TƏ́DA 19 - Bibəl ta Sar̄

Bū kó̰o̰ man̄g kə́ kərē

^1-2 Kɔ́ɔ̄ɓē adə̄ Moijə nin̄ kə Aaro̰ ndū najə̄ gə̄ ń toō: Ādə̄ ngán Israel gə̄ adə̄n̄sí kó̰o̰ man̄g kə́ kərē kə́ yá̰á̰ kógə̄ḿ rāān aĺ ō, ənīn̄ júgə́ kɔ́ɔn tə́ nja kógə̄ḿ aĺ ɓáý ō.

³ Kó̰o̰ man̄g ní ā ādī Eleajar ń i nge tun̄ yá̰á̰ ní. A teēn̄ seneé gidə ɓē tə́ ndágá ba a əjan̄ kɔ́ɔn ta kum Eleajar tə́.

⁴ Eleajar a ɔdə mósən kə ta ngōn̄ jīneé, ba a sə̄kā nja sīrí kum kə̄ ta róbə́ kújə kənge naā tə́.

⁵ Gō tə́ anī a róōn man̄g ní kə taá malang ta kumən tə́. A róōn̄ ndār̄ə́n ō, dā̰n ō, mósən ō, yedə̄n ō.

⁶ Nge tun̄ yá̰a̰ a un kāgə̄ sédər ō, kámbə isopə ō, bḭḭ̄ batə̄ kə́ kəla kum man̄ yá̰á̰ kə́ kərē pírírí tə́ ō, ba a ɓōkə́də́ kum hor ń a o̰o̰ kó̰o̰ man̄g tə́ ní.

⁷ Gō tə́ anī nge tun̄ yá̰a̰ a tə́go kūbə̄ yān gə̄ ō, a ndogə̄ man̄ ō, pá tá a udə kem ɓēé ɓáý. Banī majaĺ a tákə̄n bátə́ kadə̄ loo tíbə dɔn tə́

⁸ Nge róō man̄g ní a tə́go kūbə̄ yān gə̄ ō, a ndogə̄ man̄ ō, majaĺ a tákə̄n bátə́ kadə̄ loo tíbə dɔn tə́ ō.

⁹ Ba i de kə́ majaĺ tákə̄n alé n a ɔy bū kó̰o̰ man̄g ní yā kaw̄ń gidə ɓē tə́ ndágá yā ɓōkə́ loo kə́ unjə̄ njáý njáý tə́ ní. Ngán Israel gə̄ a ngɔ̄mə̄n̄ bū kó̰o̰ man̄g ní yā guŕ kum man̄ tə́go rɔ̄ kə́ yā kɔrə̄ń majaĺ tə́. Nge ń noō i yá̰á̰ kə́ tun̄ tām̄ yā majaĺ tə́.

¹⁰ Nge kɔy bū kó̰o̰ man̄g ní a tə́go kūbə̄ yān gə̄ ō, majaĺ a tákə̄n kadə̄ loo tíbə dɔn tə́ ō. Nge ń noō i ndū najə̄ kə́ a to ngándáńg tām̄ yā ngán Israel gə̄ tə́ ō, tām̄ yā tə̄rā gə̄ ń ndin̄ dɔ dáńdə́ tə́ ní ō.

Ndū najə̄ kə́ dɔ tə́go rɔ̄ tə́

¹¹ Deē ń ɔdə nīń deē ní, tél de kə́ yḛr ndɔ̄ sīrí.

¹² Kɔ́ɔ̄ a tə́go rɔ̄n kə ndɔ̄ kə́ nge ko̰ mətá ō, kə́ nge ko̰ sīrí ō, kə man̄ tə́go rɔ̄ɔ́ pá tá a tél de kə́ unjə̄ njáý njáý ɓáý. Ba ré ni tə́go rɔ̄n kə ndɔ̄ kə́ nge ko̰ mətá aĺ ō, kə́ nge ko̰ sīrí aĺ ō anī, ndi i de kə́ unjə̄ njáý njáý tə́ ɓáý.

¹³ Deē ń ɔdə rɔ̄ nīń de kə́ koy banī tə́go rɔ̄n adə̄ tél de kə́ yḛr aĺ alé ní, kɔ́ɔ̄ a reē i kə yá̰á̰ kə́ majaĺ kə̄ dɔ kújə yā Kɔ́ɔ̄ɓē tə́. A ɔrə̄n̄ deē ní kɔ̄ɔ́ dan ngán Israel gə̄ tə́. Man̄ tə́go rɔ̄ ɔdə rɔ̄n aĺ ní, majaĺ ń tákə̄n ní a na̰y dɔn tə́.

¹⁴ Ndū najə̄ kə́ rang gə̄ kə́ yā ngɔ̄m̄ n toó: Ré deē kógə̄ḿ oy kem kújə tandā tə́ anī, ngé kudə gōn tə́ gə̄ ō, de gə̄ ń i kum tə́ ní ō a télən̄ de kə́ yḛr gə̄ ndɔ̄ sīrí.

¹⁵ Səmbē ń ndi kem kújə tandā tə́ ba ta i kə́ kutə̄ aĺ ō, kə́ do̰ō̰ kə kəlaá aĺ ō ní a téĺ kə́ yḛr.

¹⁶ Ré deē kógə̄ḿ njə̄rā bembeé ba əɓa dɔ nīń de kə́ tɔ̄l̄nən̄ kə kaskaraá aké oy i yo kə́ karī, aláa əndā njan i dɔ kə̄ngā deē tə́, aké əɓa i dɔ ɓádə deē anī, a téĺ kə́ yḛr ndɔ̄ sīrí.

¹⁷ Deē ń i kə́ yḛr ní a tə́gonən̄ i kə bū kó̰o̰ man̄g kə́ tun̄ tām̄ yā majaĺ tə́. A ɔyn̄ bū kó̰o̰ man̄g ní yā ɓōkə́ kem jóó, ba a ɔdən̄, man̄ kə́ a əɓa nang tə́ yā ɓōkə́ dɔ tə́.

¹⁸ De kə́ yḛr alé a un kámbə isopə yā kəla kum man̄ ní tə́, ba a sə̄kā dɔ kújə tandā ń deē oy kemeé tə́ ní ō, dɔ yá̰a̰ malang kə́ kemeé tə́ ō, dɔ de gə̄ kə́ kemeé tə́ ō, aĺ anī a sə̄kā dɔ deē ń ɔdə kə̄ngā de kə́ koy, aké nīń de kə́ tɔ̄l̄nən̄, aké nīń de kə́ oy yo kə́ karī, aké dɔ ɓádə deē tə́ ní.

¹⁹ Deē ń i kə́ unjə̄ njáý njáý ní, de kə́ yḛr alé a sə̄kā man̄ tə́go rɔ̄ dɔn tə́ i kə ndɔ̄ kə́ nge ko̰ mətá ō, kə ndɔ̄ kə́ nge ko̰ sīrí ō. Kə ndɔ̄ kə́ nge ko̰ sīrí ré sə̄kān̄ man̄ dɔn tə́ oy anī, ni a tə́go kūbə̄ yān gə̄ ō, a ndogə̄ man̄ ō. Ba ré loo tíbə anī, ni a tél de kə́ unjə̄ njáý njáý.

²⁰ Banī deē ń kə́ yḛr ba tə́go rɔ̄n aĺ ní, a ɔr̄nən̄ kɔ̄ɔ́ dan ngé kán̄ naā tə́, tām̄ ni a reē kə majaĺ yā tákə̄n loo kə́ táĺ yā Kɔ́ɔ̄ɓē. Sə̄kān̄ man̄ tə́go rɔ̄ dɔn tə́ aĺ ní ni i de kə́ yḛr.

²¹ Nge ń noō i ndū najə̄ kə́ a to ngáńdáńg tām̄ yā ngán Israel gə̄ tə́. De kə́ nge sə̄kā man̄ tə́go rɔ̄ dɔ deē tə́ a tə́go kūbə̄ yān gə̄ ō, deē ń ɔdə rɔ̄ man̄ tə́go rɔ̄ ní, a tél de kə́ yḛr bátə́ kadə̄ loo tíbə dɔn tə́ ō.

²² Yá̰a̰ malang ń de kə́ majaĺ tákə̄n ɔdə rɔ̄ ní, a tél yá̰á̰ kə́ yḛr ō, deē ń a ɔdə rɔ̄ ní a tél de kə́ yḛr kadə̄ loo tíbə dɔn tə́ ō.