TƏ́DA 11 - Bibəl ta Sar̄

Yá̰á̰ ń rāā ngán Israel gə̄ Tabera ní

¹ Ndɔ̄ kə́rēý tə́ ngán Israel gə̄ tāmə̄n̄ kə Kɔ́ɔ̄ɓē, adə̄ Kɔ́ɔ̄ɓē oō ní nelə̄n alé. Wōn̄g rāān adə̄ ni-əla hor yān dɔdə́ tə́ adə̄ o̰o̰ loo ta ngóy ɓē tə́.

² Kósə de gə̄ əgan̄ kɔŕ kə̄ dɔ Moijə tə́, adə̄ Moijə rāā Kɔ́ɔ̄ɓē ɓɔ́ tām̄ yādə́ tə́, anī hor ní oy.

³ Əndān̄ rī loo ní na i Tabera, tām̄ hor yā Kɔ́ɔ̄ɓē o̰o̰ gérger yā ngán Israel gə̄ tū tə́.

De gə̄ nōōn̄ ta dā̰

⁴ Ndɔ̄ kə́ rang tə́ anī, kósə de gə̄ ké dɔdə́ tɔ́sə̄ naā gə̄ ń ndin̄ dan ngán Israel gə̄ tə́ ní, ngur kəsa dā̰ rāādə́, anī ngurən rāā ngán Israel gə̄ ō, adə̄ tél a ɓarə̄n̄ najə̄ ədan̄ na: I náā n a adə̄jí dā̰ kadə̄ j-əsaī tā.

⁵ Əga kemjí dɔ yá̰a̰ kəsa gə̄ ń kété j-a j-əsaī dɔ nang kə́ Ejiptə tə́ karī ní: Kānjə̄ ō, kosə́ ō, wasə̄ ō, tá̰a̰ puwaro ō, básal ō, túm ō.

⁶ Yá̰a̰ gə̄ ń noō malang gətóon̄ laā. Rɔ̄jí ndəlē raw tām̄ j-a̰a̰ī yá̰á̰ kə́ rang alé ba i mána ngóy.

⁷ Mána ní i yá̰á̰ kə́ to tītə̄ kum kór ba ndaa pɔt pɔt tītə̄ bəto kāgə̄ delyom beé.

^8-9 Ndɔ̄ anī ur̄ kem ɓēé naā tə́ kə tal ń a əhɔ dɔ ɓē tə́ ní. Ba teē kə ndɔ̄ý anī de gə̄ tə̄ndān̄ naā tīn̄ kə̄ loo gə̄ tə́ yā kɔy. A usən̄ mána ní i kə mbal̄ kusə yá̰á̰, aĺ anī a urən̄ i bírí. A ndīr̄nən̄ jóó ō, a rāān̄ makəla tə́ ō. Nelə̄n to tītə̄ nel̄ makəla kə́ kɔr̄ kə yibīí beē.

¹⁰ Moijə oō kōō ngán Israel gə̄ ń ndin̄ kə gō gír kojə yādə́ gēé a nōōn̄ kə̄ ta kújə yādə́ gə̄ tə́ ní. Wōn̄g rāā Kɔ́ɔ̄ɓē ngá̰ý. Rɔ̄ Moijə nelə̄n alé,

¹¹ ba dəje Kɔ́ɔ̄ɓē najə̄ əda na: Kɔ́ɔ̄ɓē, i tām̄ rí tə́ á ī-rāā yá̰á̰ kə́ majaĺ beē seḿ ní? I tām̄ rí tə́ á ī-rāā kem majə seḿ alé ba əndā kəla ngɔ̄m̄ gír de gə̄ ń toō malang ń i yá̰á̰ kə́ ɔȳ ngá̰ý ní dɔḿ tə́ ní?

¹² I mā n m̄-ndān̄ de gə̄ ń toō kemḿ tə́ a? I mā n m-ójə́də́ a? Ba i tām̄ rí tə́ á ī-mērə̄m̄ kətōdə́ dan wurəḿ tə́ tītə̄ ń kó kətō ngōn̄ a ətōń ngōn̄ ní, kadə̄ m-āw̄ sedə́ kem ɓē ń ə̄nī míndí dɔ tə́ yā kadə̄ kaadə́ gə̄ tə́ ní?

¹³ M-ā m-ə́nge dā̰ i rá yā kadə̄ gír de gə̄ ń toō malang? Tām̄ nin̄ nōōn̄ kə̄ dɔḿ tə́ ədan̄ na kə m-ādə̄də́ dā̰ kadə̄ n-əsan̄.

¹⁴ Mə̄kɔ́ kə kérə́ḿ m-ásə kətō gír de gə̄ ń toō malang alé, ɔyn̄ ngá̰ý.

¹⁵ Ré ā ī-rāām̄ i beé anī, ī-tɔ̄lə̄m̄ kɔ̄ɔ́ ādə̄ i só tə́. Ré ī-tɔ̄lə̄m̄ anī ī-rāā i kem majə seḿ kadə̄ m-á̰á̰ yá̰á̰ kə́ tōr̄ ń a rāā yā rāām̄ ní alé.

¹⁶ Kɔ́ɔ̄ɓē tél əda Moijə na: Ī-ɓāŕ kum kɔɔ̄ gə̄ yā ngán Israel gə̄ kutə sīrí ādə̄ reēn̄ rɔ̄ḿ tə́, ngé gə̄ ń ī-ger̄də́ adə̄ nin̄ i kum kɔɔ̄ gə̄ ō, nin̄ i ngé ndóō de gə̄ ndū najə̄ gə̄ ō ní. Ādə̄ reē ran̄ seí ta kumḿ tə́, ta kújə kənge naā tə́.

¹⁷ M-ā m̄-risə yā kɔr̄ najə̄ seí loo ń noō tə́. M-ā m̄-kēgə̄ Ndíĺ ń m-ādī ní sḛ́ý yā kadə̄də́. Loo ń noō tə́ a ngɔ̄mə̄n̄ kósə de gə̄ seí, ba i īkɔ́ n ā ī-rāā kəla kə́ ngan̄g ngá̰ý ń toō kə kérí ní to̰ alé.

¹⁸ Ba ə́dá kósə de gə̄ na: Ī-tə́goī rɔ̄sí ādə̄ majaĺ gətóo dɔsí tə́ tām̄ yā ndɔ̄ kə́ bírí tə́. Ī-rāāī rɔ̄sí na ā ə́ngeī dā̰ yā kəsa. Tām̄ sḭḭ̄ ī-nōōī adə̄ Kɔ́ɔ̄ɓē oō nōō yāsí. Ədaī na ké i náā n a adə̄sí dā̰ kadə̄ ə́saī wa ō, ə́daī na kété ī-ndiī majə ngá̰ý dɔ nang kə́ Ejiptə tə́ ō. Adə̄ Kɔ́ɔ̄ɓē a adə̄sí dā̰ yā kadə̄ ā ə́saī.

¹⁹ A ə́saī i ndɔ̄ kógə̄ḿ ngóy aĺ ō, jōó ngóy aĺ ō, mí ngóy aĺ ō, kutə ngóy aĺ ō, kutə jōó ngóy aĺ ō.

²⁰ Banī ā ə́saī i kə́ njɔ́ḿ gə̄ tə́ nāā kógə̄ḿ. Ā ə́saī dā̰ ní bátə́ kadə̄ teē kó̰ńsí tə́, kadə̄ sēēn ra dɔsí tə́. Tām̄ sḭḭ̄ ī-mbātíī Kɔ́ɔ̄ɓē ń ndi dɔ dáńsí tə́ ní kɔ̄ɔ́ ō, ī-nōōī ta kum Kɔ́ɔ̄ɓē tə́ ə́daī na ké ī-teēī kɔ̄ɔ́ Ejiptə i tām̄ rí tə́ wa ō.

²¹ Moijə tél əda Kɔ́ɔ̄ɓē na: Gír de gə̄ ń m̄-ndi dɔ dáńdə́ tə́ toō nin̄ i dəngam gə̄ dūbūú ɓú mehḛ́, anī ə́da na ā ādə̄də́ dā̰ kadə̄ əsan̄ kə́ njɔ́ḿ gə̄ tə́ nāā kógə̄ḿ a?

²² Ká jə-tɔ̄ləń i batə̄ yājí gə̄ malang, aké i bə̄yā̰ yājí gə̄ malang, aké i man̄g yājí gə̄ malang gə̄gē anī a asədə́ alé. Ká j-əhɔń i kānjə̄ gə̄ kə́ kum bā bo tə́ gə̄gē a asədə́ alé.

²³ Kɔ́ɔ̄ɓē tél əda Moijə na: Tɔ́gə́ Kɔ́ɔ̄ɓē asə aĺ a? Ń toō ní ā á̰a̰ā̰ ké najə̄ ń m-ə́daī ní a rāā yá̰a̰ aké a rāā yá̰a̰ aĺ wa.

Kɔ́ɔ̄ɓē kēgə̄ ndílən adə̄ kum kɔɔ̄ gə̄ kutə sīrí

²⁴ Moijə teē aw̄ əda gír de gə̄ yá̰á̰ ń Kɔ́ɔ̄ɓē əda ní. Gō tə́ anī ni ɔy kum kɔɔ̄ gə̄ yā ngán Israel gə̄ kutə sīrí tə́ndādə́ kə gō gidə kújə kənge naāá.

²⁵ Kɔ́ɔ̄ɓē risə dan kil̄ man̄ tə́ ɔr̄ najə̄ kə Moijə. Ni-kēgə̄ Ndíĺ ń ndi kem Moijə tə́ ní sḛ́ý adə̄ kum kɔɔ̄ gə̄ ní. Dan nəkɔ́ ń ndíl əhɔ loo dɔdə́ tə́ bang ɓá ní a, əlan gír kɔr̄ najə̄ kə́ ngé koō ta gə̄ tə́, banī nayn̄ kə̄ loo kɔr̄ tə́ alé.

²⁶ De gə̄ jōó, Eldad nin̄ kə Medad, rīdə́ i dan kum kɔɔ̄ gə̄ ní tə́. Nin̄ ndin̄ ɓēé ba aw̄n̄ kə madə̄də́ gēé alé. Banī Ndíl əhɔ loo dɔdə́ tə́ adə̄ nin̄ rāān̄ yá̰á̰ kə́ ngé koō ta gə̄ tə́ ō.

²⁷ Ngōn̄ kə́ dəngam kə́rēý a̰ȳ ngɔ̄də̄ aw̄ əda Moijə na: Eldad nin̄ kə Medad ra a rāān̄ yá̰á̰ kə́ ngé koō ta gə̄ tə́ ɓēé noō.

²⁸ Jojue ngōn̄ Nun ń rāā kəla yā Moijə i kə ngōn̄ dūúneé ní əda na: Kɔ́ɔ̄ḿ Moijə, ɔ̄gə̄də́ rāā.

²⁹ Moijə tél ədan na: Ā ī-rāā ni tām̄ yāḿ tə́ a? M-á̰a̰ā̰ ní majə ngá̰ý kadə̄ Kɔ́ɔ̄ɓē adə̄ ngán Israel gə̄ ndílən kadə̄ nin̄ malang télən̄ ngé koō ta yān gə̄.

³⁰ Moijə ō, kum kɔɔ̄ gə̄ yā ngán Israel gə̄ ō, tél aw̄n̄ gogə́ ɓēé.

Yel̄ gə̄ kə́ ton̄ tītə̄ kerwḛy gə̄

³¹ Kɔ́ɔ̄ɓē adə̄ néĺ kógə̄ḿ ḭḭ dām̄ kə́ bā bo tə́ reē kə yel̄ gə̄ kə́ ton̄ tītə̄ kerwḛy gə̄ ɓōkə́də́ kem ɓēé ō, kə gō gidə ɓēé adə̄ gīr̄ gidə əla ta naā tə́ ō. Adə̄ deē a ḭḭ kem ɓēé a njə̄rā ndɔ̄ kógə̄ḿ tá a ənge ta ngóýdə́ dām̄ kə́rēý tə́ ō. a njə̄rā ndɔ̄ kógə̄ḿ tá a ənge ta ngóýdə́ dām̄ kə́ rang tə́ ō. Yel̄ gə̄ ní ton̄ dɔ naā tə́ kum kə dɔɔ́ asə kíl deē jōó.

³² Ndɔ̄ ń noō tə́ kósə de gə̄ ɔyn̄ yel̄ gə̄ ní bátə́ loo tíbə dɔdə́ tə́ ō, ɔyn̄də́ ndɔ̄ɔ́ ō, teē kə ndɔ̄ kə́ noō ō. Deē ń ɔy yel̄ gə̄ ní adə̄ kɔȳdə́ asə kəlōo dūbú mətá aké dūbú sɔ́ ní, ɔy i sḛ́ý beē ɓáý. Gō tə́ anī najən̄də́ kum mbang tə́ kə gō gidə ɓēé.

³³ De gə̄ əlan̄ dā̰ tadə́ tə́ ba əsa urən̄ aĺ ɓáý anī wōn̄g rāā Kɔ́ɔ̄ɓē sedə́ adə̄ rāādə́ yá̰á̰ kə́ tōr̄ ngá̰ý.

³⁴ Əndān̄ rī loo ní na i Kibərot Taaba, kumən na i dɔ ɓádə ngur, tɔdɔ̄ kósə de gə̄ ń ngurən̄ ngá̰ý dan madə̄də́ gə̄ tə́ ní dubə̄n̄də́ i loo ń noō tə́.

³⁵ Ngán Israel gə̄ ḭḭn̄ Kibərot Taaba aw̄ ndin̄ Haserot.