TƏ́DA 12 - Bibəl ta Sar̄

Kɔ́ɔ̄ɓē ənī mo̰y bānjə̄ dɔ Miriam tə́

¹ Moijə taā dəyá̰ Kus kógə̄ḿ. Anī Miriam nin̄ kə Aaro̰ tāmə̄n̄ seneé najə̄ dəyá̰ ń ni-taā ní.

² Nin̄ ədan̄ na: Kɔ́ɔ̄ɓē ɔr̄ najə̄ i kə Moijə ngóy a? Ni-ɔr̄ najə̄ sejí ō aĺ a? Kɔ́ɔ̄ɓē oō najə̄ ní.

³ Tá Moijə i de kə́ ndigə tél kə́ rɔ̄neé kə nang tə́ ngá̰ý. De kə́ dɔ nang tə́ kə́ ndigə tél kə rɔ̄neé kə̄ nang tə́ kə́ asə seneé gətóo.

⁴ Kə̄ ta jī tə́ noō Kɔ́ɔ̄ɓē ɓāŕ Moijə ō, Aaro̰ ō, Miriam ō, ba ədadə́ na: Sḭḭ̄ kɔ́ gə̄ mətá mbak āwī kújə kəngə naā tə́. Anī nin̄ mətá mbak aw̄n̄.

⁵ Kɔ́ɔ̄ɓē risə dan kil̄ man̄ tə́ reē ra ta kújə ní tə́, ba ɓāŕ Aaro̰ nin̄ kə Miriam. Anī nin̄ jōó mbak ndɔ́tə̄n̄ kə̄ kété.

⁶ Kɔ́ɔ̄ɓē ədadə́ na: Najə̄ ń m-ā m-ə́dásí toō ōōī majə. Ré de kə́ nge koō ta yā Nə́ɓā i dansí tə́ anī, mā Kɔ́ɔ̄ɓē m-ā m-ɔ́jən rɔ̄ḿ kadə̄ gerə̄m̄ i kə ta kūl̄ ndɔ̄bə̄ kə́ m-ā m̄-ndɔ̄bə̄n ō, kə najə̄ kə́ m-ā m-ɔ̄r̄ seneé kem nī tə́ ō.

⁷ Banī nge kəla yāḿ Moijə ń i nge ka̰a̰ gō kósə de gə̄ yāḿ gə̄ malang kə gōó majə ní, m̄-rāā seneé i beé alé.

⁸ M-ɔ̄r̄ najə̄ seneé kadə̄ unjə̄ aĺ alé. Tají sɔɔ̄ ta naā ō, m̄-rāā kadə̄ ni a̰a̰m̄ ō, adə̄ ni-a̰a̰ yá̰á̰ ń i Kɔ́ɔ̄ɓē ní. Ba i tām̄ rí tə́ á sḭḭ̄ ī-ɓōlíī alé ba ī-tāmī kə nge kəla yāḿ Moijə ní?

⁹ Kɔ́ɔ̄ɓē rāā wōn̄g dɔdə́ tə́ ngá̰ý ba ɔtə aw̄.

¹⁰ Dan ń kil̄ man̄ ḭḭ kɔ̄ɔ́ dɔ kújə kənge naā tə́ anī, bānjə̄ kə́ ndaa tītə̄ búy kūbə̄ beé teē rɔ̄ Miriam tə́. Aaro̰ mbel a̰a̰n anī rɔ̄n i bānjə̄ malang.

¹¹ Aaro̰ əda Moijə na: Sarya əhɔjí, banī m̄-rāāī ɓɔ́, ī-lōō kəndají najə̄ yá̰á̰ kə́ majaĺ ń jə-rāā loo ɓodə tə́ ní.

¹² Ādə̄ Miriam to tītə̄ ngáń kə́ koy kem kó̰ó̰də́ gə̄ tə́ ń ta teēdə́ kə̄ ndágá anī núsə dā̰də́ i kə́ nujə kɔ̄ɔ́ noō alé.

¹³ Tā anī Moijə rāā Kɔ́ɔ̄ɓē ɓɔ́ əda na: Nə́ɓā, m̄-rāāī ɓɔ́, ájən.

¹⁴ Anī Kɔ́ɔ̄ɓē əda Moijə: Ré bɔbə̄n tībə̄ hōr̄ kumən tə́ anī rɔ̄n a sɔlə̄n bátə́ ndɔ̄ sīrí aĺ a? I beé ní ɔ̄rīin̄ kɔ̄ɔ́ kem ɓēé, ādə̄ ndi gidə ɓē tə́ ndágá ndɔ̄ sīrí. Gō tə́ anī ə́ya̰in̄ ādī tél reē gogə́ kem ɓēé.

¹⁵ Tə̄ɓān̄ Miriam kɔ̄ɔ́ kem ɓēé adə̄ ndi i gidə ɓē tə́ ndágá ndɔ̄ sīrí, banī ngán Israel gə̄ ndɔ́tə̄n̄ loo alé bátə́ kadə̄ tél reēń gogə́ kem ɓēé.

¹⁶ Loo ń noō tə́ tā anī nin̄ ndɔ́tə̄n̄ Haserot aw̄ ndin̄ ɓē kem dəla loo kə́ Paran tə́.