TƏ́DA 27 - Bibəl ta Sar̄

Ndū najə̄ kə́ adə̄ dəyá̰ gə̄ yá̰a̰ ndəbā

¹ Ngáń kə́ dəyá̰ yā Selopad ngōn̄ Heper kə́ ngōn̄ Galaad, kə́ ngōn̄ Makir kə́ ngōn̄ Manase gə̄ ń rīdə́ na i Mala ō, Noa ō, Hogəla ō, Milka ō, Tirsa ō ní, nin̄ i ngán kə́ dəyá̰ gə̄ kə́ gír kaa kógə̄ḿ yā Manase ngōn̄ Jəjep tə́.

² Nin̄ aw̄ ran̄ no Moijə tə́ ō, Eleajar nge tun̄ yá̰á̰ tə́ ō, no ngán Israel gə̄ tə́ malang ō, no ngār yādə́ gə̄ tə́ ō, ta kújə kənge naā tə́ ba ədan̄ na:

³ Bɔbə̄jí oy kɔ̄ɔ́ kem dəla loo tə́. Ni i dan de gə̄ yā Kore ń əndān̄ tadə́ naā tə́ ba ḭḭn̄ kə Kɔ́ɔ̄ɓēé kə najá ní tə́ alé. Ni-oy i tām̄ majaĺ yān nəkɔ́ tə́, ba ngōnə̄n kə́ dəngam gətóo.

⁴ Ní kə rī bɔbə̄jí kə gətóo dan de gə̄ kə́ gīr kaa yān tə́ tām̄ ngōn̄ kə́ dəngam kə́ ojə aĺ tə́ a? Ādə̄jí dɔ nang tītə̄ ń ādəń ngákó̰o̰ bɔbə̄jí gə̄ ní ō.

⁵ Moijə ɔr̄ najə̄ kə Kɔ́ɔ̄ɓēé dɔdə́ tə́,

⁶ anī Kɔ́ɔ̄ɓē ədan na:

⁷ Najə̄ yā ngán Selopad gə̄ i gōtə́. Ā ādə̄də́ dɔ nang tītə̄ ń ā ādəń ngákó̰o̰ bɔbə̄də́ gə̄ ní ō, yá̰á̰ kə́ tām̄ yā bɔbə̄də́ tə́ anī ā ādə̄də́ i nin̄ ō.

⁸ Ba ā ə́dá ngán Israel gə̄ na: Ré deē kógə̄ḿ oy banī ngōnə̄n kə́ dəngam gətóo anī, ā ī-téliī kə yá̰a̰ ndəbān yā kadə̄ ngōnə̄n kə́ dəyá̰.

⁹ Ba ré ngōnə̄n kə́ dəyá̰ gətóo anī ā ī-téliī kə yá̰a̰ kəngen yā kadə̄ ngákó̰o̰n kə́ dəngam gə̄.

¹⁰ Ba ré ngákó̰o̰n kə́ dəngam gə̄ gətóon̄ anī, ā ādī ngákó̰o̰ bɔbə̄n kə́ dəngam gə̄.

¹¹ Ba ré ngákó̰o̰ bɔbə̄n gə̄ gətóon̄ anī, ā adī ngeen kə́ ngɔr ngá̰ý kə́ gír kaan tə́. I ni n a ənge yá̰a̰ ndəbān ní. Nge ń noō i ndū najə̄ kə́ tām̄ yā ngán Israel gə̄ tə́ tītə̄ ń Kɔ́ɔ̄ɓē ɔjəń Moijə ní.

Jojue un gotə Moijə

¹² Kɔ́ɔ̄ɓē əda Moijə na: Āl̄ dɔ mbal̄ Abarim ń noō tə́, ba á̰a̰ dɔ nang ń m-ā m-ādə̄ ngán Israel gə̄ ní.

¹³ Ā á̰a̰ā̰ ba gō tə́ anī ā óy kɔ̄ɔ́ tītə̄ yā ngōkó̰ó̰í Aaro̰.

¹⁴ Tām̄ dan ń ngán Israel gə̄ dəjen̄ man̄ sāānəń taḿ kem dəla loo kə́ Sin tə́ ní, sḭ́ḭ̄ ī-mbātíī rāā yá̰á̰ ń m̄-mēr̄sí rāā ní. Ɔ́jiīdə́ kadə̄ mā i de kə́ táĺ alé. Ni-əda i najə̄ yā man̄ Meriba kə́ Kades, kem dəla loo kə́ Sin tə́.

¹⁵ Tā anī Moijə əda Kɔ́ɔ̄ɓē na:

¹⁶ Kɔ́ɔ̄ɓē Nə́ɓā, ḭ̄ ń ī-rāā de gə̄ malang ādə̄ ndin̄ kə kumdə́ ní, ə̄ndā deē kógə̄ḿ dɔ ngán Israel gə̄ tə́,

¹⁷ kadə̄ ɔr nodə́ ta kaw̄də́ tə́ ō, ta téldə́ ō, ɓáa anī de gə̄ a ton̄ tītə̄ batə̄ gə̄ kə́ nge kul̄də́ gətóo alé.

¹⁸ Kɔ́ɔ̄ɓē tél əda Moijə na: Jojue ngōn̄ Nun i de kə́ ndílə́ḿ rāā kəla kemən tə́. Ī-ɓārə́n ba ə̄ndā jīí dɔn tə́.

¹⁹ Āw̄ seneé no Eleajar nge tun̄ yá̰á̰ tə́ ō, no ngán Israel gə̄ tə́ malang ō, ba əndān kem kəla yān tə́ ta kumdə́ tə́.

²⁰ Ā ādə̄n tɔ́gə yāí sḛ́ý kadə̄ ngán Israel gə̄ malang oōn̄ tan.

²¹ Jojue a aw̄ rɔ̄ Eleajar nge tun̄ yá̰á̰ tə́ kadə̄ túgə̄ wə̄lā urim tām̄ yān tə́ ta kum Kɔ́ɔ̄ɓē tə́. Ni ō, ngán Israel gə̄ malang ō ní a teēn̄ ō, tél a udən̄ gogə́ ō, i kə gō ndū ń wə̄lā a ɔjə ní.

²² Moijə rāā tītə̄ ń Kɔ́ɔ̄ɓē ədanəń ní. Reē kə Jojue no Eleajar nge tun̄ yá̰á̰ tə́ ō, no ngán Israel gə̄ tə́ malang ō,

²³ ba əndā jīn dɔn tə́ əndānəń kem kəla yān tə́ tītə̄ ń Kɔ́ɔ̄ɓē ədań ní.