ō, ndujə̄ kə́ dɔ tə́ ō, kasə nduú kə́ yā tə́te dɔ tə́ ō.

²⁶ Kə ndɔ̄ kə́ nge ko̰ mí anī, dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə́ bəra gə̄ ndōhó ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

²⁷ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

²⁸ Ā ī-tunī bal bə̄yā̰ kógə̄ḿ tām̄ yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ní ō, ndujə̄ kə́ dɔ tə́ ō, kasə nduú kə́ yā tə́te dɔ tə́ ō.

²⁹ Kə ndɔ̄ kə́ nge ko̰ mehḛ́ anī dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə́ bəra gə̄ sɔ́sɔ́ ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

³⁰ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

³¹ Ā ī-tunī bal bə̄yā̰ tām̄ yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ní ō, ndujə̄ kə́ dɔ tə́ ō, kasə nduú kə́ yā tə́te dɔ tə́ ō.

³² Kə ndɔ̄ kə́ nge ko̰ sīrí anī dā̰ kə́ loodə́ kógə̄ḿ nujə aĺ gə̄ ń ā ī-tunīdə́ ní n toó: Man̄g kə́ bəra gə̄ sīrí ō, bal batə̄ gə̄ jōó ō, ngán batə̄ kə́ ɓāl̄ kógə̄ḿ gə̄ kutə gidə i sɔ́ ō.

³³ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

³⁴ Ā ī-tunī bal bə̄yā̰ kógə̄ḿ tām̄ yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ní ō, ndujə̄ kə́ dɔ tə́ ō. kasə nduú kə́ yā tə́te dɔ tə́ ō.

³⁵ Ndɔ̄ kə́ nge ko̰ sɔ́sɔ́ i ndɔ̄ tɔ̄l̄ ta nāā yāsí, ā ī-rāāī kəla kə́ kə tɔ́gɔ́ gə̄ alé.

³⁶ Ā ī-róōī dā̰ gə̄ horoó kadə̄ sēēdə́ sɔl̄ kem Kɔ́ɔ̄ɓē. Dā̰ kə́ loon kógə̄ḿ nujə aĺ gə̄ ń ā ī-róōīdə́ ní n toō: Man̄g kə́ bəra ō, bal batə̄ ō, ngán batə̄ kə́ ɓāl̄ kógə̄ḿ gə̄ sīrí ō.

³⁷ Ā ī-ndējī Kɔ́ɔ̄ɓē ndujə̄ ō, kasə nduú kə́ yā tə́te ō, kə dɔ dā̰ gə̄ ń noō kə gō looneé.

³⁸ Ā ī-tunī bal bə̄yā̰ tām yā majaĺ tə́ yā kərōń dā̰ ń ā ī-róōī kə dɔ ndɔ̄ gə̄ ō, ndujə̄ kə́ dɔ tə́ ō, kasə nduú kə́ yā tə́te dɔ tə́ ō ní.

³⁹ Yá̰a̰ gə̄ ń ā ī-ndējī Kɔ́ɔ̄ɓē ndɔ̄ nāā gə̄ tə́ yā kərōń ngé gə̄ ń ā ī-tunī tām̄ míndə́sí kə́ ə̄nīī tə́ ō, kə gō kem ndigə yāsí ō, ngé gə̄ ń ī-róōī horoó ní ō, ndujə̄ kə́ ndējə̄ ō, kasə nduú kə́ yā tə́te ō, yá̰á̰ kə́ tun̄ tām̄ yā kem kógə̄ḿ tə́ ō ní n noō.