TƏ́DA 25 - Bibəl ta Sar̄

Ngán Israel gə̄ ndɔ̄ȳn̄ ɓesə̄ gə̄

¹ Ngán Israel gə̄ ndin̄ Sitim anī əlan̄ gír rāā kaya kə ngáń kə́ dəyá̰ kə́ Moab gə̄.

² Ngán kə́ dəyá̰ gə̄ ní ɓārə́n̄də́ loo tun̄ yá̰a̰ kadə̄ ɓesə̄ yādə́ gə̄ tə́, adə̄ əsan̄ yá̰a̰ tū tə́ ō, əsōn̄ kə̄ nang tə́ no ɓesə̄ gə̄ tə́ ndɔ̄ȳn̄də́ ō.

³ Ngán Israel gə̄ əlan̄ dɔdə́ gír ɓesə̄ Baal kə́ Peor tə́, adə̄ wōn̄g rāā Kɔ́ɔ̄ɓē sedə́ ngá̰ý.

⁴ Kɔ́ɔ̄ɓē əda Moijə na: Ngār gə̄ yā ngán Israel gə̄ ní ə́hɔ́də́ malang, i tṵ́ṵ̄də́ dɔɔ́ tū kāgə̄ gə̄ tə́ ādə̄ ran̄ kumdə́ sɔɔ̄ mbang ta kum Kɔ́ɔ̄ɓē tə́ bátə́ kadə̄ oynə̄ń Loo ń noō tə́ wōn̄g ń rāām̄ sesí ngá̰ý ní a tetə.

⁵ Moijə əda ngé gān̄g sarya gə̄ kə́ Israel tə́ na: Sḭḭ̄ kógə̄ḿ kógə̄ḿ ī-tɔ̄lī de gə̄ yāsí gə̄ ń əlan̄ dɔdə́ gír Baal kə́ Peor tə́ ní.

⁶ Kum mbang ngeé ń noō tə́ Israel kógə̄ḿ teē tū tə́ noō kə dəyá̰ kə́ Madian reē ugə̄ń dan ngákó̰o̰n gə̄ tə́. Moijə nin̄ kə ngán Israel gə̄ ń kánə̄n̄ naā ta kújə kənge naā tə́ ba ndi a nōōn̄ ní a̰a̰n̄də́.

⁷ Dan ń Pinas ngōn̄ Eleajar kə́ ngōn̄ Aaro̰ ń ni i nge tun̄ yá̰á̰ ní a̰a̰də́ anī, ḭḭ dan ngé kán̄ naā gə̄ tə́ ba un nənga jīn tə́.

⁸ Udə gō deē ní tə́ kem kújə tandā ń aw̄ kə dəyá̰ kə́ Madian kemeé ní tə́, ba ɔsədə́ jōó mbak kə nəngaá kemdə́ tə́ adə̄ oyn̄. Loo ń noō tə́ yá̰á̰ kə́ tōr̄ ń a rāā ngán Israel gə̄ ní dəba.

⁹ De kə́ koy gə̄ asən̄ dūbú kutə jōó gidə i sɔ́ kɔ̄ɔ́ ɓá.

¹⁰ Kɔ́ɔ̄ɓē əda Moijə na:

¹¹ Pinas ngōn̄ Eleajar kə́ ngōn̄ Aaro̰ ń ni i nge tun̄ yá̰á̰ ní un wōn̄g yāḿ kɔ̄ɔ́ dɔ ngán Israel gə̄ tə́. Tɔdɔ̄ jang rāān kum gotəḿ dan ngán Israel gə̄ tə́. I yá̰á̰ ń toō n m̄-tɔ̄l̄ Israel gə̄ adə̄ təgān̄ kɔ̄ɔ́ alé dan ń jang yāḿ ɔsəń seḿ ní.

¹² ngɔlaā ní ə́dan na m-ā m-ə́hɔ madə̄ naā seneé tām̄ yā kem sɔl̄ tə́.

¹³ I madə̄ naā kə́ əndān kem kəla tun̄ yá̰á̰ tə́ kə ngánən gēé ō, ngán kaan gēé ō, kə́ njɔ́ḿ gə̄ tə́. Tɔdɔ̄ ni-rāā jang kum gotə Nə́ɓā yān ō, rāā yá̰a̰ kutə dɔ majaĺ yā ngán Israel gə̄ ō.

¹⁴ Deē ń tɔ̄lə̄ndə́ naā tə́ kə dəyá̰ kə́ Madian ní i Jimri ngōn̄ Salu. Ni i ngār kə́ dɔ de gə̄ kə́ gír kojə kógə̄ḿ yā Simeo̰ tə́.

¹⁵ Ba dəyá̰ kə́ Madian ní rīn na i Kosəbi. Rī bɔbə̄n na i Sur. Bɔbə̄n i ngār kə́ dɔ gír kaa kə́rēý tə́ dɔ nang kə́ Madian tə́.

¹⁶ Anī Kɔ́ɔ̄ɓē əda Moijə na:

¹⁷ Ī-rɔ̄ɔ̄ī de gə̄ kə́ Madian, ī-tɔ̄līdə́ kɔ̄ɔ́ malang.

¹⁸ Tɔdɔ̄ nin̄ i madə̄ ba̰ā̰sí gə̄ kə́ lurən̄ ngá̰ý. Nin̄ lurən̄sí tū najə̄ kə́ Peor tə́ ō, kə najə̄ yā Kosəbi ō. Kosəbi i ngōn̄ ngār kə́ Madian ń tɔ̄l̄nən̄ ndɔ̄ ń yá̰á̰ kə́ tōr̄ rāań ngán Israel gə̄ tām̄ najə̄ kə́ Peor tə́ ní.