TƏ́DA 15 - Bibəl ta Sar̄

Ndujə̄ ō, Yibə̄ ō, Kasə ō, kə́ ndējə̄

^1-2 Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō: Ré ūgī dɔ nang ń Kɔ́ɔ̄ɓē adə̄sí kadə̄ ī-ndiī tū tə́ ní tə́,

³ ba ā ī-róōī dā̰ horoó yā kadə̄m̄, aláa ā ī-tunī dā̰ kənī ndū, aláa dā̰ kə́ kə gō kem ndigə yāsí, aláa dā̰ kə́ ndɔ̄ rāā nāā tə́ yā kadə̄m̄ anī, ā ī-gērāī i man̄g, aláa i batə̄, aláa i bə̄yā̰ n ā ī-tunī yā kadə̄ sēēn nel̄ Kɔ́ɔ̄ɓē ní.

⁴ Ba nge ndejə̄ dā̰ ní a əndā ndujə̄ kə́ ló̰ȳ kə yibīí kem lāngá mətá dɔ tə́. A ló̰ȳ ndujə̄ ní i kə yibə̄ kə́ asə kem lāngá kógə̄ḿ kə núsə.

⁵ A adə̄ kasə nduú kə́ yā tə́te kem lāngá kógə̄ḿ kə núsə dɔ ngōn̄ batə̄ kə́ yā róō horoó tə́ ní, aláa kə́ yā tun̄ karī tə́ ní.

⁶ Ré i bal batə̄ anī a adə̄ ndujə̄ kə́ ló̰ȳ kə yibīí kem lāngá mehḛ́ dɔ tə́. A ló̰ȳ ndujə̄ ní i kə yibə̄ kə́ asə kem lāngá jōó.

⁷ A adə̄ kasə nduú dɔ tə́ i kem lāngá jōó ō. Ā ī-ndējə̄ Kɔ́ɔ̄ɓē yá̰á̰ kə́ sēēn nel̄ gə̄ ń noō.

⁸ Ré i man̄g kə́ bəra n deē róō horoó aláa tun̄ tām̄ ndūn kə́ ənī tə́, aláa tām̄ yā kem kógə̄ḿ tə́ adə̄m̄ anī,

⁹ deē ní a adə̄ ndujə̄ kem lāngá ndōhó dɔ tə́ ō, a ló̰ȳ ndujə̄ ní kə yibə̄ kə́ asə kem lāngá mətá ō,

¹⁰ a adə̄ kasə nduú kem lāngá mətá dɔ tə́ ō. Yá̰a̰ tun̄ kə́ sēēn nel̄ Kɔ́ɔ̄ɓē n noó.

¹¹ Ré i man̄g kə́ bəra, aké i bal batə̄, aké i ngōn̄ batə̄, aké i ngōn̄ bə̄yā̰ n ā ī-tunī yā kadə̄ Kɔ́ɔ̄ɓē anī, ā ī-rāāī i tītə̄ ń noō.

¹² Dā̰ gə̄ ń ā ī-tunīdə́ yā kadə̄ Kɔ́ɔ̄ɓē ní, ré kutədə́ i kóndóńg gə̄gē anī, ā ādī yá̰a̰ ndējə̄ gə̄ kə́ dɔ tə́ malang.

¹³ Ngán Israel gə̄ malang a unən̄ i gō ndū gə̄ ń noō n a tunə̄nəń yá̰á̰ kə́ sēēn nel̄ Kɔ́ɔ̄ɓē ní.

¹⁴ Ré tə̄rā ń ndi dansí tə́ ngɔr ɓáý, aláa jóó ngá̰ý ní ndigə tun̄ dā̰ kadə̄ sēēn nel̄ Kɔ́ɔ̄ɓē anī, a rāā i tītə̄ yāsí.

¹⁵ Ndū najə̄ ní i tām̄ yā ngé kán naā gə̄ tə́ malang. I tām̄ yāsí sḭḭ̄ ngán Israel gə̄ tə́ ō, tə̄rā gə̄ ń ndin̄ dɔ dáńsí tə́ ní ō. I ndū najə̄ kə́ a tūr̄ aĺ ō, a to ngándáńg ō, tām̄ yāsí tə́ ta kum Kɔ́ɔ̄ɓē tə́.

¹⁶ Ndū najə̄ kə́ tām̄ yāsí tə́ ō, tām̄ yā tə̄rā gə̄ ń ndin̄ dɔ dáńsí tə́ ní ō, i kógə̄ḿ beē.

Mápá kə́ ta kəga dɔ kə́ ndējə̄ Nə́ɓā

^17-18 Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō: Ré ā ūgī dɔ nang ń Kɔ́ɔ̄ɓē a aw̄ sesí kə̄ tū tə́ ní tə́,

¹⁹ ba ā ə́saī mápá kə́ tū tə́ anī, ā ɔ̄rī dɔ yā ndējə̄ Kɔ́ɔ̄ɓē.

²⁰ Ā ī-ló̰yī ndujə̄ yā kɔr̄ mápá tə́. Ba mápá kə́ ta kəga dɔ ń ā ɔ̄rī ní, ā úniī dɔ yā kadə̄n. Ā úniī dɔ mápá ní yā kadə̄n i tītə̄ loo kɔr̄ dɔ kōō kem gárāá.

²¹ Adə̄ kə́ ta kəga dɔ ń ɔ̄rī ní, ā ī-ndejī Kɔ́ɔ̄ɓē. Nge ń noō i ndū najə̄ kə́ a to ngándáńg tām̄ yāsí tə́.

Dā̰ kə́ tun̄ kadə̄ Nə́ɓā yā kutə̄ń dɔ majaĺ kə́ deē rāā kə gō kem ndigə yānneé alé

^22-23 Ndū najə̄ gə̄ ń Kɔ́ɔ̄ɓē əda Moijə kadə̄ ndang adə̄sí sḭḭ̄ ō, ngáńsí gə̄ ō, ngán kaasí gə̄ ō, ta kəla gír tə́ ní, aké ngé gə̄ ń adə̄sí gō madə̄ gə̄ tə́ ní, ré ī-mānī dɔ, ba i kə gō kem ndigə yāsí alé,

²⁴ ré yá̰á̰ kə́ majaĺ ní ngán Israel gə̄ gerə̄n̄ gō aĺ ō anī, i nin̄ malang n a adə̄n̄ man̄g kə́ bəra kə́ yā róō horoó kadə̄ sēēn nel̄ Kɔ́ɔ̄ɓē ní. Nin̄ a ndējə̄n̄ ndujə̄ ō, a tə́ten̄ kasə nduú ō dɔ tə́. A tunə̄n̄ bal bə̄yā̰ tām̄ yā majaĺ tə́ ō.

²⁵ Nge tun̄ yá̰a̰ a rāā yá̰á̰ kə́ yā kutə̄ń dɔ majaĺ ní dɔ ngán Israel gə̄ tə́. Loo ń noō tə́ Nə́ɓā a mā̰ȳ rɔ̄n dɔdə́ tə́. Tām̄ majaĺ ní i kə́ rāā kə gō kem ndigə yādə́ alé ba nin̄ róōn̄ yá̰a̰ horoó ō, tunə̄n̄ yá̰a̰ ō, ndējə̄n̄ Kɔ́ɔ̄ɓē najə̄n tə́.

²⁶ Nə́ɓā a mā̰ȳ rɔ̄n dɔ ngán Israel gə̄ tə́ malang ō, dɔ tə̄rā gə̄ ń ndin̄ dɔ dáńsí tə́ ní ō, tɔdɔ̄ i de gə̄ malang n najə̄ əsō dɔdə́ tə́ tām̄ majaĺ kə́ rāā kə gō kem ndigə yādə́ aĺ ní tə́.

²⁷ Ré i de kə́ kógə̄ḿ beē n rāā yá̰á̰ kə́ majaĺ kə gō kem ndigə yānneé alé anī, deē ní a ndējə̄ ngōn̄ bə̄yā̰ kə́ ɓāl̄ kógə̄ḿ kə́ yā tun̄ tām̄ yā majaĺ ní tə́.

²⁸ Nge tun̄ yá̰a̰ a rāā yá̰á̰ kə́ yā kutə̄ń dɔ majaĺ kə́ rāā kə gō kem ndigií aĺ ní dɔ deē ní tə́ ta kum Kɔ́ɔ̄ɓē tə́ ō, Kɔ́ɔ̄ɓē a mā̰ȳ rɔ̄n dɔn tə́ ō,

²⁹ De gə̄ ń rāān̄ yá̰á̰ kə́ majaĺ kə gō kem ndigə yādə́ aĺ ní, ká i ngán Israel gə̄, aké i tə̄rā gə̄ ń ndin̄ dandə́ tə́ ní gə̄gē anī, ndū najə̄ kə́ dɔdə́ tə́ i kógə̄ḿ beē.

³⁰ Banī deē ń rāā yá̰á̰ kə́ majaĺ kə gō kem ndigə yānneé ní, ká i ngōn̄ nge ɓē, aké i tə̄rā gə̄gē anī, ni kídə̄ i Kɔ́ɔ̄ɓē adə̄ a ɔr̄nən̄ kɔ̄ɔ́ dan gír deē yān gə̄ tə́.

³¹ Ni-kídə̄ najə̄ yā Kɔ́ɔ̄ɓē ō, mān̄ dɔ míndən ō ɓá ní a ɔr̄nən̄ kɔ̄ɔ́: Majaĺ yān na̰y dɔn tə́.

Deē kógə̄ḿ man̄ dɔ ndū najə̄ kə́ dɔ sabat tə́

³² Dan ń Israel gə̄ i kem dəla loo tə́ ɓáý ní, əngen̄ deē kógə̄ḿ loo kɔy kīr̄ tə́ ndɔ̄ sabat tə́.

³³ De gə̄ ń əngen̄ deē ní loo kɔy kīr̄ tə́ ní aw̄n̄ seneé no Moijə tə́ ō, Aaro̰ tə́ ō, ngán Israel gə̄ tə́ malang ō.

³⁴ Ənīnən̄ dəngáyá tām̄ yá̰á̰ ń a rāān̄ yā rāā seneé ní deē əda aĺ ɓáý.

³⁵ Tā anī Kɔ́ɔ̄ɓē əda Moijə na: Deē ń toō i yā yo. Ngán Israel gə̄ malang a aw̄n̄ seneé gidə ɓē tə́ ndágá yā tə́nīn kə mbalá yā tɔ̄lən.

³⁶ De gə̄ rāān̄ yá̰á̰ ń Kɔ́ɔ̄ɓē əda Moijə ní. Aw̄n̄ kə deē ní gidə ɓē tə́ ndágá ba tə́nīnən̄ kə mbalá adə̄ oy.

Kəlā gə̄ kə́ ta kūbə̄ gə̄ tə́

^37-38 Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō: Sḭḭ̄ ō, ngáńsí gə̄ ō, ngán kaasí gə̄ ō ní, ā ī-tə́nāī kəro ta kəlā kəjō kūbə̄ yāsí gə̄ tə́, ba a ə́ya̰ī ta kəlā kəjōn kadə̄ teē kə̄ ndágá ō, ā ī-do̰ō̰ī kəlā kə́ ndul gusə gusə gə̄ tū kəron gə̄ tə́ ō.

³⁹ Adə̄ ā ō̰ō̰ī kūbə̄ gə̄ kə́ ta kəlā kəjōdə́ gə̄ teēn̄ kə̄ ndágá, yā kadə̄ ré á̰a̰ī tadə́ anī, əga kemsí dɔ ndū najə̄ gə̄ yā Kɔ́ɔ̄ɓē tə́ malang, kadə̄ ī-rāāiń yá̰a̰ gə̄ ń ədan̄ ní. Loo ń noō tə́ ā úniī gō ngur yá̰a̰ gə̄ kə́ kemsí tə́ ō, kum kəsō yá̰a̰ gə̄ ō, kadə̄ ī-téliīń ngé rāā yá̰a̰ gōtə́ aĺ gə̄ alé.

⁴⁰ I beé n ā ī-gírīiń rāā yá̰a̰ gə̄ ń ndū najə̄ yāḿ gə̄ malang ədan̄ ní ō, ā ī-téliīń de kə́ táĺ gə̄ tām̄ yā Nə́ɓā yāsí tə́ ō ní.

⁴¹ Mā i Kɔ́ɔ̄ɓē Nə́ɓā yāsí, nge teē sesí kɔ̄ɔ́ kem ɓē kə́ Ejiptə tə́ adə̄ mā i Nə́ɓā yāsí rɔ̄kum. Mā i Kɔ́ɔ̄ɓē Nə́ɓā yāsí.