TƏ́DA 20 - Bibəl ta Sar̄

Man̄ kə́ Meriba

¹ Ngán Israel gə̄ malang reē ugə̄n̄ kem dəla loo kə́ Sin tə́ kə nāā kə́ ta kəga dɔ ba ndin̄ Kades. Miriam oy i loo ń noō tə́ ō, dubə̄nən̄ i loo ń noō tə́ ō.

² Man̄ kə́ tām̄ yā ngán Israel gə̄ tə́ gətóo, adə̄ kósə de gə̄ kánə̄n̄ naā dɔ Moijə nin̄ kə Aaro̰ tə́, ba ḭḭn̄ sedə́ kə najá

³ kɔ̄lə̄n̄ kə Moijə ədan̄ na: Ngákó̰ó̰jí gə̄ ń oyn̄ ta kum Kɔ́ɔ̄ɓē tə́ ní, j-oy sedə́ anī i só tə́.

⁴ Jḭḭ ń i ngé kán̄ naā gə̄ yā Kɔ́ɔ̄ɓē ní, ī-reēī sejí kem dəla loo ń toō tə́ kadə̄ j-oy naā tə́ kə yá̰a̰ kul̄ yājí gēé i tām̄ rí tə́?

⁵ Ī-teēī sejí kɔ̄ɔ́ kem ɓē ké Ejiptə tə́ ba ī-reēī sejí loo kə́ majaĺ ń toō tə́ i tām̄ rí tə́? I loo kə́ yā dubə̄ń kōō aĺ ō, kāgə̄ kótə̄ gətóo tū tə́ ō, kāgə̄ nduú gətóo tū tə́ ō, kāgə̄ gərenadə gətóo tū tə́ ō, man̄ kə́ yā ka̰ȳ lē gətóo ō.

⁶ Moijə nin̄ kə Aaro̰ əya̰n̄ ngán Israel gə̄ ba ɔtə aw̄n̄ ta kújə kənge naā tə́, əsō sébən̄ kumdə́ nang tə́. Anī kɔsə gɔn yā Kɔ́ɔ̄ɓē teē ta kumdə́ tə́.

⁷ Kɔ́ɔ̄ɓē əda Moijə na:

⁸ Ún kāgə̄ yāí ba sḭḭ̄ kə ngōkó̰ó̰í Aaro̰ ī-ɓāríī ngán Israel gə̄ ādə̄ ɔsən̄ dɔdə́ naā tə́, ba ɔ̄rī najə̄ kə mbal̄ ń ra noó ta kumdə́ tə́, anī mbal̄ ní a adə̄sí man̄. Ā ī-rāā kadə̄ man̄ teē tū mbal̄ ní tə́ kadə̄ ngán Israel gə̄ a̰ȳn̄ kə yá̰a̰ kul̄ yādə́ gēé.

⁹ Moijə aw̄ un kāgə̄ ń to ta kum Kɔ́ɔ̄ɓē tə́ ní tītə̄ ń Kɔ́ɔ̄ɓē ədanəń ní.

¹⁰ Moijə nin̄ kə Aaro̰ ɓārə̄n̄ ngé kán̄ naā gə̄ adə̄ aw̄ ran̄ kadə mbal̄ ní tə́ ba ədan̄də́ na: Sḭḭ̄ ngé mbātə́ najə̄ gə̄, ōōī. J-asə rāā man̄ kadə̄ teē tū mbal̄ ń toō tə́ a?

¹¹ Moijə un jīn kə̄ dɔɔ́ ba əndā mbal̄ jīn jōó kə kāgə̄ kə́ jīn tə́. Anī man̄ teē tū mbal̄ ní tə́ ngá̰ý kə̄ ta jī tə́ noō, adə̄ ngán Israel gə̄ ō, yá̰a̰ kul̄ yādə́ gə̄ ō a̰ȳn̄.

¹² Banī Kɔ́ɔ̄ɓē əda Moijə nin̄ kə Aaro̰ na: Sḭḭ̄ ī-taāī kemḿ ɔ́jiīń kə̄ ndágá ta kum ngán Israel gə̄ tə́ kadə̄ mā i de kə́ táĺ aĺ ɓá ní, i sḭḭ̄ n ā āwī kə ngé kán̄ naā gə̄ ń toō yā kugə̄ sedə́ dɔ nang ń m-ādə̄də́ tə́ ní alé.

¹³ Kāgə̄ najə̄ kə́ dɔ yá̰á̰ ń noō tə́ əda na: Man̄ kə́ Meriba i man̄ kɔ̄l̄. Tɔdɔ̄ ngán Israel gə̄ kɔ̄lə̄n̄ kə Kɔ́ɔ̄ɓēé loo ń noō tə́. Banī Kɔ́ɔ̄ɓē ɔjədə́ kadə̄ ni i de kə́ táĺ.

Mban̄g kə́ Edom ɔgə̄ ngán Israel gə̄ mān̄ dɔ nang yān tə́

¹⁴ Moijə ndi Kades ba əla de gə̄ rɔ̄ mban̄g kə́ Edom tə́ kadə̄ ədanən̄ na: Najə̄ kɔr̄ ngōkó̰ó̰í Israel n toó: Yá̰á̰ kə́ tōr̄ gə̄ ń rāān̄jí ní, ḭ̄ ī-ger̄ malang.

¹⁵ Kété kaají gə̄ aw̄n̄ dɔ nang kə́ Ejiptə tə́, adə̄ jə-ndi dɔ nang ní tə́ dan i ngá̰ý, banī de kə́ Ejiptə gə̄ rāān̄ kaají gə̄gē jḭḭ gə̄gē majaĺ ngá̰ý.

¹⁶ Jə-no kə̄ dɔ Kɔ́ɔ̄ɓē tə́ anī ni oō nōō yājí, adə̄ əla de kə́ dɔ rā̰ tə́ kógə̄ḿ adə̄ reē teē sejí kɔ̄ɔ́ kem ɓē kə́ Ejiptə tə́. Ngɔlaā ní jḭḭ i kem ɓē kə́ Kades ń i kadə dɔ nin̄ dɔ nang yāí tə́ ní.

¹⁷ Ní ə́yá̰jí ādə̄ jə-mān̄ dɔ nang yāí tə́. J-a jə-gān̄g kem ndɔr̄ kə́ dubə̄n̄ yá̰a̰ tū tə́ aĺ ō, j-a jə-gān̄g kem ndɔr̄ kāgə̄ nduú aĺ ō, j-a j-a̰ȳ man̄ kə́ kem bəlo man̄ gə̄ tə́ aĺ ō. J-a j-un i róbə kɔsə yā mban̄g. J-a jə-tɔ̄ geleé aĺ ō, ko̰ó̰ aĺ ō, bátə́ kadə̄ j-əndań dɔ nang yāí jə-gān̄g.

¹⁸ Banī mban̄g kə́ Edom tél ədan na: Ā ī-mānī dɔ nang yāḿ tə́ alé. Ré ī-nāāī mān̄ anī m-ā m̄-rɔ̄ɔ̄sí.

¹⁹ Ngán Israel gə̄ ədanən̄ na: J-a j-un i róbə kɔsə. Ba ré j-a̰ȳ man̄ yāí kə yá̰a̰ kul̄ yājí gēé anī, j-a j-adī nar gírí. Yá̰á̰ ń jə-sāā ní i kadə̄ jə-mān̄ dɔ nang yāí tə́ kə njají ngóy.

²⁰ Banī mban̄g kə́ Edom tél əda ɓáý to̰ na: Ā ī-mānī alé. Banī ni ɔy ngé rɔ̄ɔ̄ gə̄ ngá̰ý teē téniń ta ngán Israel gə̄.

²¹ I beé n mban̄g kə́ Edom ɔgə̄ń ngán Israel gə̄ mān̄ dɔ nang yān tə́ ní. Adə̄ ngán Israel gə̄ unən̄ róbə́ kə́ rang.

Aaro̰ oy

²² Ngán Israel gə̄ malang ḭḭn̄ Kades aw̄ ugə̄n̄ mbal̄ Hor tə́.

²³ Mbal̄ Hor ra i dɔ nang kə́ Edom tə́. Kɔ́ɔ̄ɓē ɔr̄ najə̄ kə Moijə ō, Aaro̰ ō, tū tə́ əda na:

²⁴ Aaro̰ a oy ngɔr yā kaw̄ gō kaan gə̄ tə́, tɔdɔ̄ dɔ nang ń m-ādə̄ ngán Israel gə̄ ní a ugə̄ tū tə́ alé, tām̄ sḭḭ̄ ī-mbātíī koō taḿ ta kəɓa man̄ kə́ Meriba tə́.

²⁵ Beé ní, ún Aaro̰ nin̄ kə ngōnə̄n Eleajar āw̄ sedə́ dɔ mbal̄ Hor tə́.

²⁶ Ā ī-ró̰ȳ kūbə̄ tun̄ yá̰a̰ gə̄ kə́ rɔ̄ Aaro̰ tə́ yā tə́la rɔ̄ Eleajar tə́. Gō tə́ anī Aaro̰ a oy loo ń noō tə́ yā kaw̄ gō kaan gə̄ tə́.

²⁷ Moijə rāā tītə̄ ń Kɔ́ɔ̄ɓē ədań ní, adə̄ nin̄ mətá mbak alə̄n̄ dɔ mbal̄ Hor tə́ ta kum ngán Israel gə̄ tə́ malang.

²⁸ Moijə ró̰ȳ kūbə̄ gə̄ rɔ̄ Aaro̰ tə́ ba tə́ládə́ rɔ̄ Eleajar tə́. Anī Aaro̰ oy loo ní tə́ ta tél mbal̄ tə́. Banī Moijə nin̄ kə Eleajar risən̄ kɔ̄ɔ́ dɔ mbalá.

²⁹ Ngán Israel gə̄ malang a̰a̰n̄ kadə̄ Aaro̰ oy kɔ̄ɔ́ anī nōōnən̄ ndɔ̄ kutə mətá.