TƏ́DA 23 - Bibəl ta Sar̄

¹ Balam əda Balak na: Ī-rāā loo tun̄ yá̰a̰ gə̄ gír sīrí ādə̄m̄ loo ń toō tə́ ō, ī-reē kə man̄g gə̄ sīrí ō, bal batə̄ gə̄ sīrí ō.

² Balak rāā yá̰á̰ ń Balam mērə̄n rāā ní. Gō tə́ anī nin̄ jōó mbak ndējə̄n̄ man̄g kə́ bəra kógə̄ḿ ō, bal batə̄ kógə̄ḿ ō, kə dɔ loo tun̄ yá̰a̰ gēé.

³ Balam əda Balak na: Ī-ra laā kadə dā̰ yāí gə̄ ń ī-róō horoó tə́ toō, ba mā m-ā m-ɔ́tə kɔ̄ɔ́ rɔ̄ tə́ yā kaw̄ dan sa̰y sḛ́ý. Majanī Kɔ́ɔ̄ɓē a tə́nī taḿ. Najə̄ ń a ədam̄ ní ká i najə̄ rí gə̄gē anī, m-ā m-ə́daī. Balam ɔtə aw̄.

⁴ Nə́ɓā tə́nī ta Balam, anī Balam ədan na: m̄-mēr̄ rāā loo tun̄ yá̰a̰ gə̄ gír sīrí, ba m-ādə̄ ndējə̄n̄ man̄g kə́ bəra kógə̄ḿ ō, bal batə̄ kógə̄ḿ ō, kə dɔ loo tun̄ yá̰a̰ gə̄ ní.

⁵ Anī Kɔ́ɔ̄ɓē əndā najə̄ ta Balam tə́ ədan na: Ī-tél āw̄ gogə́ rɔ̄ Balak tə́ ba ɔ̄r̄ najə̄ seneé tītə̄ ń noō.

⁶ Balam tél aw̄ anī ənge Balak ra i kə njan kə́ dɔɔ́ kadə dā̰ yān gə̄ ń róō horoó tə́ ní ō, ənge de kə́ bo gə̄ malang kə́ Moab ō.

⁷ Tā anī ni tə́da najə̄ gə̄ ń toō: Balak əla gōḿ tə́ dɔ nang kə́ Aram tə́ adə̄ m̄-reē. Mban̄g kə́ Moab əla ɓārə́m̄ tə́ dɔ mbal̄ gə̄ kə́ gír ɓē tə́ tə́ ba ədam̄ na: Ī-reē, ī-ndɔ̄ĺ de gə̄ kə́ gír kaa yā Jakob tə́ ādə̄m̄. Ī-reē ə̄nī taí gō ngán Israel gə̄ tə́ ādə̄m̄.

⁸ Deē ń Nə́ɓā ndɔ̄lə́n aĺ ní, loo kadə̄ m̄-ndɔ̄lə́n i ba̰ý, deē ń Kɔ́ɔ̄ɓē ənī tan gōn tə́ aĺ ní, loo kadə̄ m-ə̄nī taḿ gōn tə́ i ba̰ý?

⁹ Ré m̄-ra ta tél mbal̄ gə̄ tə́ ba m-á̰a̰ dɔdə́ anī, ré m̄-ra dɔ ngán mbal̄ gə̄ tə́ dɔɔ́ ba m-ə̄ndā ma̰ȳdə́ anī, m-á̰a̰ i gír de gə̄ kə́ ndin̄ tayā ba əlan̄ rɔ̄də́ dan nápar de kə́ rang gə̄ tə́ alé.

¹⁰ I náā n asə tə́da dūbə̄ de kə́ gír kaa yā Jakob tə́ ní? I náā n asə tə́da kutə de kə́ gír kaa yā Israel tə́ ní? Ādə̄ mə̄kɔ́ kə dɔḿ m-óy yo yā de kə́ súmūú gə̄ n noō ō, ādə̄ yá̰á̰ ń a rāā kósə Israel gə̄ ní rāām̄ ō.

¹¹ Balak əda Balam na: I rí kə́ beé n ī-rāā seḿ toō? m̄-reē seí i kadə̄ ī-ndɔ̄ĺ madə̄ ba̰ā̰ḿ gə̄ anī ḭ̄ ī-tɔ́r̄ taí dɔdə́ tə́ a?

¹² Balam tél əda na: Ré m-ā m-ɔ̄r̄ najə̄ anī, i najə̄ ń Kɔ́ɔ̄ɓē əndā taḿ tə́ ní ngóy n kə m-ɔ̄r̄ aĺ a?

Balam tɔ́r̄ tan dɔ ngán Israel gə̄ tə́ nja kə́ nge ko̰ jōó

¹³ Balak tél əda Balam na: Ī-reē ādə̄ m-āw̄ seí loo kə́ rang tə́ kadə̄ ī-ra tū tə́ á̰a̰ń gír de gə̄ ní, ba ī-ndɔ̄ĺdə́ ādə̄m̄. Kété ní á̰a̰ i núsə́də́ ngóy, adə̄ i malang alé.

¹⁴ Balak aw̄ kə Balam bátə́ teē seneé loo ngɔ̄m̄ loo kə́ dɔ mbal̄ Pisga tə́. Ni-rāā loo tun̄ yá̰á̰ gír sīrí, ba tɔ̄l̄ man̄g kógə̄ḿ ō, bal batə̄ kógə̄ḿ ō, ba tun̄ kə dɔ loo tun̄ yá̰a̰ gēé.

¹⁵ Gō tə́ anī Balam ədan na: Ī-ra laā kadə dā̰ yāí gə̄ ń ā ī-róō horoó tə́ toō, ba m-ā m-āw̄ yā ra nú ngóō.

¹⁶ Kɔ́ɔ̄ɓē tə́nī ta Balam, ni-əndā najə̄ kógə̄ḿ tan tə́ ba ədan na: Ī-tél āw̄ gogə́ rɔ̄ Balak tə́, ba najə̄ ń ā ə́dá ní n toó.

¹⁷ Balam tél aw̄ anī ənge Balak ra i kə njan kə́ dɔɔ́ kadə dā̰ yān gə̄ ń a róō horoó tə́ ní ō, de kə́ bo gə̄ kə́ Moab ran̄ seneé ō. Balak dəjen najə̄ əda na: Kɔ́ɔ̄ɓē əda na i rí?

¹⁸ Anī Balam tə́da najə̄ gə̄ ń toō: Balak, ḭ́ḭ dɔɔ́, ōō. Ngōn̄ Sipor, ī-nēl̄ mbīí ōoń najə̄ kɔrə̄ḿ.

¹⁹ Nə́ɓā i deē á a sor̄ alé. Ni i ngōn̄ kaa Adam á a tūr̄ ndūn alé. Ni a ɔr̄ najə̄ i karī kanjə̄ rāā yá̰a̰ a? Yá̰á̰ ń ni-ənī míndən yā rāā ní, a rāā yá̰á̰ ní yā kadə̄ udə gírí.

²⁰ m̄-ndigə tɔ́r̄ taḿ dɔ kósə de gə̄ ń toō tə́, tɔdɔ̄ Kɔ́ɔ̄ɓē adə̄də́ tɔ́r̄ ta, m-ā m̄-tūr̄ yá̰á̰ kógə̄ḿ tū tə́ alé.

²¹ Kɔ́ɔ̄ɓē a̰a̰ yá̰á̰ kə́ majaĺ dan ngán Israel gə̄ tə́ aĺ ō, ni-a̰a̰ yá̰á̰ kə́ gōtə́ aĺ dɔ dáńdə́ tə́ aĺ ō. Ni i Nə́ɓā yādə́ ō, ni-ndi i dɔ dáńdə́ tə́ ō. Nin̄ ɓōkə́n̄ mban̄g yādə́ ń i Kɔ́ɔ̄ɓē ní tɔ̄ȳ ō.

²² I ni n teē sedə́ kɔ̄ɔ́ dɔ nang kə́ Ejiptə tə́ kə́ tɔ̄gə́ kə́ tītə̄ tɔ́gə dɔgə ní.

²³ Kəndā gara gətóo dan ngán Israel gə̄ tə́ ō, koō ta kɔdə̄ sāā gə̄ gətóo dan ngán Israel gə̄ tə́ ō. Ré asə dɔ tə́ anī a ədan̄ ngán Jakob gə̄ ō, ngán Israel gə̄ ō, yá̰á̰ ń Nə́ɓā rāā ní.

²⁴ Á̰a̰ī gír de gə̄ kə́ a ḭḭn̄ kə̄ dɔɔ́ tītə̄ dā̰ kə́ do̰, á̰a̰ī kósə de gə̄ kə́ ḭḭ ran̄ dɔɔ́ tītə̄ ɓɔl. Ni-əsa dā̰ kəhɔn ō, a̰ȳ mósən ō, pá tá tél to nang tə́.

²⁵ Balak əda na: Ré ī-ndigə ndɔ̄ĺdə́ aĺ anī, ī-lōō gíŕ tɔ́r̄ taí tə́ dɔdə́ tə́.

²⁶ Anī Balam tél ədan na: m̄-tāāī kété aĺ a? M-ə́da na i yá̰á̰ ń Kɔ́ɔ̄ɓē a ədam̄ ní ngóy n m-ā m-ə́da.

Balam tɔ́r̄ tan dɔ ngán Israel gə̄ tə́ nja kə́ nge ko̰ mətá

²⁷ Balak əda Balam na: Ī-reē ādə̄ m-āw̄ seí loo kə́ rang tə́ ɓáý to̰. Majanī Nə́ɓā a ndigə kadə̄ ī-ndɔ̄ĺ kósə de gə̄ ń toō loo ní tə́ ādə̄m̄.

²⁸ Balak aw̄ kə Balam dɔ mbal̄ Peor tə́ ta dəla loo tə́.

²⁹ Balam ədan na: Ī-rāā loo tun̄ yá̰a̰ gə̄ gír sīrí loo ń toō tə́ ādə̄m̄, ba ī-tɔ̄l̄ man̄g kə́ bəra sīrí ō, bal batə̄ sīrí ō, ādə̄m̄.

³⁰ Balak rāā yá̰á̰ ń Balam ədan ní. Gō tə́ anī ni tɔ̄l̄ man̄g kógə̄ḿ ō, bal batə̄ kógə̄ḿ ō, ba tun̄ kə dɔ loo tun̄ yá̰a̰ gēé.