TƏ́DA 10 - Bibəl ta Sar̄

Bərúnjə gə̄ kə́ rāān̄də́ kə gində̄ arjā̰a̰á̰

¹ Kɔ́ɔ̄ɓē əda Moijə na:

² Ī-mēr̄ rāā bərúnjə gə̄ jōó, ādə̄ rāān̄də́ kə gində̄ arjā̰a̰ kə́ koó. Bərúnjə gə̄ ní i yā ɓāŕəń ngán Israel gə̄ kadə̄ kánə̄nəń naā ō, ndɔ́tə̄nəń ɓē ō.

³ Ré a kɔ̄rə́n̄ bərúnjə gə̄ ní jōó mbak anī, i ngán Israel gə̄ malang n a kánə̄n̄ naā rɔ̄í tə́ ta kújə kənge naā tə́ ní.

⁴ Ré kɔ̄rə́n̄ i bərúnjə́ kə́ kógə̄ḿ beē anī, i ngār gə̄ ń nin̄ i ngol ngé rɔ̄ɔ̄ gə̄ yā ngán Israel gə̄ ní ngóy n a kánə̄n̄ naā rɔ̄í tə́ ní.

^5-6 Ré ā ī-tétī ndū bərúnjə anī i yā ndɔ́təń ɓē. Tétə̄n kə́ ta kəga dɔ i kadə̄ de gə̄ kə́ dām̄ kə́ gír ɓē tə́ gə̄ əsōnəń róbó, kə́ nge ko̰ jōó i tām̄ yā de gə̄ kə́ dām̄ mbɔ́r ɓē kə́ geleé tə́.

⁷ Banī ā ī-ɓāríī de gə̄ kadə̄ ɔsən̄ dɔdə́ naā tə́ i kə bərúnjə́ kə́ ɓāŕ kanjə̄ tétə̄ ndūn.

⁸ I ngán Aaro̰ gə̄ ń i ngé tun̄ yá̰a̰ gə̄ ní n a kɔ̄rə́n̄ bərúnjə gə̄ ní. Ndū najə̄ ń toō a to ngándáńg tām̄ yāsí tə́ ō, tām̄ yā ngáńsí gə̄ tə́ ō, ngán kaasí gə̄ tə́ ō.

⁹ Dan ń ā ī-ndiī dɔ nang yāsí tə́ ba ḭ́ḭḭ̄ yā rɔ̄ɔ̄ madə̄ ba̰ā̰sí gə̄ kə́ ngé rāā kumsí ndoō tə́ gə̄ anī, ā ī-tétī ndū bərúnjə gə̄ ní kadə̄ əgań kem Kɔ́ɔ̄ɓē Nə́ɓā yāsí dɔsí tə́ ba taāńsí jī madə̄ ba̰ā̰sí gə̄ tə́ əya̰sí dɔɔ́.

¹⁰ Ā ī-kɔ̄ríī bərúnjə ndɔ̄ rɔ̄nel̄ tə́ ō, ndɔ̄ pété tə́ ō, ndɔ̄ nāā kə́ kijə tə́ ō, dan ń ā ī-róōiń dā̰ horoó yā kadə̄ Kɔ́ɔ̄ɓē ní ō, ā ī-tunīiń yá̰a̰ tām̄ yā kem kógə̄ḿ tə́ ní ō. Ā ī-kɔ̄ríī bərúnjə kadə̄ əgań kem Nə́ɓā yāsí dɔsí tə́. Mā i Kɔ́ɔ̄ɓē Nə́ɓā yāsí.

Ngán Israel gə̄ ḭḭn̄ Sinai aw̄ ugə̄n̄ dɔ nin̄ loo kə́ Moab tə́ ( 10—20 ) Ngán Israel gə̄ əsōn̄ róbó

¹¹ Kə ndɔ̄ kutə jōó yā nāā kə́ nge ko̰o̰ jōó yā ɓāl̄ ń utə̄ gō nge ń ngán Israel gə̄ teēnəń kɔ̄ɔ́ Ejiptə ní, kil̄ man̄ ḭḭ kɔ̄ɔ́ dɔ kújə́ ń sandúkə ndū najə̄ yā Nə́ɓā i kemeé tə́ ní.

¹² Ngán Israel gə̄ ḭḭn̄ dəla loo kə́ Sinai tə́ kə gō naā aw̄n̄. Ba kil̄ man̄ aw̄ əhɔ loo dəla loo kə́ Paran tə́.

¹³ I ta kəla gíŕ ndɔ́tə̄də́ loo kə gō ndū Kɔ́ɔ̄ɓē ń adə̄ Moijə ní ɓáý.

¹⁴ I ɓūtə̄ áskar gə̄ kə́ gō dərapóo yā Juda tə́ n əsōn̄ róbó kété ní. Nason ngōn̄ Aminadab i ngol áskar gə̄ kə́ gír ɓē yā Juda tə́ ō,

¹⁵ Netanel ngōn̄ Suar i ngol áskar gə̄ kə́ gír ɓē yā Isakar tə́ ō,

¹⁶ Eliab ngōn̄ Helon i ngol áskar gə̄ kə́ gír ɓē yā Jabulo̰ tə́ ō.

¹⁷ Ró̰ȳn̄ kújə yā Nə́ɓā ta naā tə́ adə̄n̄ ngán Gerson gə̄ ō, ngán Merari gə̄ ō, adə̄ ətōn̄ aw̄nəń.

¹⁸ Ɓūtə̄ áskar gə̄ kə́ gō dərapóo yā Ruben tə́ utə̄n̄ gōdə́. Elisur ngōn̄ Sedeur i ngol áskar gə̄ kə́ gír ɓē yā Ruben tə́ ō,

¹⁹ Selumiel ngōn̄ Surisaday i ngol áskar gə̄ kə́ gír ɓē yā Simeo̰ tə́ ō,

²⁰ Eliasap ngōn̄ Dewel i ngol áskar gə̄ kə́ gír ɓē yā Gad tə́ ō.

²¹ Ngán kaa Kehat gə̄ ń a ətōn̄ yá̰á̰ kə́ táĺ gə̄ ní utə̄n̄ gōdə́. A rāān̄ kújə́ kə́ táĺ yā Nə́ɓā kadə̄ oy kété pá tá nin̄ a ugə̄n̄.

²² Gō tə́ anī ɓūtə̄ áskar gə̄ kə́ gō dərapóo yā Epəraim tə́ əsōn̄ róbó. Elisama ngōn̄ Amihud i ngol áskar gə̄ kə́ gír ɓē yā Epəraim tə́ ō,

²³ Gamliel ngōn̄ Pedasur i ngol áskar gə̄ kə́ gír ɓē yā Manase tə́ ō,

²⁴ Abidan ngōn̄ Gidoni i ngol áskar gə̄ kə́ gír ɓē yā Benjamḛ tə́ ō.

²⁵ Ɓūtə̄ áskar gə̄ kə́ gō dərapóo yā Dan tə́ utə̄n̄ gōdə́. Nin̄ i ta mūtə̄ bōȳ madə̄də́ gə̄ malang. Ahiejer ngōn̄ Amisaday i ngol áskar gə̄ kə́ gír ɓē yā Dan tə́ ō,

²⁶ Pagiel ngōn̄ Okəran i ngol áskar gə̄ kə́ gír ɓē yā Aser tə́ ō,

²⁷ Ahira ngōn̄ Enan i ngol áskar gə̄ kə́ gír ɓē yā Nepətali tə́ ō.

²⁸ Ngán Israel gə̄ əsōn̄ róbó kə gō naā i tītə̄ ń noō n aw̄nəń ní.

Moijə sāā de kə́ yā kɔjədə́ ta róbə

²⁹ Moijə əda Hobab ngōn̄ umən kə́ dəngam kə́ Madian ń rīn na i Rewel ní na: J-a j-aw̄ i kə̄ ɓē ń Kɔ́ɔ̄ɓē ənī míndən dɔ tə́ yā kadə̄jí ní tə́. Ī-reē āw̄ sejí na j-a jə-rāā majə seí, tɔdɔ̄ Kɔ́ɔ̄ɓē ənī míndən yā rāā majə kə Israel.

³⁰ Hobab tél əda na: M-ɔ́də alé, m̄-ndigə i tél kaw̄ ɓē yāḿ tə́, dan ngééḿ gə̄ tə́.

³¹ Moijə tél ədan na: m̄-rāāī ɓɔ́, ī-lōō kəya̰jí. Ḭ̄ ī-ger̄ loo gə̄ kə́ mángá ń kadə̄ j-əhɔ loo ndi tū tə́ ní. Ḭ̄ i nge kɔr nojí.

³² Ré āw̄ sejí anī yá̰á̰ kə́ majə gə̄ ń Kɔ́ɔ̄ɓē a adə̄jí ní, j-a j-ādə̄ ā ə́nge sejí ō.

³³ Ngán Israel gə̄ ḭḭn̄ mbal̄ yā Kɔ́ɔ̄ɓē tə́, njə̄rān̄ ndɔ̄də́ mətá. Sandúkə madə̄ naā yā Kɔ́ɔ̄ɓē i kété nodə́ tə́ yā sāā loo kɔr̄ koō tām̄ yādə́ tə́.

³⁴ Ré ndɔ́tə̄n̄ ɓē kadaá anī kil̄ man̄ yā Kɔ́ɔ̄ɓē i dɔdə́ tə́ dɔɔ́.

³⁵ Ré sandúkə madə̄ naā a ɔr̄ dɔɔ́ anī Moijə əda na: Kɔ́ɔ̄ɓē, ḭ́ḭ dɔɔ́ ādə̄ madə̄ ba̰ā̰í gə̄ tə̄ndān̄ naā tḭ̄ḭ̄n̄ kɔ̄ɔ́ ō, ādə̄ ngé rɔ̄ɔ̄í gə̄ a̰ȳn̄ naā kɔ̄ɔ́ noí tə́ ō.

³⁶ Ba ré a əndān̄ sandúkə́ ní kə̄ nang tə́ anī Moijə əda na: Kɔ́ɔ̄ɓē, ī-tél ī-reē ī-ndi dan kósə́ ngán Israel gə̄ tə́.