TƏ́DA 24 - Bibəl ta Sar̄

¹ Balam a̰a̰ kadə̄ yá̰á̰ ń Kɔ́ɔ̄ɓē ndigə ní i tɔ́r̄ tan dɔ ngán Israel gə̄ tə́ Adə̄ ni-aw̄ kadə̄ Kɔ́ɔ̄ɓē əndā najə̄ tan tə́ tītə̄ kə́ kété gə̄ alé, banī ni tūr̄ kumən kə̄ dəla loo tə́.

² Dan ń ni un kumən kə̄ dɔɔ́ á a̰a̰ ngán Israel gə̄ kə́ ndin̄ kem gérger yādə́ gə̄ tə́ kə gō gír ɓē yādə́ gēé ní anī, Ndíl yā Nə́ɓā reē dɔn tə́,

³ adə̄ ni tə́da najə̄ gə̄ ń toō: Mā Balam ngōn̄ Beor, mā ń i de kə́ kumḿ a̰a̰ yá̰á̰ kə́ to loo mundə̄ tə́ ō,

⁴ mā ń i de kə́ nge koō najə̄ kɔr̄ Nə́ɓā ō, nge ka̰a̰ yá̰a̰ gə̄ ń Nə́ɓā kə́ tɔ́gən i ngá̰ý ɔjəm̄ ō ní, dan ń m̄-rɔȳ Nə́ɓā anī, ni tḛḛ̄ kumḿ adə̄ m-á̰á̰ yá̰á̰ kə́ to lo mundə̄ tə́. Ōōī najə̄ kɔrə̄ḿ:

⁵ Ngán Israel gə̄, sḭḭ̄ ń i de gə̄ kə́ gír kaa yā Jakob tə́ ní, kújə tandā yāsí gə̄ ń ī-ndiī kemeé ní majən̄ ngá̰ý.

⁶ Taān̄ loo tītə̄ man̄ kə́ ḭḭ dɔ mbalá, ton̄ tītə̄ ndɔr̄ gə̄ kə́ kadə bā tə́. Ton̄ tītə̄ kāgə̄ aloe gə̄ ō, kāgə̄ sédər gə̄ ō, kə́ Kɔ́ɔ̄ɓē əndādə́ kadə man̄ tə́.

⁷ Man̄ kə́ kem gembé rə̄ɓā adə̄ aw̄ kə̄ kem ndɔr̄ gə̄ tə́ dɔ kó gə̄ tə́ adə̄ asə kōō gə̄ majə. Mban̄g yā ngán Israel gə̄ a tetə mban̄g Agag rɔ̄ɔ̄. Ko̰o̰ ɓē yān a ḭḭ kə gidəneé.

⁸ Nə́ɓā teē sedə́ kɔ̄ɔ́ Ejiptə tə́ kə tɔ́gən kə́ tītə̄ tɔ́gə dɔgə. Gíŕ nápar de gə̄ ń a ənīn̄ ngán Israel gə̄ rɔ̄ɔ̄ ní, ngán Israel gə̄ a tetən̄n̄də́ rɔ̄ɔ̄ i gidə kógə̄ḿ beē. Ngán Israel gə̄ a tétə̄n̄ kə̄ngādə́ ō, a túrə̄n̄də́ kə kum gərā yādə́ gēé yā kur kɔdədə́ ō.

⁹ Nin̄ tɔ́sə̄n̄ yár̄ pá tá ton̄ nang tə́ tītə̄ ɓɔl gə̄. I náā n asə kɔsə sedə́ ta kḭḭ dɔɔ́? Israel, deē ń a tɔ́r̄ tan dɔí tə́ ní, tɔ́r̄ ta i dɔ kɔ́ɔ̄ tə́, ba deē ń a ndɔ̄líī ní, a ndɔ̄lə́n̄ kɔ́ɔ̄.

¹⁰ Wōn̄g rāā Balak ngá̰ý kə Balam, adə̄ ənda jīn naā tə́ kə wōngōó, ba əda Balam na: m̄-ɓāríī i yā kadə̄ ī-ndɔ̄ĺ madə̄ ba̰ā̰ḿ gə̄, ba ń toō i nja kə́ nge ko̰ mətá n ī-tɔ́r̄ taí dɔdə́ tə́ toō.

¹¹ I beé ní ī-tél āw̄ gogə́ ɓē yāí tə́. M-ə́daī kété m-ə́da na m-ā m-ɔ́sə gɔnií kadə̄ asə ta tə́, ba ń toō Kɔ́ɔ̄ɓē ɔgə̄ kadə̄ m-ɔ́sə gɔnií.

Balam əda najə̄ rī ɓār̄ yā ngán Israel gə̄ kə́ ndɔ̄ń tə́

¹² Balam tél əda Balak na: m̄-tāā ngámbang kəla yāí gə̄ aĺ a? M-ə́da na:

¹³ Ká ré Balak adə̄məń gində̄ arjā̰a̰ ō, lɔ́r ō, kə́ kem kújə yān tə́ malang gə̄gē anī, m-ā m̄-mān̄ dɔ ndū yā Kɔ́ɔ̄ɓē alé. Najə̄ ń Kɔ́ɔ̄ɓē ədam̄ ní m-ā m-ə́da.

¹⁴ Ngɔlaā m-ā m̄-tél yā kaw̄ gogə́ rɔ̄ de gə̄ yāḿ gə̄ tə́, ba ī-reē ādə̄ m-ə́daī yá̰á̰ ń ndɔ̄ń tə́ anī ngán Israel gə̄ a rāān̄ kə de yāí gēé ní.

^15-16 Anī Balam tə́da najə̄ gə̄ ń toō: Mā Balam ngōn̄ Beor, mā ń i de kə́ kumḿ a̰a̰ yá̰á̰ kə́ to loo mundə̄ tə́ ō, mā ń i de kə́ nge koō najə̄ kɔr̄ Nə́ɓā ō, mā ń i nge ger̄ yá̰a̰ yā Nə́ɓā kə́ dɔɔ́ sa̰y ngá̰ý ní ō, nge ka̰a̰ yá̰a̰ gə̄ ń Nə́ɓā kə́ tɔ́gən i ngá̰ý ɔjə̄m̄ ní ō. Dan ń m̄-rɔȳ Nə́ɓā anī, ni-tḛḛ̄ kumḿ adə̄ m-á̰á̰ yá̰á̰ kə́ to loo mundə̄ tə́.

¹⁷ Ōōī najə̄ kɔrə̄ḿ: M-á̰á̰ yá̰á̰ ń a rāā yā reē ní, ba a reē i kə́ ngɔr ń toō tə́ aĺ ɓáý. M-ə̄ndā ma̰ȳ yá̰á̰ kógə̄ḿ kə́ a rāā yá̰a̰ m-á̰a̰ m̄-ger̄. Ba i yá̰á̰ kə́ a rāā yá̰a̰ i ndɔ̄ń tə́ ɓáý. Yá̰á̰ ní n toó: Tə́yō̰ kógə̄ḿ teē gír kaa yā Jakob tə́, nge ko̰o̰ ɓē kógə̄ḿ teē dan ngán Israel gə̄ tə́, tə̄ndā no de gə̄ kə́ Moab gə̄ ō, dɔ ngán Set gə̄ ō, kə kāgə̄ ko̰o̰ ɓē kə́ jīn tə́.

¹⁸ Ni a taā ɓē kə́ Edom ō, gō nang kə́ Seir ń i ɓē yā madə̄ ba̰ā̰n gə̄ ní ō. Israel ɔjə tɔ́gən kə̄ ndágá.

¹⁹ Nge ko̰o̰ ɓē kógə̄ḿ teē dan ngán Jakob gə̄ tə́, gotə de gə̄ ń na̰yn̄ kem ɓēé ní, ni-tɔ̄l̄də́ malang.

Balam ɔjə kadə̄ madə̄ ba̰ā̰ ngán Israel gə̄ a nujən̄ sák sák

²⁰ Gō tə́ anī Balam a̰a̰ Amalek gə̄ ba tə́da najə̄ gə̄ ń toō: Amalek gə̄ i nápar de gə̄ kə́ tɔ́gə́də́ i ngá̰ý, banī ndɔ̄ kə́rēý tə́ anī a nujən̄də́ sák sák kɔ̄ɔ́.

²¹ Balam a̰a̰ Keni gə̄ ba əda na: Kújə yāsí gə̄ i kújə́ kə́ ngan̄g gə̄ ō, ɓē yāsí i tītə̄ ɓē yel̄ kə́ ndi i dɔ mbalá ō.

²² Banī ndɔ̄n tə́ anī hor a o̰o̰ kújə yāsí gə̄ ō, Asiri gə̄ a əhɔn̄sí ɓəlo tə́ ō.

²³ Ta tɔ̄l̄ ta anī Balam tə́da najə̄ gə̄ ń toō: Ndoō wa. I náā n a teē kum yá̰á̰ ń Nə́ɓā a rāā tə́ ní?

²⁴ To bo gə̄ ḭḭn̄ kum kā̰ kə́ Kitim tə́ reē ugə̄n̄. Ngé taā ɓē gə̄ rāān̄ kum Asiri gə̄ ndoō tə́ ō, rāān̄ kum Eber gə̄ ndoō tə́ ō, banī ta tɔ̄l̄ tadə́ anī, nin̄ kɔ́ gə̄ a nujən̄ sák sák kɔ̄ɔ́ ō.

²⁵ Balam tə́da najə̄ gə̄ ń noō oy anī, ɔtə əsō róbó ta kaw̄ kə̄ gogə́ ɓēé looneé ō, Balak ɔtə aw̄ loo yān ō.